ՊՊԾ գունդը զավթողների աջակիցները ի պաշտպանություն նրանց երթ են անցկացնում

Այսօր՝ հուլիսի 17-ին լրացավ Ոստիկանության պարեկապահակային ծառայության (ՊՊԾ) գնդի զավթման 1 տարին:  

Այդ առնչության Ոստիկանության ՊՊԾ գունդը զավթելու մեջ մեղադրվող անձանց աջակիցները ի պաշտպանություն նրանց ժամը 20:00-ին երթ էին նախատեսել, որը մեկնարկեց Ազատության հրապարակից՝ 40 րոպե ուշացմամբ: 

Հրապարակում էին «Ժառանգություն» կուսակցության փոխնախագահ Արմեն Մարտիրոսյանը, « Երկիր Ծիրանի» կուսակցության ղեկավար Զարուհի Փոստանջյանը, ազատամարտիկ Վոլոդյա Ավետիսյանը, ՊՊԾ գունդը զավթողների հարազատները: 

Սակավամարդ երթի կազմակերպիչները երթի երթուղին չեն հրապարակում: Ազատության հրապարակից երթի մասնակիցները Թումանյան և Նալբանդյան փողոցներն անցնելով հասան Ազգային անվտանգության ծառայության շենքի մոտ: «Երևան կենտրոն» ՔԿՀ-ի մոտ երթի մասնակիցները կանգ առան, որտեղ գտնվում են Գագիկ Եղիազարյանը, Կարո Եղնուկյանը և ևս երկու հոգի:

Այնուհետև երթի մասնակիցները շարունակեցին քայլել դեպի Աբովյան փողոց, Մաշտոցի պողոտա:

Երթի մասնակիցները հայտնում են, որ Մաշտոցի պողոտայից կհասնեն Հանրապետության հրապարակ, որտեղից էլ կուղևորվեն Ազատության հրապարակ և կավարտեն երթը:

Հիշեցնենք, որ 2016 թվականի հուլիսի 17-ին զանգվածային անկարգություններ 
կազմակերպելու նախապատրաստության, ծանրացուցիչ հանգամանքներում սպանությունների, շենքեր, շինություններ, տրանսպորտի միջոցներ զավթելու, պատանդ վերցնելու և պահելու, ապօրինի կերպով հրազեն, ռազմամթերք ձեռք բերելու, պահելու, փոխադրելու, զենք, ռազմամթերք հափշտակելու, ուրիշի գույքը գաղտնի հափշտակելու և դիտավորությամբ ոչնչացնելու վերաբերյալ հարուցվել է քրեական գործ: 

ՊՊԾ գունդը զավթելու և նշված այլ արարքները կատարելու մեջ մեղադրվում է 60 անձ: 32 մեղադրյալի մասով արդեն ընթանում է դատավարություն: