Իսրայելը դեմ է Թրամփ–Պուտին համաձայնությանը

ՄԻՋԱԶԳԱՅԻՆ 18 Հուլիս, 2017 16:01

Իսրայելի վարչապետ Բենիամին Նեթանյահուն կիրակի օրը Ֆրանսիայի նախագահ Էմանուել Մակրոնի հետ հանդիպման ժամանակ չափազանց վատ գործարք է որակել Սիրիայի հարավ–արևմուտքում հրադադար հաստատելու՝ ռուս–ամերիկյան համաձայնությունը՝ բացատրելով, թե այդկերպ լեգիտիմացվել է Իրանի ռազմական ներկայությունը տարածաշրջանում: Այս հայտարարությունը լրջորեն է զայրացրել ֆրանսիացիներին, որոնք Իսրայելի վարչապետի դեմ բողոքի ցույցեր են կազմակերպել Փարիզում: Ընդ որում՝ ոչ միայն Սիրիայի պատճառով:

Բանն այն է, որ Իսրայելի վարչապետը Ֆրանսիա էր ժամանել նախագահ Մակրոնի հրավերով՝ մասնակցելու 2–րդ համաշխարհային պատերազմի տարիներին Վիշիի ռեժիմի կողմից շուրջ 76000 հրեաների մահվան ճամբարներ արտաքսելու տխուր իրողության հիշատակման արարողությանը: Եվ ահա ֆրանսիացիները կամ գոնե առանձին քաղաքական ուժեր, այդ թվում՝ կոմունիստները, դեմ են դուրս եկել դրան՝ համարելով, որ Վիշին դեռ ողջ Ֆրանսիան չէ, և կարիք չկա նույն բանի համար հազար անգամ ներողություն խնդրել Իսրայելից, իսկ Նեթանյահուն էլ այն գործիչը չէ, որին պիտի հակաբռնության դեսպան ու քարոզիչ ընկալել:

Սա, ուրեմն, դարձել է ցույցերի մի առիթը: Երկրորդ առիթը պաղեստինա–արաբական չլուծվող հակամարտությունն է՝ Պաղեստինի չճանաչման հիմքով, և Գազայի շրջափակումը, որի պատճառով նույնպես միտինգներ են կազմակերպվել՝ EuroPalestine հ/կ–ի գլխավորությամբ: Իսկ բողոքի հաջորդ պատճառը, ինչպես վերևում նշեցինք, Սիրիան է, որի առնչությամբ նույնիսկ Ֆրանսիայի հրեաների մի մասն է համոզված, որ Իսրայելը մեծ սխալ է գործում՝ ընդդիմանալով Սիրիայի հարավում հրադադարի ռեժիմի հաստատմանը:

Բայց խնդրի էությունը, նույնիսկ իսրայելական սփյուռքի բողոքի պայմաններում, Նեթանյահուի կառավարության համար չի փոխվում: Այստեղ համոզված են, և մամուլն էլ ակտիվորեն է քննարկում այդ տեսակետը, որ հրադադարից օգտվելով՝ Իրանն ու նրա արբանյակները կամրապնդեն իրենց ներկայությունը Սիրիայում: Հետախուզական մարմիններն ինչ–ինչ գաղտնի տվյալներ են բերում առ այն, որ Թեհրանն, իբր, պատրաստվում է նոր, այդ թվում՝ ծովային ռազմաբազաներ ստեղծել Սիրիայում:

Մամուլը գրում է, թե անցած կիրակի Նեթանյահուն խնդիրը քննարկել է նաև ԱՄՆ պետքարտուղար Ռեքս Թիլերսոնի հետ՝ բողոքելով, որ Իսրայելի և Հորդանանի սահմաններին մոտ գտնվող Դարաայի, Կունեյտրայի և Սուեյդայի շրջաններում հաստատված և Իսրայելի շահերը հաշվի չառնող հրադադարը, որ հսկելու են հիմնականում ռուս ոստիկանները, կարող է անդառնալի հետևանքներ ունենալ: Այդ թվում՝ Ասադի ռեժիմն ու Սիրիայի սահմաններն անխախտ թողնելու հետևանքով, ինչն, ի դեպ, ՌԴ նախագահ Վլ. Պուտինը Համբուրգում չէր էլ թաքցրել:

Եվ չնայած ԱՄՆ–ի առանձին շրջանակներում այս մտահոգությունը ըմբռնում է գտնում, ինչպես երևում է՝ Սպիտակ տունը, այժմ նաև՝ Մակրոնը, փորձում են առաջ գնալ մեկ այլ ճանապարհով: Այն է՝ գոնե այս պահին առաջնահերթություն չդիտարկել Ասադի տապալումը և հնարավորինս ընդլայնել այն գոտիների ապառազմականացումը, որտեղ արյունալի բախումներ են ընթանում:

Ամերիկյան The Daily Beast պարբերականը խելամիտ է համարել այս որոշումը՝ այս պահին ամենակարևորը ԴԱԻՇ–ի դեմ պայքարը, ռուսների հետ ռազմական կոորդինացիայի վերականգնումը և հումանիտար միջանցքների բացումը դիտարկելով: Իսրայելն էլ հակադրվում է սրան՝ Պնախարար Ավիդգոր Լիբերմանի շուրթերով հայտարարելով, թե հակառակ հաստատված համաձայնությանը՝ Իսրայելը կանի այն, ինչ հարմար կգտնի և կպահպանի գործողությունների իր ազատությունը՝ Իսրայելի հավաքական անվտանգությունը պաշտպանելիս:

Իսրայելը չի լռի՝ հաղորդում է Ալ–Արաբիան: Իսկ իրանական լրատվամիջոցներն էլ գրում են, թե սիոնիստական ռեժիմի միակ մտահոգությունը Սիրիայի մասնատման և Ասադի տապալման ծրագրերի խափանումը, ինչպես նաև՝ Գոլանի բարձունքներում Թել–Ավիվի հոգածությամբ պատսպարված ջիհադիստների անգործությունն է, որոնք այլևս չեն կարող Սիրիայի հարավում աննկատ կերպով սրել իրադրությունը: Խնդիր, որի լուծման համար, կարծես թե՝ անարդյունավետորեն, Նեթանյահուն նաև Ֆրանսիայի նախագահ Էմանուել Մակրոնի օգնությանն է դիմել, ակնկալելով, որ ի վիճակի է շարժել համաշխարհային դերակատարման նոր հայտ ներկայացրած երիտասարդի նախանձախնդրությունը…