«Նոր Հայաստանի» շուրջ հավաքվել են ուժեր, որոնք նախկինում ձախողվել են. Արմեն Բադալյան

Անդրադառնալով ընդդիմադիր ուժերի կողմից ստեղծված «Նոր Հայաստան» հանրային փրկության ճակատին՝ քաղաքական տեխնոլոգիաների մասնագետ Արմեն Բադալյանը Past.am-ի հետ զրույցում ասաց, որ այդ նախաձեռնության մեջ ընդգրկված գործիչները սիրում են պաթոսային խոսքեր:

«Իհարկե, զգացմունքային դաշտից է «Հայաստանի փրկության ճակատ» ասվածը: Բայց դա միայն «Նոր Հայաստան» միավորմանը չէ բնորոշ, Հայաստանի բոլոր քաղաքական ուժերն էլ այդպիսին են: Նրանք ցանկանում են շեշտել, որ Հայաստանում այնքան ճգնաժամային իրավիճակ է, որ եկել են փրկելու, փրկչի առաքելություն ունեն» ,-նշեց Բադալյանը: Քաղտեխնոլոգի խոսքով՝ նոր ուժի քաղաքական հաջողությունը կարող է պայմանավորված լինել հասարակության վիճակով: Ըստ նրա՝ եթե հասարակությունը ակտիվ լինի, ապա հաջողություն կունենան:

Սակայն քաղտեխնոլոգը նկատում է, որ հասարակության 5 տոկոսն է ակտիվ հետաքրքրվում քաղաքականությամբ, իսկ մնացած 95 տոկոսի մոտ քաղաքականությամբ հետաքրքրվելը սահմանափակվում է ընտրություններին մասնակցելով: «Քվեարկողների որոշ մասն էլ ֆինանսական շահագրգռվածություն ունի: Անտարբերությունը քաղաքականության, պետության և պետականության ատրիբուտների հանդեպ հասարակության շրջանում շատ է մեծացել: Արտագաղթողի հոգեբանությունն էլ է ուժեղացել: Նման հասարակությունը չի կարող ծնել մրցունակ քաղաքական ուժեր: Իսկ «Նոր Հայաստանի» մեջ կան ուժեր, որոնց իրենցից ներկայացնում են մարդ-կուսակցություն, կամ կազմակերպություն, որը խոստանում էր, որ հարյուրամյակն առանց ռեժիմի պետք է լինի: Այնտեղ կա կուսակցություն, որն ԱԺ-ում կարծես էլ խմբակցություն չունի:

«Նոր Հայաստանի» շուրջ հավաքվել են ուժեր, որոնք նախկինում ձախողվել են»,- ասաց մեր զրուցակիցը՝ հավելելով, որ նրանց հետագա հաջողությունների հնարավորությունը թող որոշի ժողովուրդը:

Հիշեցնենք, որ «Նոր Հայաստան» միավորման ստեղծման մասին անցնող շաբաթվա սկզբին հայտարարեցին Րաֆֆի Հովհաննիսյանն ու Ժիրայր Սեֆիլյանը:

Լևոն Փանոսյան