Աճպարարություն էր. 15-ամյա հանդբոլիստի մահվան մեջ մեղադրվողը դատապարվեց 7 տարվա ազատազրկման

Վերաքննիչ քրեական դատարանն այսօր՝ հուլիսի 18-ին,  մասնակիորեն  բավարարել է մեղադրող դատախազի վերաքննիչ բողոքն ու Վանաձորում 15-ամյա հանդբոլիստ Դավիթ Հովակիմյանի սպանության մեջ  մեղադրվող Կարեն Կունգուրցեւին դատապարտել 7 տարվա ազատազրկման: NEWS.am-ի հետ զրույցում Կարեն Կոնգուրցեւի շահերի պաշտպան Արայիկ Պապիկյանը Վերաքննիչ դատարանի դատական ակտը որակեց որպես աճպարարություն:

«Վերաքննիչ դատարանն իր այս որոշմամբ փրկեց և՛ քննիչներին, և՛ բյուջեից դուրս եկող գումարները, որոնք պետք է հատուցեին իմ պաշտպանյալին ապօրինի կալանքի տակ պահելու համար, եւ  նախաքննական մարմինը փրկվեց: Բացի այդ ազատվեցին իսկական մեղավորին գտնելու գլխացավանքից: Իմ պաշտպանյալը հովանավորներ չուներ, ինքը  պետք է պատժվեր, չէ որ մամուլում էլ տեղեկություններ կար, որ սպանությունը կատարել է  ԱԱԾ պաշտոնյայի որդի է: Վերաքննիչի որոշումը պատվեր էր»,-ասաց նա:

Փաստաբան Արայիկ Պապիկյանը նաեւ նշեց, որ վերաքննիչ դատարանը փոխել է իր պաշտպանյալին առաջադրված մեղադրանքը:

«Մեղադրող դատախազը բողոք էր բերել, որ  Կարեն Կունգուրցեւին մեղավոր ճանաչեն  ՀՀ քր. օր-ի 34-104 հոդ. 1-ին մասով՝ սպանության փորձ, սակայն,  Վերաքննիչը փոխեց մեղադրանքը եւ իմ պաշտպանյալին մեղավոր ճանաչեց ՀՀ ՔՕ-ի 112-րդ 2-րդ մասի 14 կետով՝ դիտավորությամբ առողջությանը ծանր վնաս պատճառելը: 4 տարի անց սա ապտակ էր դատախազությանը, որը վստահ էր, որ տեղի ունեցածը սպանության փորձ է, այսինքն՝ դատախազությունը մոլորության մեջ է եղել»,-ասաց պաշտպանը:

Արայիկ Պապիկյանը նաեւ նշեց, որ Կարեն Կոնգուրցեւը կալանքի տակ է առնվել հենց դատական նիստերի դահլիճից: Նա վերջրես էր ամուսնացել, ունի 2 ամսական երեխա:

Հիշեցնենք, որ Լոռու մարզի առաջին ատյանի դատարանը հանցակազմի բացակայության հիմքով արդարացրել էր Կարեն Կունգուրցեւին եւ ազատ արձակել դատական նիստերի դահլիճից: