Թուրքիայում Դարվինի էվոլյուցիային նախընտրել են ջիհադը

Թուրքիայի իշխանությունները հուլիսի 18-ին ներկայացրել են դպրոցական նոր ծրագիր, որից հանել են Չառլզ Դարվինի էվոլյուցիայի տեսությունը, փոխանցում է Reuters-ը։

Թուրքիայի ուսուցիչների արհմիության նախագահն այդ փոփոխությունները բնութագրել է որպես սխալ ուղղությամբ արված քայլ, որով փորձում են խուսափել «հարցեր տվող սերնդի» առաջացումից։

Կրթության նախարար Իսմետ Յիլմազը հայտնել է, որ էվոլյուցիայի հիմնական տարրերն արդեն իսկ կան ուսումնական ծրագրի հիմքում, բայց Դարվինի տեսության մասին ծրագրերում չի հիշատակվելու մինչեւ համալսարանական կրթությունը։Նախարարը համարում է, որ այդ տեսությունը «վեր է դպրոցականների ըմբռնումից» դրա համար էլ ուսումնական ծրագրի բաղկացուցիչ չէ։

Մինչդեռ Ժողովրդական հանրապետական կուսակցության ներկայացուցիչ Մուստաֆա Բալբայը համարում է, որ նախարարի այդ ձեւակերպումը վիրավորական է ավագ դասարանցիների համար։

Թուրքիայի նախագահ Ռեջեփ Թայիփ Էրդողանը, որին քննադատները մեղադրում են ժողովրդավարական ազատությունները ոչնչացնելու մեջ, նախկինում խոսում էր «բարեպաշտ սերունդ» ստեղծելու մասին։

2017-2018 թթ ուսումնական ծրագիրը նաեւ «Իմամ Խաթիպ» կրոնական դպրոցներին պարտավորեցնում է ուսումնասիրել ջիհադի հայեցակարգը։ «Մենք նաեւ պարտավոր ենք շտկել այն, ինչը սխալ է ընկալվել։ Ահա թե ինչու իսլամական իրավունքի դասընթացները ու ֆունդամենտալ կրոնի հիմնական դասախոսությունները ներառելու են ջիհադի դասեր»,- ասել է Յիլմազը լրագրողներին։ «Ջիհադի իրական իմաստը մեր ազգի հանդեպ սերն է»։