Ինչու՞ են մոծակները որոշ մարդկանց ավելի շատ կծում

Ամառը հավանաբար բոլորիս համար տարվա ամենասիրելի եղանակն է: Սակայն, վստահ եմ, մի բան կա որ ձեզ շատ է նյարդայնացնում ամռանը. դրանք չարաբաստիկ մոծակներն են:

Գուցե նկատած կլինեք, որ մոծակները նախընտրում են որոշ մարդկանց ավելի շատ կծել, քան մյուսներին: Ի՞նչն է պատճառը:

Ֆլորիդայի համալսարանի պրոֆեսոր բժիշկ Ջոնաթան Դեյը բացատրում է, թե ում մոտ է ավելի բարձր մոծակների խայթոց ստանալու ռիսկը:

«Որոշ մարդկանց մոտ ավելի շատ քիմիական նյութեր են արտադրվում մաշկի մեջ և այդ քիմիական նյութերից որոշները, այդ թվում օրինակ կաթնաթթուն, գրավում են մոծակներին:»

Ինչպես նաև բժիշկ Դեյը բացատրում է, որ մոծակները նաև խայթում են մարդկանց՝ ըստ նրանց արյան խմբերի: Պարզվում է՝ մոծակների ամենասիրելի արյան խումբը առաջին խումբն է, իսկ չորրորդը՝ ամենաքիչ նախընտրելին է:

Հղի կանայք և գեր մարդիկ մոծակներից խայթվելու ամենաբարձր ռիսկերն ունեն: Ինչպես նաև ավելի հավանական է, որ մոծակները կկծեն մուգ գույնի հագուստ կրող մարդկանց, քանի որ մուգ գույնի հագուստը ավելի մեծ կոնտրաստ ունի հորիզոնի հետ, ինչն էլ օգնում է մոծակներին հեշտությամբ գտնել իրենց զոհին:

Բացի դա, այդ մարդիկ ավելի շատ են արտադրում ածխաթթվի երկօքսիդ, որը մոծակների ամենասիրելի բանն է:

Հուսով ենք այս տեղեկությունը ձեզ կօգնի գուշակել, թե արդյոք դուք մոծակների սիրելին եք, թե ոչ: