ԱՄՆ–ԵՄ նոր առճակատում՝ Մոսկվայի պատճառով

ՄԻՋԱԶԳԱՅԻՆ 25 Հուլիս, 2017 18:04

ԱՄՆ նախագահ Դոնալդ Թրամփը մշտապես բարդ հարաբերություններ է ունեցել մեդիայի հետ: Եվ չնայած այդ հարցում ԶԼՄ–րը նույնպես մեղքի իրենց ահռելի չափաբաժինն ունեն, միևնույն է, Սպիտակ տունը որոշել է բարելավել հարաբերությունները մեդիա–համայնքի հետ և արմատական փոփոխություններ անել պատասխանատու կադրերի շրջանում: Այսպես՝ Սպիտակ տան տեղեկատվության բաժնի ղեկավար է նշանակվել 53–ամյա ձեռնարկատեր, նյույորքցի Էնթոնի Սքարամուչին, իսկ Սպիտակ տան նոր խոսնակ՝ նախկին փոխխոսնակ Սարա Սանդերսը: Եվ եթե վերջինս նոր պաշտոնում լրագրողների հետ առաջին շփման ժամանակ հիմնականում շեշտը դրել է առավել բովանդակալից և արդյունավետ համագործակցության վրա, Էնթոնի Սքարամուչին հավաստել է, որ փորձելու է օգնել լրագրողներին տեսնել իրական Դոնալդ Թրամփին:

Այնպիսին, ինչպիսին նրան գիտեն մտերիմները՝ հրաշալի մարդ և քաղաքական լավ բնազդ ունեցող հայրենասեր նախագահ: Սքարամուչին նաև հավաստել է, որ պատրաստ է դիմակայել մամուլի հետ աշխատանքի բոլոր բարդություններին ու մարտահրավերներին, ինչը շատ տեղին է հնչել, որովհետև վերջինիս գլխին, հենց առաջին պահից սկսած, հեղեղի պես են հարցեր տեղացել՝ ՌԴ պատժամիջոցների նոր օրինագծի հետ կապված: Սքարամունչին, ի դեպ, կարողացել է պատվով դուրս գալ իրավիճակից. նա խնդրել է մանրամասների համար տկն. Սառային դիմել, որը հենց առաջին օրից է պաշտոնավարել Սպիտակ տանը, իսկ արդեն անձամբ հավելել է, որ եթե հանրապետականներն ու դեմոկրատները համաձայնության գան Կոնգրեսում, Թրամփը օրինագծի ստորագրման հետ կապված խնդիր չի տեսնի:

Ի դեպ, Սքարամուչիի հայտարարությունից ժամեր անց հայտնի դարձավ, որ բավական թունդ բանավեճերից հետո դեմոկրատա–հանրապետական համաձայնությունը Կոնգրեսում, այնուամենայնիվ, կայացել է, ինչը որոշ սենատորներ պատմական են որակել, իսկ դեմոկրատ սենատոր Բեն Քարդինն այն որպես ԱՄՆ ժողովրդի՝ Պուտինին հասցեագրված միասնական ուղերձ է ներկայացրել: Սրան անմիջապես է արձագանքել ՌԴ նախագահի մամլո խոսնակը, ընդ որում՝ մեկ նախադասությամբ: Շատ վատ ենք վերաբերվում պատահածին՝ ասել է Դմիտրի Պեսկովը, ինչը փոխանցելուց հետո ռուսական մեդիան կենտրոնացել է արդեն Եվրամիությունից հնչած խիստ արձագանքների վրա:

Որ Եվրամիությունը պիտի չխրախուսեր ԱՄՆ նոր պատժամիջոցները թեկուզ միայն այն պատճառով, որ բավական հեղհեղուկ հիմքով դրանք տարածվելու են նաև Իրանի վրա, կանխատեսելի էր ի սկզբանե՝ Բրյուսելից հնչած նախկին քննադատական տեքստերից ելնելով: Ինչ վերաբերում է Ռուսաստանին՝ ԵՄ–ում համոզված են, որ ԱՄՆ–ն պարտավոր էր խնդիրը քննարկել նաև իր հետ, որովհետև նոր պատժամիջոցները էականորեն են շոշափում հին աշխարհամասի տնտեսական շահերը: Այս պատճառով ահա Եվրահանձնաժողովի նախագահ Ժան–Կլոդ Յունկերը ԵՄ անդամ երկրներին առաջարկել է անհապաղ քննարկել Բրյուսելի հնարավոր պատասխանը ամերիկյան կողմին, ինչի մասին հավաստել է Financial Times հանդեսը: Վերջինիս ձեռքում է հայտնվել մի փաստաթուղթ, ըստ որի՝ Բրյուսելը կամ ԱՄՆ–ից բանավոր ու գրավոր երաշխիքներ կպահանջի, որ նոր պատժամիջոցները չեն վտանգի ԵՄ տնտեսական շահերն ու հիմնականում՝ էներգետիկ ընկերությունների գործունեությունը կամ դրանք անվավեր կհռչակի ԵՄ տարածքում: Ավելին՝ փաստաթղթում ասվում է, որ բոլոր դեպքերում ԵՄ–ն կոնտրքայլեր կձեռնարկի ԱՄՆ–ի դեմ՝ Առևտրի համաշխարհային կազմակերպության կանոնակարգի շրջանակներում:

Պատժամիջոցներն արդյունավետ են միայն այն դեպքում, երբ դրանք համաձայնեցված են: Ներկա պահին Եվրոպայի պատժիչ կանոնակարգերը խստորեն են համաձայնեցված, ինչի շնորհիվ բարձր է ոչ միայն դրանց արդյունավետության աստիճանը, այլև, կոլեկտիվ և հավասարակշռված որոշումների ընդունման արդյունքում, հնարավորություն է ստեղծված խուսափել անկանխատեսելիությունից ու հնարավոր բացասական ազդեցություններից: Միակողմանի միջոցները կփչացնեն այս ամենը,– ասված է ԵՄ փաստաթղթում: