«Նա գրավեց ինձ էկզոտիկ գեղեցկությամբ». Գեւորգ Գրիգորյանն իր այլազգի կնոջ մասին

NEWS.am STYLE-ը գրում է.

Սերիալներից հայտնի դերասան Գեւորգ Գրիգորյանը, որն այս շրջանում նկարահանվում է «Եթե գտնեմ քեզ» հեռուստասերիալում, օրերս օրինականացրել է հարաբերություններն ընտրյալի՝ լուսանկարչուհի Յուլիա Կուրոչկինայի հետ:

Զույգը հանդիպել է Երեւանում, երբ Յուլիան այստեղ էր՝ տեսարժան վայրերը նկարելու նպատակով:

NEWS.am STYLE-ի հետ զրույցում Գեւորգը պատմել է ռուսական արմատներ ունեցող Յուլիայի հետ ծանոթության, խանդի եւ իրենց համատեղ ծրագրերի մասին.

«Մենք ծանոթացել ենք պատահական՝ ընդհանուր ծանոթների շրջապատում: Յուլիան ինձ գրավեց ամեն ինչով՝ զուսպ պահվածքով, զարգացվածությամբ, գեղեցիկ ձայնով ու էկզոտիկ գեղեցկությամբ: Նույն օրը՝ առաջին հանդիպումից հետո, երբ գնաց, ես արդեն գիտեի՝ ՆԱ է»,-նշում է դերասանը:

Խոսելով կնոջ՝ իր մասնագիտության հանդեպ խանդի մասին՝ Գեւորգն ասում է.

«Խանդ չկա: Բացի դա՝ նա միշտ ինձ հետ է նկարահանման հրապարակում եւ ծանոթ է բոլոր խաղընկերներիս հետ»:

Գեւորգի խոսքով՝ ինքն  ու Յուլիան շատ ընդհանրություններ ունեն. «Բնավորություններով, ճաշակներով եւ հետաքրքրություններով շատ նման ենք»:

Երիտասարդ զույգը դեռ չի որոշել, թե որ երկրում է բնակություն հաստատելու.

«Դեռ երկիրը չենք ընտրել: Գարնանը սարերում ձյունը կհալվի, կգնանք, կտեսնենք, կորոշենք»,-կատակում է դերասանը, որը ոտքի վիրահատությունից հետո արդեն անցել է սիրելի հոբբիին:

«Ամառն արդեն անցկացնում եմ մոտոցիկլետի վրա: Եղբայրներս ինձ օգնում են, որպեսզի կարողանամ նստել, իսկ մնացածն արդեն ինքնուրույն եմ անում: Մոտոցիկլետով Հայաստանից դուրս չեմ գնա, քանի դեռ ոտքս արտաքին երկաթներով է հավաքված: Հենց ոսկորներս կպնեն, եւ ամբողջությամբ ապաքինվեմ, արդեն կարելի է վստահ երթեւեկել»,-ասում  նա:

Սյունե Առաքելյան