Փոփոխություններ՝ ճանապարհային երթևեկության մասին օրենքում

ՀԱՍԱՐԱԿՈՒԹՅՈՒՆ 27 Հուլիս, 2017 14:04

«Ճանապարհային երթևեկության անվտանգության ապահովման մասին» օրենքում փոփոխություններ և լրացումներ կատարելու մասին», «Վարչական իրավախախտումների վերաբերյալ օրենսգրքում փոփոխություններ կատարելու մասին» և «Պետական տուրքի մասին» օրենքում փոփոխություններ կատարելու մասին» օրենքների նախագծեր կընդունվեն: Այս մասին տեղեկանում ենք իրավական ակտերի հրապարակման միասնական կայքից:

Ըստ այդմ՝ նախագծերի ընդունման անհրաժեշտությունը պայմանավորված է ճանապարհային երթևեկության անվտանգության ապահովման բնագավառում առկա իրավական, ինչպես նաև օրենքների գործնական կիրառման ընթացքում ի հայտ եկած մի շարք խնդիրներին լուծում տալու նպատակով:

Ըստ նախագծի՝ գործող օրենսդրությունը որոշ իրավահարաբերություններ ամբողջությամբ և հստակ չի կարգավորում, իսկ որոշ փաստացի գոյություն ունեցող իրավահարաբերություններ ընդհանրապես դուրս են մնացել օրենսդրական կարգավորումներից, ինչը լուրջ խնդիրներ է ստեղծում ինչպես իրավակիրառ մարմինների, այնպես էլ՝ ճանապարհային երթևեկության մասնակիցների համար: Մասնավորապես «Ճանապարհային երթևեկության անվտանգության ապահովման մասին» օրենքում՝ մի շարք հասկացություններ հստակ չեն և չեն համապատասխանում ներկայի պահանջներին, իսկ որոշ հասկացություններ ընդհանրապես սահմանված չեն:

ԵԱՏՄ–ին ՀՀ անդամակցելու արդյունքում մաքսային օրենսդրության փոփոխության պատճառով մաքսային ռեժիմների անվանումները չեն համապատասխանում նոր մաքսային օրենսդրությանը, հստակ սահմանված չեն տրանսպորտային միջոցի գրանցումը մերժելու հիմքերը, մարմնական վնասվածքներով ճանապարհատրանսպորտային պատահարների գործերով վարչական վարույթ իրականացնելու դեպքում տրանսպորտային միջոցը պատասխանատու պահպանության հանձնելու և պահպանվող հատուկ տարածք չտեղափոխելու հնարավորությունները:

Բացի այդ, առկա է հակասություն ԱՊՊԱ գործընթացը կարգավորող օրենսդրության հետ, ինչի արդյունքում նույնիսկ շատ նվազ նյութական հետևանքներով ճանապարհատրանսպորտային պատահարներից հետո (հատկապես՝ Երևան քաղաքում) վարորդները ստիպված են լինում բավականին երկար սպասել պատահարի վայրում՝ առաջացնելով խցանումներ: Միաժամանակ վարորդական վկայականներ տալու, փոխանակելու, կորած վարորդական վկայականի փոխարեն նորը տալու, ինչպես նաև վարորդական վկայականի գործողության, վարելու իրավունքը դադարելու, վարորդական վկայականն ուժը կորցրած ճանաչելու վերաբերյալ մի շարք իրավահարաբերություններ կարգավորված չեն:

Նշված խնդիրներին լուծում տալու նպատակով առաջարկվում է գործող օրենքներում համապատասխան փոփոխություններ և լրացումներ կատարելու միջոցով «Ճանապարհային երթևեկության անվտանգության ապահովման մասին» Հայաստանի Հանրապետության օրենքում՝ սահմանված հասկացությունները հստակեցնել և համապատասխանեցնել ներկայի պահանջներին, ինչպես նաև սահմանել նոր հասկացություններ, մաքսային ռեժիմների անվանումները համապատասխանեցնել գործող օրենսդրությանը, հստակեցնել ճանապարհատրանսպորտային պատահարի դեպքում վարորդների պարտականությունները, վերացնել ԱՊՊԱ գործընթացը կարգավորող օրենսդրության հետ առկա հակասությունները և այլն:

Նախագծերը մշակվել են Հայաստանի Հանրապետության կառավարությանն առընթեր Հայաստանի Հանրապետության ոստիկանության «Ճանապարհային ոստիկանություն» ծառայության կողմից:

Օրենքների նախագծերի ընդունմամբ ճանապարհային երթևեկության կազմակերպման և անվտանգության ապահովման բնագավառում կբարձրացվի պետական քաղաքականության իրականացման արդյունավետությունը, կհստակեցվեն երթևեկության մասնակիցների պարտականությունները, կնվազեն ճանապարհատրանսպորտային պատահարների հետևանքով խցանումներ առաջանալու հնարավորությունները:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ