Իսպանիայի երիտասարդ, հայտնի հայ դիմահարդարը՝ իր գործունեության, դիմահարդարման համաշխարհային զարգացումների և 2017 թվականի թրենդների մասին

Globnews.am կայքն իր ընթերցողին պարբերաբար ներկայացնելու է հայկական համայնքներում տեղի ունեցող իրադարձությունները, միջոցառումները, տեղի հայերի ձեռքբերումներն ու նվաճումները:

Մեր թղթակիցը զրուցել է Իսպանիայում բնակվող երիտասարդ հայտնի հայ դիմահարդար (make up artist) Անահիտ Կարապետյանի հետ:

 

-Ողջույն Անահիտ, որքա՞ն ժամանակ է՝ բնակվում եք Բարսելոնայում:

-Բարև Ձեզ: Ծնվել եմ Երևանում, 6 տարի է՝ ապրում եմ Բարսելոնայում:

- Քանի՞ տարի է, ինչ աշխատում եք որպես դիմահարդար:

- Արդեն 14 տարի է ինչ աշխատում եմ գեղեցկության ոլորտում:

- Ո՞ւմ հետ եք աշխատում և համագործակցում Բարսելոնայում:

-Աշխատում եմ տարբեր դիզայներների, լուսանկարիչների, մոդելների և երգիչների հետ, համագործակցում՝ մի շարք նախագծերի շրջանակներում:

-Ի՞նչ սկզբունքով եք աշխատում:

-Միշտ աշխատում եմ տարբեր բնագավառի լուսանկարիչների հետ և դա ավելի շատ հետաքրքրություն է մտցնում իմ աշխատանքի մեջ: Քանի որ ամեն անգամ ստեղծում ես մի նոր կերպար, որը նման չէ նախորդին:

- Ի՞նչ հաջողություններ եք գրանցել Ձեր բնագավառում, բայց արդեն Բարսելոնայում:

- Այստեղ ներկայացրել եմ կերպարային դիմահարդարում Բարսելոնայի ճարտարապետության հետ համատեղ: Առաջին լուրջ համագործակցությանս Իսպանիայում լույս տեսնող Novias հարսանեկան ամսագրի հետ էր:

- Այդտեղ Ձեր գործունեության ընթացքում ունեցել եք արդյոք աշխատանքային դժվարություններ:

- Բնականաբար դժվարություններ եղել են և կան յուրաքանչյուր ոլորտում, սակայն իմ առաջ դրված հստակ նպատակներն, ու դրանք իրականացնելու ցանկությունն այնքան մեծ է, որ հաղթահարում եմ ցանկացած դժվարություն և խոչընդոտ: Աշխատասիրությունը, կամքի ուժը կարևոր գծեր են, որ օգնում են իրականացնել երազանքները:

- Ինչպիսի՞ն են դիմահարդարման պահանջներն Իսպանիայում:

-Շատ բազմազան: Բնական դիմահարդարումից մինչև կրեատիվ կերպարային աշխատանքներ: Գունային գամման նույնպես շատ բազմազան է:

-Հետևում եք արդյոք դիմահարդարման ոլորտի համաշխարհային զարգացումներին:

- Բնականաբար: Հետևում եմ աշխարհում հայտնի դիմահարդարների աշխատանքներին, սակայն աշխատանքի մեջ ոչ պակաս կարևոր է հաշվի առնել մարդու դիմագծերը՝ կերպարն ամբողջական դարձնելու համար և, ինչ խոսք, ունենալ նաև աշխատանքային սեփական ոճը: Այսօր աշխարհը փոխվում է շատ արագ ռիթմով , և այդ ռիթմով շարժվելու համար պետք է անընդհատ աշխատես քեզ վրա և ձգտես ավելի կատարելագործվելուն:

- Անահիտ, որո՞նք են 2017 թվականի դիմահարդարման թրենդները:

- Նորաձևության ոլորտում թրենդները փոփոխվում են ամեն օր: Դիմահարդարման թրենդներն էլ երկար կյանք չեն ունենում: Այսօր նորաձև է համարվում թարմ, մշակված, լուսավորված, խոնավ և փայլուն մաշկը, փայլող շրթներկները, այսինքն հնարավորինս բանական տեսքը: Հաստ հոնքերը երկար ժամանակ է թրենդային էին համարվում, սակայն այժմ նորաձև են բնական, բայց խնամված հոնքերը: Գունային գամմայի տեսանկյունից նորաձև են համարվում ոսկեգույն, վարդագույն, կապույտ գույները, վառ երանգների ստվերաներկերն էլ բավականին ակտուալ են: Աչքերին սև, իդեալական գծված սլաքները և smokey eye-ը շարունակում են մնալ ակտուալ և կարծում եմ երբեք էլ դուրս չեն գա նորաձեւությունից: Կարմիր շրթներկը այս տարի կրկին պահանջված է:

Այսօր նաև թրենդաին է համարվում strobing makeup-ը ։ Այսինքն՝ լուսավորել դեմքի այն հատվածները, որը բնականից փայլում է։ Այն ժամանակին քողարկում էինք դիմափոշիներով, որպեսզի դեմքը չփայլեր, բայց այժմ՝ հակառակը, թաց շեշտադրումներով դիմահարդարումն է արդի։

- Ի՞նչ խորհուրդ կտաք հայ կանանց և աղջիկներին

- Մեր հայ կանայք և աղջիկները բնականից իրապես գեղեցիկ են, ունեն գեղեցիկ դիմագծեր և ամենօրյա դիմահարդարման ժամանակ միայն դիմահարդարելով թարթիչները , կիրառելով մի քիչ գունափոշի այտերին և օգտագործելով փայլող շրթներկ կլինեն թրենդային: Ես միշտ խրախուսում եմ լինել բնական, ընդգծել բնական գեղեցկությունը, օգտագործել դիմահարդարումը գրագետ՝ հաշվի առնելով սեփական դիմագծերը, սեփական դեմքի առանձնահատկությունները: