Ամռանը մաշկը խնամելու կանոններ՝ մասնագետից

Life.panorama.am-ը գրում է.

Կինը պետք է քաջատեղյակ լինի ոչ միայն սեփական մարմնի առանձնահատկություններին, այլեւ այն խնամելու ճիշտ կանոններին: Իսկ յուրաքանչյուր սեզոն պահանջում է մաշկի համապատասխան խնամք:

Life.panorama.am-ը ամռանը մաշկը ճիշտ խնամելու կանոնների մասին խոսել է «Հելիոս» բժշկական կենտրոնի բժիշկ-մաշկաբան Տաթեւիկ Հարությունյանի հետ, ով իր ցուցումներն ու մասնագիտական խորհուրդներն է տվել:

«Ամռան գլխավոր հաճույքները՝ արեւը եւ շոգը, որպես կանոն վատ են ազդում  մաշկի վրա, եւ դառնում տարբեր խնդիրեների պատճառ, ինչն էլ անդրադառնում է  մաշկի  գեղեցկության եւ երիտասարդության վրա: ՈւՄՃ-ի ազդեցությամբ՝ մաշկը չորանում է, հաստանում, ծածկվում պիգմենտային բծերով, մյուս կողմից էլ շոգը խթանում է ճարպա/քրտնագեղձերի աշխատանքը, որն էլ ստեղծում է ավելոդ խնդիրներ անկախ մաշկի տեսակից եւ տարիքից: Սա է պատճառը, որ հատկապես մեր տարածաշրջանին բնորոշ շոգ եւ չոր ամռան ընթացքում պարտադիր է որոշակի փոփոխություններ կատարել ինչպես կիրառվող  կոսմետիկ միջոցների,  այնպես էլ մաշկի խնամքի ընտրության մեջ»,- նշեց մաշկաբանն ու անդրադարձավ մաշկի խնամքի տեսակներին.

«Ամռանը հիմնական մաշկի խնամքի տեսակներն են՝ մաքրումը, խոնավեցումը եւ համապատասխան պշտպանությունը արեւից: Ցանկացած խնամք սկսվում է մաքրումից, շատ կարեւոր է հատկապես ամռանն այն գրագետ իրականացնել, մանրամասնորեն  մաքրել օրվա ընթացքում կուտակված փոշին  եւ շպարը դեմքի վրայից: Ամռանը մաքրող միջոցները՝ մուս, գել, կաթիկ, կախված մաշկի տեսակից պետք է լինեն ավելի մեղմ, առանց սպիրտային եւ այլ գրգռող բաղադրության, որոնք կարող են վնասել մաշկի պաշտպանիչ հիդրո լիպիդային շերտը՝ դարձնելով այն ավելի զգայուն արեւի վնասող ազդեցության նկատմամբ»,- հավելեց բժիշկը:

Տաթեւիկ Հարությունյանը շեշտեց.

«Ամռան ընթացքում ցանկալի չէ սկռաբերի՝ մեխանիկական քերող մասնիկներ պարունակող կոսմետիկ միջոցների կիրառումը. Դրանք կարող են առաջացնել միկրո վնասվածքներ, որոնք նույնպես թիրախ են արեւի ճառագայթների համար եւ կարող են հանգեցնել հետագայում պիգմենտային բծերի ու այլ խնդիրների առաջացման: Մաքրման էտապում ցանկալի է կիրառել էնզիմային փիլլինգներ, որոնք մեղմորեն քայքայում են ծակոտիների խցանները՝ չվնասելով  ու չգրգռելով նույնիսկ զգայուն մաշկը: Էնզիմային փիլլինգները հաճախ իրականացվում են որպես մասնագիտական խնամք հատուկ էսթետիկ բժշկության կենտրոններում»:

Մասնագետի խորհրդով՝ ամռանը ցուցված են ցանկացած մեղմ, թեփազատող, ատրավմատիկ մաքրման, խոնավեցնող խնամքներ՝ հիդրոդերմաբրազիա, ուլտրաձայնային մաքրում, որոնք պետք է կատարվեն սեզոնային հատուկ կոսմետիկ նյութերով:

Ըստ Տաթեւիկ Հարությունյանի՝ խնամքի մյուս կարեւոր տեսակը խոնավեցումն է, ջրային հիմքի վրա, որը պետք է  կիրառել բարակ շերտով:

Ակնեի հետ կապված խնդիրներ ունեցողներին, նաեւ ճարպոտ մաշկ ունենալու դեպքում բժիշկը խորհուրդ է տալիս օգտագործել խոնավեցնող միջոցներ.

«Ամռանը, կապված ճարպագեղձերի ակտիվացման հետ, սեբորիայի եւ ակնեի հետ կապված խնդիրները սրվում են, մյուս կողմից էլ քրտնագեղձերի ակտիվ աշխատանքը բերում է մաշկի ջրազրկման եւ մաշը դառնում է ավելի զգայուն եւ խոցելի: Ճարպոտ կամ ակնեի հակում ունեցող մաշկի դեպքում ցանկալի է կիրառել խոնավեցնող միջոցներ հիմնականում գելերի ձևով,  ծակոտիների խցանումից խուսափելու համար»,- նշեց նա:

Իսկ վերջում բժիշկը հավելեց. 

«Ի դեպ՝ ամռան ամիսներին ցանկալի չէ կատարել ցանկացած մեթոդով հեռացումներ, մաշկի բաց հատվածում՝ գորտնուկ, բարորակ նորագոյացություններ, ինչպես նաեւ ագրեսիվ քիմիական փիլլինգներ: Տարվա ցանկացած եղանակի եղեք առողջ եւ խնամված»:

Հեղինակ՝ Անուշիկ Մելքոնյան