Երիտասարդ սերնդի մոտ պետք է ձևավորել կարծիք, որ ծխողներն անհաջողակ են. Լևոն Ալթունյան

Ծխելու դեմ պայքարի ռազմավարությամբ նախատեսվում են 4-5 ուղղություններով ծրագրեր: «Այդ ուղղություններն են օրենսդրական դաշտի փոփոխությունը, հասարակական վայրերում ծխելու և ծխախոտի դեմ պայքար վարելու հստակեցումը, դեռահասների և ուսանողների, զորակոչիկների, բժիշկների շրջանում իրազեկման բարձրացումը, առողջապահական առաջին օղակների կարողությունների բարձրացումը, տարբեր տեսակի ուղեցույցների, ծրագրերի մշակումը՝ ծխախոտի կախվածությունից»,- կառավարության նիստից հետո լրագրողների հետ զրույցում այդ մասին նշեց ՀՀ առողջապահության նախարար Լևոն Ալթունյանը:
Նախարարն ասաց, որ երկրորդային ծխից պաշտպանելու համար պետք է խստացնեն հասարակական վայրերում ծխելու թույլտվության հարցը, և առաջնային է վերահսկող կազմակերպության իրավասությունների և պատասխանատվության շրջանակների հստակեցումը:

Ինչ վերաբերում է տուգանքներին, վերահսկման մեխանիզմներին, ապա Ալթունյանը նշեց, որ ռազմավարությունը չի նախատեսում այդ հարցերի պատասխանները: «Այդ հարցերի պատասխանները դուք կլսեք կոնցեպտի ներքո մշակված օրենսդրական նախագծերում, որը կլինի նոյեմբեր-դեկտեմբեր ամիսներին»,- «Արմենպրես»-ի փոխանցմամբ,  ասաց նա՝ չբացառելով տուգանքի հնարավորությունը, որն օրենսդրական կարգավորման հարց է:
Հարցին, թե ծխախոտ ներմուծող և արտադրող ընկերությունների կողմից լոբբիստական քայլեր նկատե՞լ են նախագծին դեմ, Լևոն Ալթունյանն ասաց,  որ նման գործունեության ազդեցություն չի զգացել, իսկ նրանց կարծիքը նախագծի մասին չեն հարցրել:
Հարցին, թե նախարարը շարունակո՞ւմ է կարծել, որ ծխողներն անհաջողակ են, Լևոն Ալթունյանը պատասխանեց. «Ես կարծում եմ, որ երիտասարդ սերնդին մեծացնելիս իրենց մոտ պետք է ձևավորել այդպիսի կարծիք»: