Ղազախստանի ազգային ակադեմիական գրադարանում կբացվի հայ գրականության կենտրոն

Ղազախստանի ազգային ակադեմիական գրադարանում կբացվի հայ գրականության կենտրոն: Ինչպես «Արմենպրես»-ի հետ զրույցում նշեց գրադարանի գլխավոր տնօրեն Ումիտխան Մունալբաևան, համագործակցության պատրաստակամությունը կա, ծրագրերը նախանշված են, մնում է մի քանի տեխնիկական հարցերը կարգավորել:

«Մենք պատրաստվում ենք այստեղ հայ գրականության կենտրոն բացել, ներկայացնել հայ գրականությունը: Ղազախստանում մեծ հայ համայնք է ապրում և տեղի հայերը կարող են օգտվել այդ ֆոնդից: Մենք սերտորեն համագործակցում ենք մեր հայ գործընկերների հետ: Ես պատրաստ եմ հնարավորություն ստեղծել հայ ստեղծագործողների համար, որ գան այստեղ հայ համայնքի հետ հանդիպեն, իրենց գրքերը ներկայացնեն»,-ասաց Ումիտխան Մունալբաևան:

Հայաստանի ազգային գրադարանում 2016 թվականին բացվել է ղազախական գրականության կենտրոն, որը լավ հնարավորություն է գրքի միջոցով հայ ընթերցողին ներկայացնելու Ղազախստանի ձեռքբերումները և նվաճումները: Գրադարանի տնօրենը Հայաստանում եղել է և շատ տպավորված է  Մատենադարանի հնարավորություններով, այնտեղ պահվող հարուստ գրականությամբ:

«Այն բացառիկ կառույց է, մեր նախարարն ասաց, որ անհրաժեշտ է Ղազախստանում ստեղծել այդպիսի կենտրոն, իհարկե, մենք ձեզնից շատ հեռու ենք: Ես անկեղծ կլինեմ, երբ տեսա Մատենադարանն, ասացի, բրավո հայերին: Հայերը խորապես կրթված, հայրենասեր, գրականությունը գնահատող, ավանդույթները պահպանող ազգ են: Կարծում եմ, որ գրականության միջոցով  մենք երկու երկրներում ավելի շատ կներկայացնենք մեր մշակույթը, պատմությունը: Երբ ես եկա Հայաստան, ինձ թվում էր, թե ես հայերի մասին ամբողջական պատկերացում ունեմ,  այնտեղ լինելով, հասկացա, որ շատ բան պարզապես չգիտեմ: Երկու ազգերի մշակույթի, պատմության մասին փոխադարձ իմացությունը բարձր մակարդակի վրա չէ, պետք է աշխատել այդ ուղղությամբ»,-ասաց նա:

Ղազախստանի ազգային ակադեմիական գրադարանի ֆոնդում պահվում է մոտ 1.5 մլն միավոր գրականություն: Այստեղ աշխատում են պրոֆեսիոնալ գրադարանավարներ: Ի տարբերություն շատ այլ գրադարանների, այստեղ իրականացվում է գրադարանային մենջմենթ:

«Այս փորձը ես տեսել եմ արտասահմանում: Գրադարանային մենեջմենթը ենթադրում է վերլուծություն այն մասին, թե ո՞ր գրքերն են այսօր պահանջված, այսօր ինչպիսի՞նն է ընթերցողը, ի՞նչ տարիքային խումբ է ներկայացնում, ի՞նչ նախընտրություններ ունեն, ընթերցոդներն ի՞նչ կարծիք ունեն նոր տեխնոլոգիաների կիրառման մասին: Եթե դիտարկենք այնպիսի երկրներ, ինչպիսիք Անգլիան, ԱՄՆ-ը, Չինաստանն են, ապա կարող ենք ասել, որ այնտեղ շատ լավ զարգացած է գրադարանային ոլորտը: Ես վերջերս Կորեայում էի, ինձ այնտեղի փորձը զարմացրեց: Երկիր, որը ստեղծում է տեխնիկա` հեռախոսներ, պլանշետներ և այլն,  այնտեղ գրադարանների մոտ հերթեր են գոյանում: Ես կարծում եմ, որ այդ ընթերցանության մշակույթը կորեացիների մեջ կա: Ես կողմնակից եմ, որ գրադարանները շատ լինեն, օրինակ, այսօր մեզ մոտ հարց է բարձրացվում, մանկական գրադարանների ստեղծման մասին: Քննարկումների արդյունքում որոշում կայացվեց, որ 2018 թվականը հայտարարվի մանկական գրականության տարի: Դա կնպաստի երեխաներին ընթերցանությանը մոտեցնելու գործընթացին»,-ավելացրեց նա:

Ակադեմիական գրադարանն ընթերցողների, գիտնականների, ուսումնասիրողների համար ստեղծել է լավագույն պայմանները: Նախ գրադարանը մեծ տեղ է հատկացնում թվայնացմանը, ակտիվ տեմպերով թվայնացվում է գրադարանում պահվող գրականությունը՝ դրանով բազմաթիվ գրքեր, բացառիկ հրատարակություններ էլեկտրոնային տարբերակով հասանելի դարձնելով ընթերցողներին:  

Գրադարանում առկա են բազմաթիվ սրահներ` հագեցած  նոր տեխնոլոգիաներով, որոնք հնարավորություն են տալիս անցկացնելու բազմապիսի միջոցառումներ: Արվեստի սենյակում ընթերցողները կարող են գտնել հետաքրքիր կատարումների ձայնագրություններ` պարզապես, լսելու, վայելելու համար:

Մեկ այլ սենյակում ֆիլմեր դիտելու հնարավորություն կա: Նույնիսկ գրադարանն ունի հանգստի սենյակ, այնտեղ այնպիսի պայմաններ են, որ անձն իրեն զգա բնության գրկում: Գրադարանում գործում է յուրատեսակ վերելակ գրքերի համար, ընթերցասրահում ընթերցողը պատվիրում է գիրքը, իսկ վերելակն այն բերում հասցնում է ընթերցողին, վերջինս ստիպված չի լինում սրահներ այցելել գիրքը ստանալու համար:

Գրադարանի պաշտոնական բացումը տեղի է ունեցել 2004 թվականի հունիսի 10-ին: Գրադարանն առաջին ընթերցողներին ընդունել է 2005 թվականի սեպտեմբերի 10-ին:

Աննա Գզիրյան