Բուհերը պետք է այնպես անեն, որ 1 տարվա անկման պատճառով չգնան անիմաստ կրճատումների և կորցնեն իրենց կադրային ներուժը. ՀԱՊՀ ռեկտոր

ՀԱՍԱՐԱԿՈՒԹՅՈՒՆ 6 Օգոստոս, 2017 22:40

Հայաստանի ազգային պոլիտեխնիկական համալսարանն այս տարի էլ դիմորդների պակաս չի զգում: Այս մասին Tert.am-ի հետ զրույցում ասաց համալսարանի ռեկտոր Ոստանիկ Մարուխյանը: Նրա խոսքով՝պետպատվերում որևէ թափուր տեղ չկա, ավելին՝ գտնում է, որ հայաստանյան բուհերից միջին ամենաանկորուստն իրենք են:

«Այս պահին մենք արդեն 851 հրամանագրված դիմորդ ունենք: Եթե համեմատեմ անցյալ տարվա հետ, ապա մոտավորապես 37-ով է պակաս: Կարծում եմ՝ այստեղ իր դերակատարումն է ունեցել նաև հաստատության վարկանիշը, թե ինչպիսի կազմակերպություններ են վերջին 2 տարվա ընթացքում մուտք գործել Հայաստանի ազգային պոլիտեխնիկական համալսարան»,- ասաց նա:

Ռեկտորը գիտի, որ եկող տարի դիմորդների քանակն ավելի քիչ է լինելու, և չեն բացառում նաև կադրային կրճատումները: Միաժամանակ, Մարուխյանը շեշտեց, որ 2019 թվականին խնդիրները կարգավորվելու են և պետք է ամեն ինչ անել, որ մեկ տարվա խնդիրների պատճառով բուհը որակյալ կադրեր չկորցնի:

«Կտրուկ անկումը համադրում եմ այն իրողության հետ, որը տեղի կունենա 2019 թվականին՝ շրջանավարտները կլինեն 35 հազար: Բուհերը պետք է այնպես պլանավորեն իրենց գործունեությունը, որ մեկ տարվա անկման հետևանքով չկորցնեն իրենց կադրային ներուժը, չգնան, այսպես կոչված, անիմաստ կրճատումների»,- նշեց ռեկտորը:

Մարուխյանը մատնացույց արեց, որ վերջին տարում Հայաստանի ազգային պոլիտեխնիկական համալսարան մուտք են գործել այնպիսի կազմակերպություններ, ինչպիսիք են «Շնայդեր էլեկտրիկ»-ը և «Տաշիր» խումբը. «Գործատուն եկել է մեր դուռը, գործատուն մեզանից մասնագետներ է պահանջում, բնականաբար, նաև պետք հոգա այդ կադրերի պատրաստումը: Ասեմ, որ որոշ ժամանակ առաջ մեզ է այցելել նաև Siemens-ի պատվիրակությունը, մեկ ամիս հետո մենք կբացենք նաև այս ընկերության կենտրոնը մեզ մոտ: Մենք սկսել են նաև անօդաչու սարքերի լաբորատորիայի շինարարությունը, 3-4 ամսվա ընթացքում շահագործման կհանձնենք: Պոլիտեխնիկում երկրի պաշտպանության համար ռեալ հնարավորություն է ստեղծվում»,- շարունակեց Մարուխյանը:

Հարցին՝ ունե՞նք ներուժ երկրի ներսում երկրի պաշտպանական համակարգի համար ինչ-որ բան ստեղծելու՝ նկատի ունենալով, որ մեր գիտնականներից ոմանք գտնում են, որ ՀՀ-ն չի կարող և «քոսոտ» երկիր է, ռեկտորը պատասխանեց. «Միանշանակ կարող եմ հայտարարել, որ ունենք: 6 ամիս ժամանակ է մեզ տրված այս գործն ավարտին հասցնելու համար, 6 ամսից կարող են այցելել լաբորատորիա և հասկանալ՝ ներուժ կա՞, թե՝ոչ»: