Ռիտան իմ կյանքը լցրեց արևով, ժպիտով ու ջերմությամբ. Կարո Հովհաննիսյան

Citylife.am-ը գրում է.

Սերն ամենաբարի ու մաքուր զգամունքն է. այն բոլոր օրերը տոն է դարձնում և կյանքը լցնում ջերմությամբ։ Օրեր առաջ լրացավ դերասան Կարո Հովհաննիսյանի և նրա ընտրյալի` Ռիտայի սիրո մեկ ամյակը։ Citylife.am-ը զրուցել է Կարոյի հետ, անակնկալների և ապագա ծրագրերի մասին։

Citylife.am- Կարո՛, նախ շնորհավորում եմ. Ձեր սերն արդեն մեկ տարեկան է։ Ձեր սիրո պատմությանը արդեն ծանոթ ենք. ծանոթացել եք համացանցով, այնուհետև Ռիտան եկել է Հայաստան, հանդիպել եք, հասկացել եք, որ նա է ձեր իդեալը։ Եվ իրադարձությունները զարգացել են բավականին արագ։ Եկեք վերհիշենք ամենահետաքրքիր դեպքը, այս մեկ տարվա ընթացքում։

Կարո- Մենք փորձում ենք ամեն օրվանից վերցնել դրականը, ամեն օրը լցնել հետաքրքիր իրադարձություններով ու ժպիտով, այդ իսկ պատճառով հետաքրքիր դեպքեր շատ-շատ են լինում, բայց փորձեմ առանձնացնել մեկը։ Մեր շփման սկզբնական շրջանն էր, հերթական անգամ գնացել էինք Կասկադ`«մեր տեղը». սկզբից շատ մարդ կար, բայց հանկարծ, կարծես պայմանավորված, բոլորը գնացին, մնացինք երկուսով ու մեր քաղաքը։ Երկար զրուցեցինք մեր, կյանքի, ապագայի մասին։ Զրույցի ընթացքում եկավ մի պահ, երբ սկսեցինք արտահայտել մեկս մյուսի մտքերը. պատահականություն չէր. սիրո ուժն էր։ Ռիտան զարմանքից և ուրախությունից գոռում ու արտասվում էր։ Հրաշքի նման մի բան էր…

Citylife.am- Շատ գեղեցիկ կերպով շնորհավորել էիք Ձեր տոնը, նշել էիք, որ փոխվել է Ձեր կյանքը և էությունը. անդրադառնանք այդ փոփոխություններին։

Կարո- Ռիտայի հայտնվելը, անսպասելիորեն, փոխեց մտածելակերպս, կարծիքս ու հայացքս կյանքի շատ երևույթների նկատմամբ։ Իմ կյանք բերեց արև, ժպիտ ու ջերմություն, և իմ միակ նպատակը դարձավ, անհապաղ, սեփական ընտանիք կազմելը։

Citylife.am- Ինչպե՞ս եք նշել Ձեր սիրո տարեդարձը։ Ձեր նշանադրության ժամանակ նշել էիք, որ չեն եղել անակնկալներ. ամեն ինչ ընտրել եք միասին։ Իսկ այս անգամ եղա՞ն անակնկալներ։

Կարո– Այս անգամ վերջապես ստացվեց անակնկալ անել. միշտ իմ բնավորության պատճառով ձախողում եմ անակնկալները։ Նվիրեցի այն, ինչ Ռիտան շատ էր ուզում։ Անակնկալը մատուցեցի աշխատավայրում, երբ նա շատ զբաղված էր, ողջ թիմը աշխատանքային ռիթմի մեջ էր։ Երեկոյան գնացինք Սևան և այնտեղ շարունակեցինք նշել մեր օրը։

Citylife.am- Կարո՛, այժմ դուք և Ձեր սիրելին ունեք նորաձևության և գեղեցկության սրահ. ինչպե՞ս ծնվեց գաղափարը։

Կարո– Գաղափարը Ռիտան վաղուց է ունեցել, երբ դեռ ապրում և սովորում էր Մոսկվայում։ Բայց այս ամենը պատկերացնում էր այնտեղ։ Իսկ ես փոխեցի նրա պլանները և բերեցի Երևան։ Միասին իրականացրինք երկուսիս երազանքը, ամեն ինչ արել ենք երկուսով, և դեռ շատ նախագծեր կան առջևում։ Սա դեռ հիմքն է, որի վրա պետք է կառուցենք Ռիտայի երազանքը։

Citylife.am- Հե՞շտ է աշխատել միասին. լեզու գտնու՞մ եք բիզնես ոլորտում։

Կարո– Սիրելի մարդու հետ աշխատելը ամենագեղեցիկ երևույթներից է. աշխատանքը մշտապես ուղեկցվում է դրական էմոցիաներով։ Իհարկե լինում են դեպքեր, երբ համակարծիք չենք, երբ իրար «միս ենք ուտում», բայց տևում է հինգ րոպե, որից հետո մեկ ժպիտ, մեկ համբույր, և փորձում ենք ընդհանուր որոշման գալ։ Հրաշալի զգացողություն է անել այն, ինչ սիրում ես, ինչ ուզում ես սիրելի մարդու ընկերակցությամբ։ Մշտապես աջակցում ենք միմյանց խորհուրդներով։

Citylife.am- Առաջիկայում ի՞նչ նորությունների սպասի ընթերցողը` Կարո-Ռիտա այսքա՜ն ներդաշնակ զույգից։

Կարո– Նորությունները դեռ միայն գործնական կլինեն։ Շուտով կստեղծվեն Ռիտայի մոդելավորած հագուստները և կցուցադրվեն հանրությանը։ Նորություններին կարող եք ծանոթանալ` հետևելով մեր սոցկայքերին։ Չեմ կարող չնշել, որ սոցկայքերի միջոցով միշտ լավ մեկնաբանություններ ենք ստանում, ինչի համար շատ շնորհակալ եմ բոլորից։ Ժամանակները փոխվել են, և յուրաքանչյուր բարի ու դրական վերաբերմունք շատ գնահատելի է։

Citylife.am- Ո՞ր գույնին է նման ձեր սերը:

Կարո– Սև ու սպիտակ։

Citylife.am-Ա՞րև, թե՞ փոթորիկ է ձեր զույգը:

Կարո- Երկուսն էլ. մենք շատ հակասական, բայց և շատ ներդաշնակ ենք։

Citylife.am- Նրա բնավորությունից Ձեզ նյարդայնացնում է…

Կարո- Կամակորությունն ու անհամբերությունը։

Citylife.am- Նրա արտաքինից ամենից շատ սիրում եք…

Կարո– Սիրող աչքերն ու ջերմ ժպիտը:

Citylife.am- Ամենից շատ գնահատում եք նրա….

Կարո- Խիզախությունը, հստակ գիտի` ինչ է ուզում ու միշտ հասնում է իր ուզածին։

Citylife.am- Սիրում եք, երբ նա…

Կարո– Ժպտում է։

Citylife.am- Բառ, որով հաճախ դիմում եք նրան:

Կարո– Ճուտիկ։

Citylife.am- Ձեր վայրը…

Կարո- Կասկադի ամենավերևի հատվածը։

Citylife.am- Երազում եք…

Կարո– Ունենալ տուն ծովափին, շատ երեխաներ ու շատ փող ։) իսկ ավելի լուրջ` ստեղծել մեր ընտանիքը ու զբաղվել սիրելի աշխատանքով։

Citylife.am- Ձեր կարգախոսը…

Կարո- Միշտ ժպտալ, դիմացինին պարգևել ժպիտ ու դրական էմոցիաներ, միշտ հավատալ ու գնալ առաջ։

Citylife.am- Կարո՛, շնորհակալ եմ անկեղծ զրույցի համար։ Մաղթում եմ ավելի ու ավելի սիրառատ ու ջերմ օրեր։