Լեհաստանի հատուկ ծառայություններ․ Լեհերը չեն կարող իրենց ամբողջովին անվտանգ զգալ ԻՊ-ի պատճառով

Հիմա Լեհաստանում ահաբեկչությունների սպառնալիք չկա, սակայն լեհերը չեն կարող իրենց ամբողջովին անվտանգ զգալ ԻՊ կազմակերպության հետ կապակցված անձանց գործունեության պատճառով։ Այս մասին հայտնել է Լեհաստանի հատուկ ծառայությունների համակարգող նախարարի մամուլի քարտուղար Ստանիսլավ Ժարինը, փոխանցում է Լեհաստանի ռադիոն։

Նա նշել է, որ անցած տարի եղել են մի քանի նման դեպքեր, մասնավորապես, չորս չեչենների գործերը, որոնց Բելոստոկի դատարանը մեղադրում է ԻՊ-ին աջակցելու մեջ։ Ժարինը շեշտել է, որ լեհական հատուկ ծառայությունները չեն բարձրացրել երկրում ահաբեկչական սպառնալիքի մակարդակը։

«Հատուկ ծառայությունները ահաբեկչական սպառնալիքի մակարդակը գնահատում են որպես ցածր, ու մենք այն բարձրացնելու պատճառ չունենք։ Դա չի նշանակում, սակայն, որ լեհերը կարող են իրենց ամբողջովին անվտանգ զգալ։ Մենք գիտակցում ենք, որ կա ահաբեկչության դեմ պայքարին լեհական մասնակցության տարրը, դրա համար էլ բացառված չէ, որ ահաբեկչությունների սպառնալիք կարող է հայտնվել»,- նշել է Ստանիսլավ Ժարինը։

Նա նաև ուշադրություն է հրավիրել այն հանգամանքին, որ ջիհադականների հետ կապակցված մարդիկ փորձում են Լեհաստանն օգտագործել որպես իրենց գործունեության համար թիկունք։ Փորձում են Լեհաստանը օգտագործել ԻՊ-ին ֆինանսավորելու համար, լեհական տարածքով զինյալներ են տեղաշարժվում, նաև գրանցվել են հօգուտ ԻՊ-ի Լեհաստանի քաղաքացիների գործունեության դեպքեր։