Բաքվում ԵԱՀԿ/ԺՀՄԻԳ-ին փոխարինող են գտել

Ադրբեջանի իշխանությունները նոյեմբերի 1-ին անցկացվելիք խորհրդարանական ընտրություններին դիտորդական առաքելությունից հրաժարված ԵԱՀԿ ժողովրդավարական հետազոտությունների և մարդու իրավունքների գրասենյակին փոխարինող են գտել:

Ինչպես հաղորդում է «Արմենպրես»-ը' վկայակոչելով «Թուրան» լրատվական գործակալությունը, Ադրբեջանի կենտրոնական ընտրական հանձնաժողովը հոկտեմբերի 20-ին որոշում է ընդունել, որ Ադրբեջանի երկու իշխանամետ ոչ կառավարական կազմակերպություններ' Աշխատանքային իրավունքների լիգան ամերիկյան AJF&Associates Inc ընկերության, իսկ Ադրբեջանի երիտասարդության իրավունքների պաշտպանության կենտրոնը' ֆրանսիական Opinion Way սոցիոլոգիական ծառայության հետ համագործությամբ պետք է նոյեմբերի 1-ի խորհրդարանական ընտրությունների ընթացքում exit-poll անցկացնեն:

Ադրբեջանի հիշյալ ոչ կառավարական կազմակերպությունները նախկինում երբեք չեն զբաղվել ընտրությունների մոնիտորինգով և գնահատականներով:

Ինչ վերաբերվում է ամերիկյան AJF&Associates Inc և ֆրանսիական Opinion Way ընկերություններին, ապա դրանք արդեն հանդես են եկել Ադրբեջանի իշխանությունների գովազդով: Այսպես, նրանց վերջերս անցկացրած հարցումների արդյունքներով Ադրբեջանի բնակչության բացարձակ մեծամասնությունը պաշտպանում է Իլհամ Ալիևի քաղաքականությունը և գտնում է, որ չնայած համակարգային ճգնաժամին' երկիրը շարժվում է ճիշտ ուղղությամբ:

Ընտրությունների ոլորտում միջազգային հեղինակավոր ԵԱՀԿ/ԺՀՄԻԳ կազմակերպությունն ավելի վաղ հրաժարվել էր Ադրբեջանում ընտրությունների մոնիտորինգից կապված նրա հետ, որ ադրբեջանական իշխանությունները փորձեր են արել սահմանափակել ընտրությունների գնահատականների ժամանակ իր հնարավորությունները: Դա արտահայտվել էր նրանով, որ Բաքուն հրաժարվել էր ընդունել մոնիտորինգի համար կառույցի ներկայացրած դիտորդներին:

2013 թվականին Ադրբեջանում անցկացված նախագահական ընտրություններից հետո Բաքվում սկանդալ էր տեղի ունեցել, երբ իշխանամետ ուժերը ձախողել էին քվեարկության ընթացքում լուրջ խախտումների մասին հայտարարած միջազգային դիտորդների մամուլի կոնֆերանսը:

Դրանից հետո ադրբեջանական իշխանությունները հայտարարել էին, որ չեն համագործակցելու ԵԱՀԿ/ԺՀՄԻԳ-ի հետ, եթե այդ կազմակերպությունը չփոխի իր «ոչ օբյեկտիվ» դիրքորոշումը: