ԼՂ հիմնախնդրի վրա Ռուսաստանի ազդեցության մասին խոսելն իմաստ չունի, այստեղ Ադրբեջանի հավակնություններն են մեծ դեր խաղում. քաղաքագետ

Ռազմավարական և ազգային հետազոտությունների հայկական կենտրոնի տնօրեն, քաղաքագետ Մանվել Սարգսյանը մեծ ուշադրություն չի դարձնում, որ ամերիկացի կամ այլ վերլուծաբանները կարծում են՝ Ղարաբաղյան հիմնախնդրի կարգավորումը Ռուսաստանին ձեռնտու չէ: Նա Tert.am-ի հետ զրույցում նշեց, որ իր համար նման քննարկումները կարևոր չեն, պարզապես կարգավորման գործընթաց չկա էլ, և մեկնաբանները դրա վերաբերյալ տարբեր կարծիքներ են արտահայտում, գնահատականներ տալիս:

«Միշտ էլ քննարկվել է, որ Ռուսաստանն է մեղավոր, որ Ղարաբաղյան հիմնախնդիրը չի լուծվում: Ռուսաստանցի փորձագետներն էլ մեղադրում են ամերիկյան կողմին հիմնախնդրի չլուծման մեջ: Հիմա, կարծում եմ, քննարկումները վերսկսվել են, քանի որ այդ երկու երկրների միջև հարաբերությունները լարվել են, և շատերը կարծում են, որ այդ լարվածությունը հակասություններ կստեղծի նաև Ղարաբաղյան հիմնախնդրում»,- ասաց նա:

Հիշեցնենք, որ  ամերիկացի վերլուծաբանները կարծիք էին հայտնել, որ Ռուսաստանի նման պետությունները ցանկանում են պահպանել Ղարաբաղյան հակամարտությունը: Մասնավորապես, Ամերիկյան ձեռնարկատիրության ինստիտուտի վերլուծաբան Մայքլ Ռուբինը նշել  էր, որ Ղարաբաղյան հակամարտության կարգավորման համար խոչընդոտ են խնդրում ներգրավված բազմաթիվ կողմերի շահերը: «Եթե խնդիրը վերաբերեր միայն երկու երկրներին, այն, հավանաբար, արդեն կարգավորված կլիներ, սակայն, Ռուսաստանի նման պետությունները ցանկանում են պահպանել հակամարտությունը»,-ասել էր նա:

Մանվել Սարգսյանը նշեց, որ ինքը չի կարծում, որ այս պահին անընդհատ սրվող ԱՄՆ-ՌԴ հարաբերությունները հակասություններ չեն առաջացնի Ղարաբաղյան հիմնախնդրի կարգավորման գործընթացում: «Մինչև հիմա բոլոր կողմերն էլ ասում էին, որ բոլոր միջնորդներն էլ միասնական դիրքորոշում ունեն կարգավորման հետ կապված, հիմա էլ այդպես է»,- ասաց նա՝ նշելով, որ հենց ԵԱՀԿ Մինսկի խմբի համանախագահող երկրների շահերից է բխում, որ Ղարաբաղյան հիմնախնդրում հակասություններ չլինեն:

Քաղաքագետը պատճառաբանեց՝ Արևմուտքը՝ Միացյալ Նահանգները, ՆԱՏՕ-ն, այս տարածաշրջանում անվտանգության խնդիրների հետ կապված էական հավակնություններ չունեն: «Բազմաթիվ անգամներ հայտարարվել է, որ Հայաստանն ինքն է ապահովում իր անվտանգությունը, ասվել է, որ որևէ խոչընդոտ չկա, որ ռուսական  ռազմաբազան այստեղ լինի: Հայաստանը նաև վերջին շրջանում առավել ակտիվորեն է մասնակցում ՆԱՏՕ-ի ծրագրերին: Մենք դա տեսնում ենք, և տեսնում ենք, որ Ղարաբաղյան հիմնախնդրում ևս իսկապես տարաձայնություններ չկան: Սա է նաև այն հիմնական պատճառը, որ Ղարաբաղյան հիմնախնդրում երբեք տարբեր դիրքորոշումներ չեն եղել»,- ասաց նա:

Վերադառնալով քննարկումներին, թե Ռուսաստանն է խոչընդոտում Ղարաբաղյան հիմնախնդրի կարգավորմանը, նա նշեց, որ նախևառաջ պետք է հասկանալ, թե ինչ է «կարգավորում» ասվածը: «Կարգավորում ասելով՝ հասկացվում են հիմնախնդրի լուծման վերաբերյալ առաջարկները, որոնց շուրջ երբեք համաձայնություն չի եղել,- ասաց նա՝ նշելով, որ Ադրբեջանը չի ցանկանում համաձայնության գալ և որևէ իրավունքից հրաժարվել:

Ըստ քաղաքագետի՝ Ղարաբաղյան հիմնախնդրի վրա որևէ այլ երկրի ազդեցության մասին խոսելն էլ իմաստ չունի: Այստեղ, ըստ նրա, միայն Ադրբեջանի հավակնություններն են մեծ դեր խաղում: «Ադրբեջանը 1991 թվականին  ստեղծվել է ուրիշ տարածքում: Նա կորցրել է ինչ-որ բան, և իր հավակնությունները պահում է: Միջազգային հանրությունն էլ այդ տարածքները ճանաչել է որպես Ադրբեջանի մաս: Եթե մենք ուզում ենք այդ խնդիրը լուծել, Ադրբեջանին պետք է զրկենք իրավունքներից»,- ասաց նա:

Նա պնդեց, որ Ղարաբաղյան հիմնախնդրի վրա այլ երկրների ազդեցությունների մասին խոսակցությունները ոչ մի նշանակություն չունեն և իրականում կապ չունեն կարգավորման գործընթացի հետ: «Պետք է նախ հասկանալ, թե ինչ է նշանակում կարգավորում. միջազգային հանրությունը պետք է գա կոնսենսուսի և քննարկի, թե որտեղ է խնդիրը: Ադրբեջանն ինչո՞ւ է իրան այդպես պահում, որովհետև հենց միջազգային հանրությունն է նրան այդ հնարավորությունը տվել՝ ժամանակին իրեն չպատկանող տարածքները նրա մաս ճանաչելով: Պետք է զրկել Ադրբեջանին այդ իրավունքներից»,- կրկնեց նա: