«Կարծում եք 500 աշխատատեղ ենթադրող ձեռնարկությունը կարելի է մի քանի ամսում հիմնե՞լ». Խ. Հարությունյան

Վերջերս, Տնտեսական զարգացման և ներդրումների նախարարության կողմից հրապարակվեց երկրի արտահանման, ներմուծման և տնտեսական ակտիվության ցուցանիշները: Հրապարակումից հետո այն բուռն քննադատության արժանացավ հարսարակության շրջանում:

ՀՀ ԱԺ Տնտեսական հարցերի մշտական հանձնաժողովի նախագահ Խոսրով Հարությունյանն, անդրադառնալով հասարակության մոտ առկա հոռետեսական գնահատականներին, Past.am-ի հետ զրույցում նշեց, որ իր կարծիքով գույները բավականին խտացված է: Հայաստանի տնտեսական ակտիվության մասին շրջանառվող իրեն հասած լուրերն այնքան էլ հոռետեսական չեն, որքան որ ինքն էր պատկերացնում:

«Օրերս մեր գործարար շրջանակներից մի բիզնեսմենի հետ էի զրուցում, ով Հայաստանում է իր գործունեությունը ծավալում: Նա ինձ հարցրեց, թե ես ինչպես եմ գնահատում ընդհանուր իրավիճակը: Պատասխանեցի. կարծում եմ` դժվարություններ ունենք, որոնք պետք է հաղթահարենք: Եվ ասացի, որ իրավիճակը գնահատում եմ միջին՝ բավարար: Գործարարը, որքան էլ ինձ համար զարմանալի էր, ասաց, որ ինձ հետ համաձայն չէ: Նա նույնիսկ բավարար գնահատեց իրավիճակը, նշելով, որ վերջին շրջանում շատ լուրջ տեղաշարժեր են եղել տարբեր բնագավառներում»,- ասաց Խ. Հարությունյանը:

Պատգամավորի փոխանցմամբ, բիզնեսմենի կողմից նման բարձր գնահատականը պայմանավորված է եղել Հայաստանի սահմանին գործընթացների պարզեցմամբ, որը հնարավորություն է տալիս ազատորեն թե՛ ապրանք ներմուծել և թե՛ արտահանել:

«Եվ ճիշտն ասած ինձ համար համոզիչ էին նրա ներկայացրած փաստարկները: Եվ այս պահին դժվարանում եմ ասել, թե իրականում որտեղից են ծնվում նման հոռետեսական տրամադրությունները: Ակնհայտ է չէ՞, որ, եթե հաշվի առնենք միայն զբոսաշրջիկների ընդգծված, ավելացած ներկա հոսքը, ապա որքան դրական հետևանքներ այն կարող է առաջացնել սպառողական շուկայում»,- ասաց Խ. Հարությունյանը:

Խոսելով ընդհանուր տնտեսական ակտիվության ցուցանիշների ու սպասելիքների մասին` նա նշեց, որ հրապարակված արդյունքների մի մասը պայմանավորված է զբոսաշրջիկների մեծ հոսքով, որը, մուլտիպլիկատիվ էֆեկտ առաջացնելով, բերել է տնտեսական աշխույժության: Եվ դա բնական է:

Ինչ վերաբերում է մի քանի ամսում աշխատատեղերի թվի զգալի աճ ապահովելուն, ապա դա պարզապես հնարավոր չէ:

«Իրավիճակն աստիճանաբար շտկվում է և, իմ կարծիքով, դրականն ակնհայտորեն ավելի շատ է, քան երբեմն ներկայացվում է»,- համոզված է ԱԺ Տնտեսական հարցերի մշտական հանձնաժողովի նախագահը:

Չհերքելով փաստը, որ զբոսաշրջությունը սեզոնային բնույթ ունի, նա նաև նշեց, որ միայն այն, որ Հայաստանն այս կարժ ընթացքում կարողացել է տեղ զբաղեցնել բազմաթիվ երկրների կողմից առաջարկվող զբոսաշրջային փաթեթներում ու քարտեզներում, արդեն իսկ խոսում է երկրում տեղի ունեցող դրական տեղաշարժերի ու առաջընթացի մասին:

«Պետք է նշել, որ ոչ միայն զբոսաշրջիկների թիվն է ավելացել, այլ աշխարհագրությունն է բավականին մեծացել: Եվ Հայաստանն արդեն երևում է զբոսաշրջային քարտեզի վրա, հետաքրքրություն է ներկայացնում, ինչն արդեն իսկ դրական տեղաշարժ է: Այսինքն, դրական տեղաշարժեր կան, իսկ զբոսաշրջության ոլորտը տնտեսության լոկոմոտիվներից մեկն է: Ինչ վերաբերում է աշխատատեղերի ստեղծմանը, ապա իհարկե նման խնդիր կա, բայց երբ խոսք է գնում խոշոր ընկերություններ հիմնելու մասին, ապա հարկ է նշել, որ այն մեկ-երկու կամ մի քանի ամսում հնարավոր չէ իրականացնել: Կարծում եք, օրինակ՝ 500 աշխատատեղ ենթադրող ձեռնարկությունը կարելի է 3 ամսում կամ մի քանի ամսում հիմնե՞լ: Իհարկե՝ ոչ: Հետևաբար, խոսքը գնում է մեկնարկի, ոչ թե անմիջապես աշխատատեղ բացելու մասին: Այսինքն, դրական դինամիկայի սպասման կոնտեքստում շատ էական է, որ ծրագրերը, որի մասին խոսում է կառավարությունը, քայլ առ քայլ սկսեն մեկնարկել: Ու չնայած այս պահին աշխատատեղերի կտրուկ աճ չկա, բայց մենք ունենք նախադրյալներ, որոնք դրական սպասելիքներ են ձևավորում շոշափելի ապագայի համար»,- ասաց Խ. Հարությունյանը:

Արմինե Գրիգորյան