Նոր Կյանքի համայնքապետը` նախկին իշխանությունների չարաշահումների և կեղծիքների մասին

«Քաղաքացիական պայմանագիր» կուսակցության անդամ, Նոր Կյանքի համայնքապետ Գարիկ Սարգսյանն այսօր լրագրողների հայտնեց, որ դատական գործընթաց է սկսում՝ ընդդեմ համայնքի ավագանու նախկին որոշումների։ Նա կարծում է, որ 2000-2016 թվականներին համայնքում տեղի են ունեցել չարաշահումներ: Գարիկ Սարգսյանի փաստաբան Ռուստամ Բադասյանը կասկածում, որ համայնքի մանկապարտեզի հետ կապված որոշումներում ավագանու անդամների ստորագրությունները կեղծված են:

«Ավագանու արձանագրություններում, որոնք կազմված են 2000- ից մինչև 2016 թվականների կեսերը, կեղծիքներ կան: Ներկա ավագանու անդամներից մի քանիսն աշխատել են նաև նախկին ավագանու կազմում: 2016 թվականի նոյեմբեր ամսից հետո, ավագանու արձանագրություններում, նույն անձանց դրված ստորագրություններն ակնհայտորեն տարբեր են:

Ավագանու անդամներից մեկը, ով նաև նախկին ավագանու կազմում է եղել, փաստաբանական հարցմանն ի պատասխան, հաստատել է , որ 2016 թվականի նոյեմբերից առաջ լազմված մի շարք արձանագրություններում ստորագրություններն իրենը չէ»,- ասաց նա: Բադասյանը նաև նշեց, որ 2013 -2015 թվականների նոյեմբերին մանկապարտեզը չի աշխատել, սակայն առկա է աշխատավարձի ցուցակ կոչվող փաստաթուղթը: «Աշխատավարձի ցուցակում կոչվող նշված է, որ աշխատավարձները վճարվել է ու պահվել նաև եկամտային հարկ:

Մանկապարտեզի աշխատակիցներից մեկը, փաստաբանական հարցմանն ի պատասխան, հաստատել է, որ ինքն աշխատավարձ չի ստացել, իսկ իր անվան դիմաց դրված ստորագրությունը կեղծված է»,- հավելեց նա: Ասուլիսի բանախոսները տեղեկացրեցին, որ Ոստիկանություն հաղորդում են տվել՝ յուրացման և պաշտոնական լիազորությունները չարաշահելու համար, ինչպես նաև երկու քաղաքացիական հայց են ներկայացրել՝ կապված արձանագրություններից մեկի հիման վրա համայնքային սեփականություն հանդիսացող հողատարածքները նախկին համայնքապետի ընտանիքի անդամներին օտարելու հետ կապված: Հիշեցնենք, որ Գարիկ Սարգսյանը Նոր կյանքի գյուղապետ է ընտրվել անցյալ տարվա սեպտեմբերին:

Լևոն Փանոսյան