Մի խառնվեք քաղաքականությանը

Զբաղվեք ձեր կյանքով, բայց քաղաքականությանը մի՛ խառնվեք: Այսպես կարելի է ձևակերպել իշխանության ամփոփ ուղերձը հասարակությանը: Վերջին պառլամենտական ընտրություններն այս լուռ լոզունգի դրսևորումն էին և կարծես թե տեղ են հասել ՝ հասարակական ապատիայի տեսքով: Ուղերձի ամբողջ դրամատիզմը կայանում է նրանում, որ փոխելով սահմանադրությունն ու ընտրական օրենսգիրքը, իշխանությունը կարողացավ ընտրությունների օրը համեմատաբար առանց մեծ սկանդալների և բախումների վերարտադրվել: Այսինքն, հիմնական կեղծիքը եղավ ոչ թե ընտրության օրը, ընտրատեղամասում կամ դրանից դուրս, այլ սահմանադրական և ընտրական օրենսգքրի փոփոխություններով:

Ռեյտինգային համակարգն ընտրական ֆարսի մասնակից դարձրեց հնարավորինս շատ քաղաքացիների՝ ոչ միայն որպես ընտրողներ, այլև որպես քարոզիչներ ու ձայն բերողներ: Բուն ընտրական գործընթացի համեմատաբար հանգիստ ընթացքը զերծ պահեց հետընտրական գործընթացներից: Սրան եթե գումարենք

«ԵԼՔ»-ի կողմից, որպես խորհրդարան անցած միակ ընդդիմության, ընտրությունների արդյունքները ճանաչելւը, ապա ունենք մի իրավիճակ, երբ քաղաքացին լիովին օտարվեց քաղաքականությունից:

Քաղաքացու չօտարման միակ տարբերակը հետընտրական գործընթացներն էին, որն ինչպես հարցազրույցներից մեկում ուրախությամբ նշեց Սերժ Սարգսյանը, տեղի չունեցավ: Եվ դա շատ կարևոր արդյունք էր նրա համար: Հենց սրա համար էր փոխվում քաղաքականությունը, որպեսզի ՀՀ քաղաքացին դադարի մասնակցել քաղաքական գործընթացներին՝  իրեն հայտնի ձևերով:

Փոփոխության դրսևորում էր նաև ՀՀԿ նոր կազմը, որտեղ զետեղվեցին Սերժ Սարգսյանի անձնական որոշումներին իրենց կարիերայով պարտական հանրապետականների երիտասարդ կադրերը: Իսկ

«Սասնա ծռեր»-ի գործողությունների ապաքաղաքականացմանն ուղղված քարոզչությունն էլ նպատակ ունի ավելի ամրապնդել այդ ուղերձը, փաստացի քաղաքական ճեղքման վերջին տարբերակը ևս զինաթափելով հասարակության աչքերում:

Հասարակության ապաքաղաքականացման և օտարման ստրատեգիան մեկ նպատակ ունի ՝ իշխելու համար ստեղծել հնարավորինս անվտանգ միջավայր: Միայն հայտնի չէ, թե այդ օտարումն ու դրա հետևանք ապատիան ինչպես են տրանֆորմացվելու՝ արտագաղթո՞վ, թե՞ հերթական ռադիկալ ցնցմամբ: 

Արտակ Ասլանյան