Վարչապետը խոստացել է վաղը այցելել Արագածավան համայնք (ֆոտո)

Past.am-ը երեկ տեղեկացրել էր, որ Թալինի տարածաշրջանի Արագածավան համայնքի բնակիչներն, ի նշան բողոքի, պատրաստվում են փակել միջպետական ավտոմայրուղին: Մեր անդրադարձից հետո գյուղացիներին համոզել են, որ նման ակցիա չկազմակերպեն, քանի որ վաղը ՀՀ վարչապետ Կարեն Կարապետյանը այցելելու է Արագածոտնի մարզ և հանդիպելու է բոլոր համայնքապետերի հետ:

Ընդհանրապես, ջրի խնդիրը ոչ թե համայնքի սովորական, այլ՝ գերխնդիր է արագածավանցիների մարզի համար: Ղեկավարները նրանց հիշում են միայն ընտրություններից ընտրություն, խոստումներ են տալիս, ձայներ փախցնում ու մոռանում համայնքի խնդիրներն էլ, մարդկանց էլ:

Past.am-ի հետ զրույցում Արագածավանի համայնքապետ Անդրանիկ Պապիկյանն ասաց, որ նախորդ օրը գյուղի տեսուչը երկու հոգու հետ եկել ՝ ժողովրդին համոզելու, որ չակտիվանան, բայց, մինչև իրենց գալը, նրան հաջողվել էր փոքր ինչ հանդարտեցնել բնակիչներին:

«Վարչապետն ինչից է տեղյակ, որ մեր գյուղի հոգսերից տեղյակ լինի: Տեղակալները գնում են, ինչ ուզում ասում են: Իրականում վիճակն այնպիսին է. մինչ օրս որևէ մեկը, երբեք,որևէ հարցով ուշադրություն չի դարձրել մեր համայնքին: Իմ տեղեկություններով՝ վաղը սպասվում է վարչապետի այց մարզպետարան: Հարցը կբարձրացնենք վարչապետի հետ հանդիպման ժամանակ, թող իրենք որոշեն, թե ինչ են անում»,-ասաց Ա. Պապիկյանը:

Արագածավանի համայնքապետը տեղեկացրեց նաև, որ ինքն ավելի վաղ ջրամատակարարման խնդրի մասին տեղեկացրել է նաև Արագածոտնի մարզպետին, նա էլ խոստացել է կառավարությունում հարց բարձրացնել:

Ա.Պապիկյանը, սակայն, բոլորովին հույս չունի, որ ջրի հարցը կլուծվի:

«Ես 20 տարի է գյուղապետ եմ և դեռ չեմ տեսել, որ իշխանությունները մի բան ասեն ու իրենց խոստումը կատարեն: Միայն տեսել եմ, որ ոչինչ էլ չեն անում: Քանի անգամ պիտի խաբեն, որ ես հասկանամ, որ խաբում են: Ամեն տարի էլ կարկուտ է գալիս, բայց երբեք չի եղել, որ կարկտահարությունից կամ ցրտահարությունից տուժածներին օգնություն տան: Ջրային տնտեսությունն ասում է փողերը տվեք՝ ջրեք, բայց հիմա արդեն այն աստիճանի ենք հասել, որ եթե փողը տալիս ենք, էլի ջուր չեն տալիս»,- ասաց Ա. Պապիկյանը:

Ի դեպ, այս համայնքին ոռոջման ջրով ապահովում է «Թալին ՋՕ» ընկերությունը: 1 հեկտար հողը մեկ անգամ ջրելու համար գյուղացիները վճարում են 35-ից 40 հազար դրամ: Նորմալ բերք ստանալու համար սեզոնի ընթացքում հարակվոր է հողը 6-ից 7 անգամ ջրել, սակայն արագածավանցիներին բաժին հասած ջուրն այնքան է, որ կռվով-դավով ընդամենը կարողանում են մի անգամ ջրել իրենց հողը, իսկ երկրորդ անգամ ջրել հաջողվում է միայն ճարպիկներին:

Համայնքապետին ամենաշատը վրդովեցնում է այն, որ ղեկավարներից ոչ մեկն էլ երբեք պատասխանատվության զգացում չի ունեցել հողի աշխատավորի նկատմամբ: Դրա պատճառով էլ շատերը թողնում են իրենց հարազատ օջախն ու գյուղը և արտագաղթում:

«Ինձ համար ամենամեծ խնդիրը արտագաղթն է: Մայիս ամսից մինչև հիմա արդեն 27 երեխայի հանել են նախակրթարանից ու ընտանիքով գյուղից գնացել են: Արագածավանը մարզի ամենամեծ գյուղն է, բայց գյուղի կեսն արդեն չկա»,- ասաց Ա. Պապիկյանը: Past.am-ի տեղեկություններով՝ Արագածավան այցելած աձինք վարչապետի կողմից են եղել և համայնքի բնակիչներին տեղեկացրել են, որ Կ. Կարապետյանը այցելելու է Արագածավան՝ հատուկ համայնքի բնակիչների հետ հանդիպելու համար:

Past.am-ն ուշի ուշով հետևում է իրադարձությունների զարգացմանը և կարծում, որ վերջին 20 տարիներին լքված ու մոռացված արագածավանցիների խնդիրները կմղվեն առաջին պլան, և կառավարության ղեկավարն իր աչքով կտեսնի բերքատու այն այգիները, որոնք գյուղացիները բերքը ծառի վրա ստիպված կտրում են:

Արմինե Գրիգորյան