Ծռերի հերթական «փրփուրը»

Ապագաղութացման դիսկուրսը չմարսած, Սասնա ծռերը հիմա էլ սոցիալական բունտի այլ ֆորմաներ են որդեգրել ու, որպես նահանջի և, միաժամանակ, ելքի ճանապարհ, փորձում են իրացնել: Ֆեյսբուք սոցիալական ցանցում «Մենք ենք տերը մեր երկրի» նախաձեռնությունը «Դասադուլ և գործադուլ» անունը կրող միջոցառում է ստեղծել: Նախաձեռնությունն առաջարկում է սեպտեմբերի 1-ից դպրոցներում և բարձրագույն ուսումնական հաստատություններում դասադուլներ սկսել. ««Սասնա ծռեր» շարժման մաս են հատկապես երիտասարդները, ուսանողները և դպրոցականները, բոլոր աշխատող մարդիկ: Մենք պետք է սեպտեմբերի 1-ից կազմակերպված սկսենք դասադուլ և գործադուլ: Միայն կազմակերպված ակցիան կտա արդյունք»:

Սա ևս մեկ անգամ փաստում է, որ ծռերը իրատեսորեն չեն պատկերացնում իրենց հանրային ռեսուրսը: Այն, որ իրենց հանդեպ կա թեկուզև լայն, բայց կառուցվածքով պասիվ համակրանք հասարակության մեջ, ոչ թե իրենց գաղափարախոսության, քաղաքական ծրագրի կամ որդեգրած այլ դիսկուրսների հանդեպ հիացմունքից է, այլ քաղաքական լճացման պայմաններում ծռերի գործողությունը` որպես վերջին հույսի քայլ ընկալելուց: Եթե այդպես չլիներ, ծռերը կունենային ակտիվ ու ներգրավված համակիրներ` նախքան ՊՊԾ գունդ մտնելը , երբ տարիներ շարունակ 100-200 հոգանոց հանրահավաքներ ու երթեր էին անցկացնում: Ավելին, եթե համակրանքը լիներ ակտիվ, ապա ՊՊԾ գնդում կհայտնվեին այլ մարդիկ ևս, բացի Արթուր Սարգսյանից:

Ծռերի հանդեպ ողջ համակրանքը կառուցված է իշխող համակարգի հանդեպ հակակրանքի, ինչպես նաև որևէ բան փոխել չկարողանալու անելանելի վիճակի վրա: Լինեին ծռերի տեղում ուրիշները, ովքեր զենքով կգրոհեին պետական որևէ կառույց, հատկապես պետությունն առաջին դեմքով ներկայացնող ոստիկանական կառույց, նրանք էին հայտնվել համակրանքի կենտրոնում: Իսկ հիմա մենք պարզապես հետևում ենք, թե ինչպես ծռերի ու ոստիկանության պաշտոնական և ոչ պաշտոնական խոսնակները բանավիճում են ահաբեկիչ, թե ապստամբ թեմայի շուրջ: 

Հանրային ռեսուրսի սխալ գնահատմամբ էլ հիմա փորձ է արվում անօգուտ դասադուլներ կազմակերպել: Անվանումն իսկապես հնչեղ է: Կլինեն շատ պոպուլյար, օրինակների իմաստով էլ հարուստ ՝ բազմաթիվ երկրներում երիտասարդությունը դասադուլները որպես գործիք է օգտագործում քաղաքական հարցեր բարձրացնելու համար: Բայց իրականությունն այլ է, և ծռերը դրա հետ հաշվի նստել չեն ցանկանում:

Սարգիս Մեսրոպյան