Կրթական յուրօրինակ համակարգ ձևավորելու համար դպրոցը պետք է լուծի երեք կարևորագույն հիմնախնդիր. նախարար

 Կրթական յուրօրինակ համակարգ ձևավորելու համար դպրոցի առջև կա երեք կարևոր հիմնախնդիր: Այդ ուղղությամբ պետք է դպրոցներում բարձրացնել բնագիտական առարկաների որակը,  բարեփոխել կրթական ողջ համակարգը և սահմանել նոր հմտային դասաժամեր: «Արմենպրես»-ի հաղորդմամբ՝ օգոստոսի 30-ին Երևանի հանրակրթական ուսումնական հաստատությունների տնօրենների հետ օգոստոսյան խորհրդակցությանն այս մասին ասաց ՀՀ կրթության և գիտության նախարար Լևոն Մկրտչյանը:

«Առաջին վտանգը մեր կրթական համակարգի արագ կերպով հումանիտարիզացումն է:  Բակալավրիական կրթության մոտ 70 տոկոսը հումանիտար մասնագիտություններն են: Պետք է սկսենք դպրոցից՝ ապահովելով բնագիտական առարկաների դերի, որակի կտրուկ աճ: Պետք է վերանայվեն ժամաքանակները և չափորոշիչները»,-ասաց նախարարը:

Նրա խոսքով՝ կարևոր հիմնախնդիր է նաև կրթական կառուցվածքի բարեփոխումը  հատկապես բարձրագույն կրթության մեջ: «Հայաստանում ունենք  մոտ 90 000 ուսանող և ընդամենը 66 բուհ: Սա շատ վատ ցուցանիշ է, որը հարվածում է երկրի հեղինակությանը»,-ասաց նախարարն ու որպես խնդրի լուծում նշեց փոփոխությունների անհրաժեշտությունը դպրոցներում:

Պետք է փոխել հանրակրթության վերջին փուլի՝ ավագ դպրոցների և միջնակարգ դպրոցների վերջին երեք տարվա չափորոշիչներն ու նպատակը: Անհրաժեշտ է նաև բնապահպանական, քաղաքացիական, ձեռնարկատիրական, ֆինանսական կրթության համար  ձևավորել հմտային առարկաներ, դասաժամեր: Նախարարի խոսքով՝  այս ձևաչափն առանձնացնելու դեպքում կրթական մակարդակն արագ կբարձրանա:

«Կրթության ոլորտն այսօր ունի նաև որակի բարձրացման և նյութատեխնիակական բազայի վերականգնման խնդիր: Հատկապես հանրակրթական հաստատություններում հսկայական աշխատանք է կատարվել: Սակայն լաբորատոր սարքավորումների, շենքային պայմանների խնդիր ունենք մասնավորապես ավագ դպրոցներում»,-եզրափակեց նախարարը: