Տիգրանաշեն համայնքը կունենա խմելու ջրագիծ

Արարատի մարզի սահմանամերձ Տիգրանաշեն համայնքում, որտեղ տասնյակ տարիներ չի եղել խմելու ջրագիծ, և բնակիչներն օգտվել են լեռնային աղբյուրների ջրից, արդեն մեկ ամիս է մեկնարկել են 250 մ երկարությամբ խմելու ջրագծի անցկացման աշխատանքները: Ջրագիծը, որ սնվում է ձորում` լեռնային աղբյուրների կուտակված ջրից, բարձր լեռան լանջով պետք է հասնի համայնք եւ դպրոց: Շինարարական աշխատ անքների ընթացքում հունը քանդելիս շինարարները հանդիպել են ժայռերի, որոնք ճեղքելու համար հարկավոր է լրացուցից ներդրում, ինչը կտրամադրվի մարզպետարանի միջոցներից: Աշխատանքներ կտարվեն նաեւ պոմպը սնող մալուխը եւ խողովակաշարն ամբողջովին ծածկելու ուղղությամբ, որպեսզի ձմռանը չսառչեն:  

Տասնյակ տարիներ խմելու ջուր չունեցող գյուղին ջրով լիովին կապահովի 7 լ/վ հզորությամբ նոր ջրագիծը: Բացի այդ, մշտական ջրով կապահովվեն նաեւ դպրոցի նորակառույց ճաշարանը եւ սանհանգույցը: 

Դպրոցի տնօրեն Գեղամ Անդրեասյանն ասաց, որ վերոհիշյալ աշխատանքները, որոնք համայնքի համար կարեւրորագույն նշանակություն ունեն, զգալիորեն կկանխեն նաեւ արտագաղթը: Տնօրենն ավելացրեց նաեւ, որ շինարարական աշխատանքներն ավարտելուց հետո կկատարվի ջրագծի հանդիսավոր բացման արարողություն:

Արցախյան ազատամարտի ժամանակ ազերիներից ազատագրվեց նաեւ նախկին Քյարքի գյուղը, եւ նահատակ ազատամարտիկ Տիգրան Մելիքյանի անունով Քյարքին անվանակոչվեց Տիգրանաշեն: 50 տարի մեր պապենական հողերում ապրած նախկին բնակիչների մտքով չէր էլ անցել խմելու ջրագիծ անցկացնել: Նրանք մտածում էին, որ աղբյուրների ջուրն ավելի առողջարար է, եւ ջուրը բերում էին լեռնային աղբյուրներից` իրենց խոսքերով «չայլաղներից»: Վերաբնակեցումից հետո հայկական Տիգրանաշեն համայնքում կառուցվեցին բնակելի տներ, մանկապարտեզ, դպրոց: