Շուրջ 80 երևանաբնակ զինծառայողներ բարեխիղճ ծառայության համար արժանացել են խրախուսանքի

ՀԱՍԱՐԱԿՈՒԹՅՈՒՆ 23 Հոկտեմբեր, 2015 12:51

Հայաստանի հյուսիս-արևելյան զորամասերում մարտական հերթապահություն իրականացնող երևանաբնակ շուրջ 80 զինվոր, ովքեր աչքի են ընկել բարեխիղճ ու օրինակելի ծառայությամբ, խրախուսվել են 5-10-օրյա արձակուրդով:

Ինչպես այս մասին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, Պատանի հանդիսատեսի թատրոնում զինվորների և նրանց ծնողների հետ հանդիպել են ՀՀ ՊՆ 3-րդ բանակային կորպուսի հրամանատար, գեներալ-մայոր Օնիկ Գասպարյանը և Երևանի քաղաքապետի տեղակալ Դավիթ Օհանյանը: Հանդիպմանն ու այդ առիթով կազմակերպված հանդիսությանը ներկա են եղել նաև Երևան քաղաքի զինվորական կոմիսարները, ՀՀ ՊՆ բարձրաստիճան այլ զինվորականներ:

Երևանի քաղաքապետ Տարոն Մարգարյանի անունից ողջունելով ներկաներին՝ քաղաքապետի տեղակալ Դավիթ Օհանյանը շնորհակալություն է հայտնել ՀՀ ՊՆ 3-րդ բանակային կորպուսի հրամանատարությանը՝ նման հանդիպման պատրաստակամության համար: Դավիթ Օհանյանը հիշատակել է արցախյան հերոսամարտում, ինչպես նաև մարտական ծառայություն իրականացնելիս քաջաբար նահատակված հայորդիներին և ցավակցել նրանց ընտանիքներին: Քաղաքապետի տեղակալն այնուհետև նշել է, որ ավանդական դարձած այս, ինչպես նաև զինվորներին զորամասերում տեսակցելու նախաձեռնությունները լինելու են շարունակական: Դավիթ Օհանյանը վստահեցրել է, որ Երևանի քաղաքապետարանը նմանատիպ միջոցառումներով այսուհետ ևս շարունակելու է սատարել բանակ-հասարակություն կապի ամրապնդմանը:

ՀՀ ՊՆ 3-րդ բանակային կորպուսի հրամանատարն իր հերթին շնորհակալություն է հայտնել Երևանի քաղաքապետ Տարոն Մարգարյանին և քաղաքապետարանի ողջ անձնակազմին` ցուցաբերած մշտական աջակցության, տարբեր նախաձեռնություններ ու համատեղ ծրագրեր կյանքի կոչելու համար և վստահեցրել, որ մեր սահմանների պաշտպանությունը հուսալի ձեռքերում է նաև դահլիճում ներկա հերոսական ոգի ունեցող երևանցի զինվորների շնորհիվ: Վերջինս նաև երախտիքի խոսք է հղել զինծառայողների ծնողներին` հատկանշելով, որ սպայական կազմը յուրաքանչյուր զինվորի վերաբերվում է որպես սեփական զավÕ �կի: Առավել աչքի ընկած 15 զինվոր պարգևատրվել են Երևանի քաղաքապետի պատվոգրերով: Միջոցառումն ուղեկցվել է «Մարաթուկ» ազգագրական համույթի կատարումներով, զինվորական ինքնագործ խմբի ելույթներով: Հանդիսության ընթացքում ցուցադրվել է ՀՀ ՊՆ 3-րդ բանակային կորպուսի մասին պատմող վավերագրական ֆիլմ: Մարտական հերթապահության ընթացքում աչքի ընկած զինվորների ծնողները պարգևատրվել են շնորհակալագրերով: