«Եթե անցյալ անգամ երկրորդ տեղում էինք, այս անգամ թիմով կաշխատենք լինել առաջինը». Սոֆի Մխեյան

Շատ շուտով մեկնարկում է «Հայաստանի ձայնը» նախագծի չորրորդ եթերաշրջանը, որտեղ մարզչական աթոռին հեռուստադիտողը կտեսնի երգչուհի Սոֆի Մխեյանին, ով, ի դեպ, արդեն բավականին փորձառու է:

«Սա իմ երկրորդ փորձն է, ես ավելի ծանոթ եմ նախագծի նրբություններին, քայլեր կան, որոնք ավելի պարզ են ինձ համար, բայց երբեք չես կարող ասել՝ ինչ կլինի, ամեն դեպքում հաճելի է երկրորդ անգամ լինել նախագծում արդեն նոր կոլեգա-ընկերների հետ: Իհարկե, ինձանից վախենալ պետք չէ, բայց զգուշանալ պետք է»,- BlogNews.am-ի հետ զրույցում նշում է Սոֆին     

Նախորդ եթերաշրջանի ժամանակ Սոֆիի թիմի մասնակիցը հաղթանակից քիչ էր հեռու. ասում է՝ հիմա ամեն ինչ անելու է առաջին հորիզոնականում լինելու համար. «Երբ սկսվեց նախագիծը, բավականին շատ քննարկումներ եղան, բայց այդ քննադատությունների և քննարկումների լավ ապացույցը իմ մասնակցի՝ երկրորդ հորիզոնականում զբաղեցնելն էր: Ասեմ, որ Մաշայից չնչին տոկոսային հարաբերությամբ էինք հետ մնում, և իսկապես դա համարում եմ հաղթանակ: Իսկ հիմա ամեն ինչ պետք է անեմ հաղթելու համար։ Եթե անցյալ անգամ երկրորդն էինք, այս անգամ թիմով կաշխատենք լինել առաջինը»:

Սոֆին դժվարացավ ասել, թե մարզիչներից ով է իր հիմնական մրցակիցը. «Երեքն էլ նոր են այս աթոռին և մարզչական կարգավիճակում: Ես նրանց հետ ճանապարհ եմ անցել և անցնում որպես կոլեգա, բայց դժվարանում եմ ասել թե Արամեն, Նունեն, Սևակը ինչպես կդրսևորեն իրենց որպես մարզիչ: Նունեի տարիների փորձը, վստահ եմ, կտա իր արդյունքը, Արամեի հետ մենք կարծես թե սկսել ենք միաժամանակ, իսկ Սևակի հետ վերջերս եմ ծանոթացել, և նա էլ որպես մասնակից նման շատ մրցույթների է մասնակցել և արդեն որպես մարզիչ բավականին պատասխանատու է: Ես, իհարկե, ուշադիր և զգոն կլինեմ իմ բոլոր կոլեգաների նկատմամբ»,- եզրափակեց երգչուհին։