Ծառայակցին սպանելու մեջ մեղադրվողն ասել է՝ մեղքը Հովհաննեսի վրա է գցել պատասխանատվությունից խուսափելու համար

Արցախի դիրքերից մեկում, նախնական տվյալներով, ծառայակցի կողմից սպանված 19-ամյա ժամկետային զինծառայող Հովհաննես Հարությունյանի գործով դատական նիստին ընթերցվել է գործով ամբաստանյալ Միքայել Զաքարյանի նախաքննական ցուցմունքը, որի ժամանակ նա ասել է, որ ամբողջ մեղքը Հովհաննես Հարությունյանի վրա է գցել պատասխանատվությունից խուսափելու համար:

«Միքայլն 8 անգամ ցուցմունք է տվել եւ բոլորը մեկը մյուսից տարբեր են: Դատարանում մեղադրողն ընթերցեց նրա նախաքննական ցուցմունքը, որտեղ ինքը գրել է, որ մեղքը Հովոյի վրա է գցել պատասխանատվությունից խուսափելու համար: Ամեն մի ցուցմունքում Միքայելը տարբեր բաներ է ասել՝ մեղքն ամեն անգամ բարդել է ուրիշների վրա, որ խուսափի պատասխանատվությունից: Նա նախորդ նիստի ժամանակ ասաց, որ իր տված վերջին ցուցմունքը ճիշտ է, ըստ որի՝ զենքը Հովոյին է տվել, գնացել է զուգարան, հետ է եկել, վերցրել է զենքը, հեռացել է 1-1.5 մետր եւ սկսել են զրուցել միմյանց հետ, Հովոն անեկդոտ է պատմել, թե հետո ինչ է կատարվել, ոչ մի հարցի չի պատասխանում»,-NEWS.am-ի հետ զրույցում ասաց սպանված զինծառայողի իրավահաջորդ տիկին Լյուդան:

Նա նաեւ նշեց, որ ամբաստանյալ Միքայել Զաքարյանը հրաժարվել է պատասխանել դատախազի եւ իր հարցերին:

Ըստ մեղադրական եզրակացության` Միքայել Զաքարյանը վիճաբանության մեջ է մտել համածառայակից Հովհաննես Հարությունյանի հետ եւ ինքնաձիգով հանկարծակի դիտավորությամբ մեկ անգամ կրակել վերջինի վրա եւ սպանել: Բացի դրանից, վիճաբանության մեջ է մտել շարքային Սամվել Զեյնալյանի հետ, եւ բռունցքով մեկ անգամ հարվածել նրան: Սամվել Զեյնալյանը նույնպես բռնություն է գործադրել նրա նկատմամբ:

Միքայել Զաքարյանին մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 10-րդ կետով եւ 359-րդ հոդվածի 1-ին մասով, իսկ Սամվել Զեյնալյանին` 359-րդ հոդվածի 1-ին մասով: Միքայելը կալանավորված է, իսկ Սամվելի նկատմամբ խափանման միջոց է ընտրվել ստորագրություն չհեռանալու մասին:

Նշենք, որ Հովհաննես Հարությունյանի իրավահաջորդի շահերի պաշտպան Անի Չատինյանը ավելի վաղ մեզ հետ զրույցում հայտնել էր, որ փորձաքննության արդյունքներով ապացուցվում է, որ 19-ամյա զինծառայողին սպանելու մեջ մեղադրվող նրա ծառայակից 19-ամյա Միքայել Զաքարյանը մեղավոր է: Բացի այդ, փաստաբանի խոսքով, համալիր դատահոգեբանական, դատաբժշկական փորձաքննությունների համաձայն Միքայել Զաքարյանը մեղսունակ է ճանաչվել:

Միքայել Զաքարյանն իրեն առաջադրված մեղադրանքում մեղավոր չի ճանաչում: Նրա փաստաբանը՝ Էրիկ Բեգլարյանը նշել էր, որ Հովհաննեսը Միքայելի ինքնաձիգը կատակով փորձել է վերցնել եւ հենց այդ քաշքշոցի ժամանակ էլ արձակվել է մահացու կրակոցը:

Հիշեցնենք, որ Հովհաննես Հարությունյանը զոհվել էր մարտի 17-ին՝ ժամը 17:30-ի սահմանում, ՊԲ հարավային ուղղությամբ տեղակայված զորամասերից մեկի պահպանության տեղամասում: