Բյուրականի անտառները դեռ այրվում են

Սեպտեմբերի 3–ին ահազանգ էր ստացվել այն մասին, որ Արագածոտնի մարզի Բյուրական գյուղին հարակից անտառում հրդեհ է բռնկվել: Հրդեհը փորձել էին մեկուսացնել, սակայն արդեն չորրորդ օրվա դրությամբ այն չի մարվել և օրեցօր ավելի մեծ տարածքներ է ընդգրկում։ Վերջին տվյալներով ՝ հրդեհի նոր օջախներ են հայտնվել, որոնց մարումը բավական մեծ ջանքեր է պահանջում։

Ըստ ԱԻՆ լրատվական ծառայության հաղորդման՝ նախորդ օրերին Արագածոտնի մարզի Բյուրական գյուղի մերձակայքում բռնկված հրդեհի տարածքում տարվել են հրդեհաշիջման աշխատանքներ, որոնցում ներգրավվել է 157 հրշեջ–փրկարար։ Երեկ այդ աշխատանքներն իրականացվում էին 4 տեղամասով, որոնցում ներգրավված են եղել 12 մարտական հաշվարկ, 8 օժանդակ մեքենա, 157 փրկարար ծառայող, ինչպես նաև «Հայանտառ» ՊՈԱԿ–ի մարզային ստորաբաժանման աշխատակիցներ և Բյուրականի բնակիչներ: Հրդեհաշիջումն իրականացվել է ինչպես հրշեջ մեքենաների, այնպես էլ փոքր շարժական ջրատար սարքերի միջոցով:

Ըստ պաշտոնական տվյալների՝ այրված մակերեսը կազմում է 80 հա, թեև սա դեռևս վերջնական թիվ չենք կարող համարել։ Միայն հրդեհի ամբողջական մարումից և կրած վնասների գնահատումից հետո հնարավոր կլինի հասկանալ, թե որքան տարածք է զոհ գնացել կրակին։

«Հայանտառ» ՊՈԱԿ–ի մամուլի խոսնակ ԼուսինեՀակոբյանը Past.am-ի հետ զրույցում նշեց, որ օրեր առաջ բռնկված հրդեհը սկիզբ է առել Նազրվան գյուղի մոտակայքում և քամու հետևանքով տարածվել է ՝ ընդգրկելով հարակից տարածքները ։ Ավելի հստակ, հրդեհը բռնկվել է «Հայանտառ» ՊՈԱԿ–ի Արագածոտնի անտառտնտեսության մասնաճյուղի Բյուրական անտառպետությունում՝ Նազրվան գյուղի սկզբնամասում։

Ըստ մամուլի խոսնակի՝ սկզբնական փուլում որոշակիորեն հաջողվել է մարել կրակը, բայց քամու պատճառով նոր օջախներ են բռնկվել, և հրդեհը շարունակվել է տարածվել։

Նրա խոսքով՝ հրդեհի մարման աշխատանքներին մասնակցել են նաև Արագածոտնի մարզպետարանի, Աշտարակի քաղաքապետարանի համապատասխան աշխատակիցներ ու շրջակա բնակավայրերի բնակիչներ։

Լուսինեն նաև ասաց, թե այս պահին վնասի չափը հնարավոր չէ նշել, քանի որ հրդեհն ամբողջությամբ մեկուսացված չէ, և դեռ ևս ծխացող օջախներ կան։

Հրդեհն իր ճանապարհին այրել  է կաղնի և դրան ուղեկցող ծառատեսակներ՝ թխկի, հացենի և այլն։ «Կենսաբազմազանությանը պատճառված վերջնական վնասը չենք կարող ասել, որովհետև վեգետացիոն շրջան է լինելու, որից հետո նոր միայն պարզ կլինի»,– հավելեց նա։

Հարցին, թե հրդեհի բռնկման պատճառների հետ կապված նախնական վարկածներ կա՞ն, պատասխանեց՝ ոչ, քանի որ դեռ ուսումնասիրություններ պիտի տարվեն։

Երեկ շարունակվող Բյուրականի հրդեհը ևս մեկ անգամ ապացուցում է, որ անգամ 150–ից ավելի փրկարար–հրշեջների և դրան գումարած քաղաքացիական անձանց կամավոր օգնությունը հրդեհի մարման աշխատանքներում բավարար չէ։ Այստեղ անհրաժեշտ է ավելի մեծ ռեսուրսների ներդրում, որը չգիտես ինչու չի արվում։

Քրիստինա Տեր-Մաթևոսյան