Հայաստանում կզարգացնեն պարալիմպիկ մարզաձևեր

Կառավարությունն այս հինգշաբթի հավանության կարժանացնի Հայաստանում հաշմանդամային սպորտի զարգացման հայեցակարգը, որը մշակել է Սպորտի և երիտասարդության հարցերի նախարարությունը «Հաշմանդամային սպորտի հայկական ազգային ֆեդերացիա» հասարակական կազմակերպության աջակցությամբ:
Հայեցակարգի գաղափարական հիմքը հաշմանդամություն ունեցող անձանց՝ հասարակության մարզական կյանքին ամբողջապես ինտեգրման գործընթացի ապահովումն ու անհատի լիարժեք իրավունքներից օգտվելու հնարավորության ընձեռումն է, ինչը ամրագրված է միջազգային իրավական նորմատիվ ակտերում:
Ըստ առողջապահության համաշխարհային կազմակերպության տվյալների՝ երկրագնդի մոտավորապես 10%–ը հաշմանդամություն ունեցող անձինք են:

Ըստ Աշխատանքի և սոցիալական հարցերի նախարարության հրապարակած տվյալների՝ 2016 թ. հունիսի 30–ի դրությամբ հանրապետությունում հաշվառված են հաշմանդամություն ունեցող 202 հազար 839 անձինք, որը կազմում է բնակչության մոտ 7%–ը:
Ըստ նախագծի՝ երկրում գործող մարզադպրոցներից և ոչ մեկը չի համապատասխանում համընդհանուր դիզայնի պահանջներին. հարմարեցված չէ հաշմանդամություն ունեցող անձանց համար, նրանցից ոչ մեկը չունի հաշմանդամություն ունեցող պարապող երեխա կամ երեխաների խումբ:

Ծրագրով նախատեսվում է հաշմանդամային սպորտի բնագավառում համապատասխան մասնագետների առկայության ապահովում մինչև 2024 թ., ամառային և ձմեռային պարալիմպիկ, սուրդլիմպիկ խաղերի մասնակցության վարկանիշի ձեռքբերում` յուրաքանչյուր խաղին առնվազն մեկ վարկանիշի ձեռքբերում, հաշմանդամություն ունեցող անձանց մարզական ուղղվածության բարձրագույն ուսումնական հաստատություն ընդունվելու հնարավորության ընձեռում, ինչպես նաև մինչև 2024 թ. հաշմանդամային սպորտով զբաղվող համագործակից մարզական ակումբների և հասարակական կազմակերպությունների ցանցի ստեղծում։

Նախատեսվում է նաև առնվազն հինգ նոր պարալիմպիկ և սուրդլիմպիկ մարզաձևերի զարգացման ծրագրերի մշակում և մինչև 2024 թ. այդ մարզաձևերի տարածում Հայաստանի առնվազն հինգ մարզերում:

Ըստ նախագծի՝ հայեցակարգի ընդունումը և կիրարկումը հնարավորություն կտան լուծել Հայաստանում հաշմանդամային սպորտի իրավական դաշտին վերաբերող խնդիրները, կխթանեն հաշմանդամություն ունեցող խմբերի անձանց` հասարակությանը ինտեգրվելու գործընթացը` ապահովելով նրանց լիարժեք մասնակցությունը հասարակական կյանքի մարզական ոլորտին, կբարելավեն հաշմանդամություն ունեցող անձանց շրջանում բարոյահոգեբանական մթնոլորտը:

Հայեցակարգում ներկայացված խնդիրների լուծման շնորհիվ կապահովվի ֆիզիկական կուլտուրայի և սպորտի միջոցով հաշմանդամություն ունեցող անձանց սոցիալական ներառումը:

Հայեցակարգի մշակման հիմնական նպատակն է՝ Հայաստանի Հանրապետությունում հաշմանդամային սպորտի զարգացման, ֆիզիկական վարժություններով մշտապես զբաղվելու, առողջ կենսակերպի գաղափարի արմատավորման և տարածման, տարբեր խմբերի հաշմանդամություն ունեցող անձանց` հասարակությանն ինտեգրվելու գործընթացի խթանումը, հաշմանդամություն ունեցող անձանց մասնակցությունը բոլոր մակարդակներում անցկացվող մարզական միջոցառումներին, մարզական և առողջարարական գործունեության մեջ հաշմանդամություն ունեցող անձանց ներգրավվելու հնարավորություն ունենալուն նպաստելը, հաշմանդամություն ունեցող անձանց համար մարզական և առողջարարական վայրերի մատչելիության ապահովումը։