Թրամփի նոր հրամանագիրը իրարանցում է առաջացրել

ԱՄՆ նախագահ Դոնալդ Թրամփը երեքշաբթի օրը չեղյալ է հայտարարել էքս–նախագահ Բարաք Օբամայի DACA ծրագիրը, որով հինգ տարի առաջ հետաձգվել էր ավելի քան 750000 անօրինական միգրանտների արտաքսումը, որոնք ԱՄՆ են ժամանել մանուկ հասակում: «Կոնգրեսը վեց ամիս ունի DACA–ի օրինականացման համար: Եվ եթե այնտեղ չկարողանան, ես կվերադառնամ այդ հարցին»,– գրել էր Թրամփը Twitter–յան իր էջում: Հետաքրքիր է, որ այս որոշումը Թրամփից ավելի թրամփաբար է պաշտպանել երկրի գլխավոր դատախազ և Արդարադատության նախարար Ջեֆ Սեշընսը, որը հայտարարել է, թե Ամերիկան այլևս չի կարող ընդունել բոլոր նրանց, որոնք ցանկանում են ԱՄՆ–ում ապրել: Ավելին՝ Սեշընսը հավելել է, թե Օբամայի միակողմանի համաներումը, սահմանադրությանը հակասելուց զատ, պատճառ է դարձել հարավային սահմանների մոտ անչափահասների աճին, ինչը սոսկալի հումանիտար հետևանքներ է առաջացրել, մեծացրել է հանցագործությունների թիվը, ինչպես նաև՝ հարյուր հազարավոր ամերիկացիների անաշխատանք է թողել, թույլատրելով անլեգալներին գրավել այդ տեղերը։ Այսպիսով՝ Սեշընսը տեսակետ է հայտնել, թե չեղարկելով համաներումը՝ ԱՄՆ–ը պատշաճ կերպով է ուժի մեջ դնում առկա օրենքները

։ Ի դեպ, Կոնգրեսի Ներկայացուցչական պալատի դեմոկրատ փոքրամասնության ղեկավար Նենսի Փելոսին այս որոշումն արդեն իսկ քաղաքական վախկոտության ստոր ակտ է որակել։ Երկրի զանազան հատվածներում ծայր են առել բողոքի ցույցեր, իսկ կատարվածին երեկ անձամբ ԱՄՆ էքս–նախագահ Բարաք Օբաման է արձագանքել։ «Այդ երիտասարդներն իսկական ամերիկացիներ են, թեկուզ՝ ո՛չ թղթի վրա: Ծնողները նրանց մեր երկիր են բերել, երբ դեռ բոլորովին երեխա էին, և, հնարավոր է, որ նրանք ուրիշ որևէ երկրի մասին պարզապես չգիտեն և անգլերենից բացի՝ չեն տիրապետում մեկ այլ լեզվի։ Չի՛ կարելի այդ երիտասարդներին հարձակումների օբյեկտ դարձնել, նրանք ոչ մի վատ բան չեն արել»,– հայտարարել է Բարաք Օբաման, և այժմ, փաստորեն, խոսքը Կոնգրեսինն է։ Եթե Կոնգրեսին հաջողվի բեկանել նախագահի հրամանագիրը՝ լավ, եթե ոչ, ուրեմն, 2018 թ. մարտ ամսից սկսած՝ կսկսվի բաառապես ԱՄՆ–ին ինետեգրված և դե ֆակտո այդ հասարակությանը մաս կազմող հարյուր–հազարավոր երիտասարդների զանգվածային արտաքսումը Միացյալ Նահանգներից։
Էջը պատրաստեց Գոհար Սիմոնյանը