Հայաստանի առաջնության խամրող հմայքը

Հայաստանի ֆուտբոլի բարձրագույն խմբի 5-րդ տուրն ավարտվեց. սա նշանակում է, որ բոլոր 6 ակումբներն արդեն իրար մեջ առաջին հանդիպումներն անցկացրին: Առաջին հինգ տուրով դժվար է որոշել առաջատարներին ու հետնապահներին, հաշվի առնելով, որ թիմերը քիչ են, ու մի քանի հանդիպման արդյունքում միավորները կարող են այնպես փոխվել, որ վերջում ունենանք լրիվ արդյունք: Այդպես շատ է պատահել Հայաստանի առաջնությունում. առաջին շրջանի առաջատար՝ Շիրակն, օրինակ, անցյալ տարի երկրորդ շրջանը ձախողեց և գրավեց երրորդ հորիզոնականը:

Բայց այստեղ առավել կարևոր է ոչ թե չեմպիոնության հարցը, այլ առաջնության որակը: Ակնհայտ է, որ վեց թիմով առաջնությունը որակի դինամիկայի նվազում ունի: Միայն մյուս տարի հնարավոր կլինի բարձրագույն խումբը համալրել ևս երկու ակումբով ՝ Արցախով ու Լոռիով: Բայց 8 թիվն էլ հուսադրող չէ:

Հուսահատեցնող է նաև այն, որ եկող-գնացող լեգիոններներից բացի, Հայաստանի առաջնությունում քիչ են հայտնվում նոր, որակյալ ֆուտբոլիստներ: Հիմնականում նախորդ սերնդի ֆուտբոլիստներն են, ովքեր թիմից թիմ են տեղափոխվում: Եվ նույն տեղում դոփելու այս անվերջ շրջապտույտը որևէ առաջընթաց չի ապահովում: Պատահական չէր Շիրակի դարպասապահ Անատոլի Այվազովի կողմից հավաքականի հրավերը մերժելն ու փաստելը, որ 6 թիմով առաջնությունում շատ դժվար է առաջ գնալ ու զարգանալ: 

Հայաստանյան ֆուտբոլի մեկ այլ ծագող աստղ Վահան Բիչախչյանն էլ լքել է Շիրակն ու տեղափոխվել դրսի ակումբ, իսկ այլ, նոր ծագող անուններ այս պահին չկան, եղածներն էլ հասնում են ֆուտբոլային այն տարիքին, որ շուտով անցնելու են սպորտային թոշակի: Թերևս ժամանակն է գալիս, որ ակումբները ռիսկի դիմեն ու դաշտ մտցնեն երիտասարդ կադրերին ՝ սպասումով, որ նրանցից մի քանիսը նոր որակներ կբացահայտեն ու կհատնվեն արդեն հիմնական կազմում: 

Ակումբային ֆուտբոլի ճգնաժամը ակնհայտորեն ազդում է նաև հավաքականի վրա: Փաստացի արդեն ծերացող հավաքականը համալրվելու ռեսուրս չունի: Եվ անհայտ է՝ երբ Մխիթարյանն ու իր ընկերները լքեն ֆուտբոլը, ովքեր են համալրելու հավաքականը: Որովհետև նոր կադրեր չունենք նաև Հայաստանից դուրս և հույսը միայն սփյուռքում -յան ազգանունով ֆուտբոլիստ գտնելու վրա դնելը չի կարող երկարաժամկետ հարցեր լուծել:

Սարգիս Մեսրոպյան