Գեղարքունիքում անցկացվեց բարբառների մարզային փառատոն

 Արդեն 7 տարի է, ինչ Գեղարքունիքի մարզում անցկացվում է «Հայրենի եզերք» խորագիրը կրող բարբառների մարզային մրցույթ –փառատոնը: Ինչպես «Արմենպրես»-ին տեղեկացրեց Գեղարքունիքի մարզպետարանի աշխատակազմի կրթության, մշակույթի եւ սպորտի վարչության մշակույթի եւ սպորտի բաժնի վարիչ Գեղամ Չարվադարյանը, հերթական փառատոնն անցկացվեց Գավառ քաղաքի Հայրապետ Խաչատրյանի անվան արվեստի դպրոցի շենքում: Փառատոնին մասնակցեցին մրցույթի տարածքային փուլում հաղթած 33 լավագույն ասացողները: «Տարբեր տարիներին մեր մարզի ներկայացուցիչները մասնակցել են «Երկնքից երեք խնձոր ընկավ...» հեքիաթասացության հանրապետական փառատոնին եւ գրավել մրցանակային տեղեր: Փառատոնը նպատակ ունի՝ hայերենի տարբեր բարբառներով ու խոսվածքներով հնչեցնել բացառիկ արժեք ունեցող ժողովրդական բանահյուսության նմուշները եւ խրախուսել հեքիաթասացությունն՝ իբրեւ բանահյուսական նյութի մատուցման կարեւորագույն միջոց: 2017 թվականին եւս փառատոնն անցկացվեց երկու փուլով` տարածքային եւ մարզային: Տարածքային փուլին մասնակցեցին համայնքների բնակիչներ եւ հանրակրթական դպրոցների աշակերտներ: Նրանցից լավագույն 33-ը մասնակցեցին փառատոնի մարզային փուլին»,-ներկայացրեց Գեղամ Չարվադարյանը:

Փառատոնի մեկնարկից առաջ ՀՀ Գեղարքունիքի մարզպետարանի աշխատակազմի ղեկավար Սեւակ Խլղաթյանը Գեղարքունիքի մարզպետ Կարեն Բոթոյանի անունից Գեղարքունիքի մարզպետի շնորհակալագրերով եւ հուշանվերներով պարգեւատրեց 2017 թվականի ընթացքում անցկացված միջազգային մարզական ու մշակութային մրցույթ- փառատոններում մրցանակային տեղեր գրաված Սաթենիկ Սահակյանին, Ռազմիկ Աչիկյանին, Մարիաննա Բրսիկյանին, Էվելինա Առաքելյանին, Նորիկ Նազարյանին, Նարեկ Խանզադյանին, Նարեկ Գալեյանին , Մարի Դադոյանին, Մերի Դաշտոյանին, Հայկ Յազերյանին, Խաչիկ Գեւորգյանին, Լուսինե Չանդոյանին, Էրիկ Վարդանյանին, Անահիտ Աբրահամյանին եւ Գանձակ գյուղի երաժշտական դպրոցի պարի խմբին:

Պարգեւատրման արարողությունից հետո փառատոնի մասնակիցները կազմկոմիտեին կներկայացրին տարբեր բարբառներով համաշխարհային գանձարանից մեկ հեքիաթ կամ տարածքին բնորոշ պատմվածք: Բանահյուսական նյութերը ներկայացվեցին Բայազետի, Արցախի, Ալաշկերտի, Մուշի, Լոռու, Շիրակի, Շամշադինի բարբառներով ու խոսվածքներով: Ժյուրին գլխավորում էր Հրաչյա Աճառյանի անվան լեզվի ինստիտուտի տնօրեն Վիկտոր Կատվալյանը: Արդյունքների ամփոփումից հետո հաղթողներ ճանաչվեցին Կարմիգյուղի N1 միջնակարգ դպրոցի աշակերտ Ջուլիետա Ջրաղացպանյանը, Մարտունու մանկական ստեղծագործական կենտրոնի սան Ռուդիկ Մելքոնյանը եւ Գավառի N2 միջնակարգ դպրոցից՝ Ֆրիդա Ավետիսյան, Ժորա Բունիաթյան, Հասմիկ Ղասաբյան եռյակը: Փառատոնի բոլոր մասնակիցներին հանձնվեցին բուկլետներ՝ իրենց լուսանկարներով, հավաստագրեր եւ հուշանվերներ:

 

Խոսրով Խլղաթյան