Քննչական կոմիտեն սերտացնում է համագործակցությունը ամերիկացի գործընկերների հետ

ՀՀ քննչական կոմիտեում սեպտեմբերի 18-19-ը տեղի է ունեցել ՀՀ քննչական կոմիտեի և ԱՄՆ հետաքննության դաշնային բյուրոյի համատեղ վերապատրաստման դասընթացը՝ «Փոխադարձ իրավական օգնության հարցումներ և ակտիվների բռնագրավում» թեմայով: Այս մասին «Արմենպրես»-ին տեղեկացրին ՀՀ քննչական կոմիտեից՝ հավելելով. «Դասընթացին մասնակցել են ինչպես ՀՀ քննչական կոմիտեի ծառայողները, այնպես էլ` ՀՀ գլխավոր դատախազության, ՀՀ ոստիկանության «Ինտերպոլ»-ի ազգային կենտրոնական բյուրոյի, ՀՀ ոստիկանության կազմակերպված հանցավորության դեմ պայքարի գլխավոր վարչության շահագրգիռ ներկայացուցիչները:

ՀՀ քննչական կոմիտեի նախագահի տեղակալ Ա.Ղամբարյանը, ողջունելով դասընթացի մասնակիցներին, ընդգծել է վերապատրաստման գործնական կարևորությունը՝ փաստելով, որ վերջին տարիներին նկատվում է Քննչական կոմիտեի վարույթում քննվող քրեական գործերով ԱՄՆ իրավապահ մարմիններին ներկայացված իրավական օգնություն ցույց տալու մասին հարցումների աճ։ Նա շնորհակալություն է հայտնել ԱՄՆ արդարադատության դեպարտամենտի գործընկերներին ու անձամբ ԱՄՆ քննության դաշնային բյուրոյի տարածաշրջանային իրավական կցորդ տիկին Քեթլին Քեննինգին՝ միջոցառման կազմակերպման հարցում ներդրած անձնական մեծ ջանքների համար:

Դասընթացի շրջանակներում, ժամանակակից հանցավորության զարգացման միտումներով պայմանավորված, ԱՄՆ արդարադատության դեպարտամենտի իրավաբանները ներկայացրել են ԱՄՆ իրավապահ մարմիններին հասցեագրման ենթակա քրեական գործերով իրավական օգնություն ցույց տալու մասին հարցումներին ԱՄՆ օրենսդրությամբ առաջադրվող պահանջների շրջանակը, քննարկվել իրավական օգնությունն ապահովելու նպատակով իրականացվող վարույթային և այլ գործողությունների օպերատիվ կատարմանն առնչվող պրակտիկ խնդիրներ, այդ թվում՝ ԱՄՆ իրավապահ մարմինների կողմից հարցումների կատարման ժամկետները հնարավորինս կրճատելու հարցը: Արդյունքում` պայմանավորվածություն է ձեռք բերվել` ՀՀ քննչական կոմիտեի միջազգային հարցումների ապահովման բաժնի և ԱՄՆ արդարադատության դեպարտամենտի արտաքին կապերի գրասենյակի (OIA) միջև անհրաժեշտ դեպքերում անմիջական հաղորդակցություն իրականացնելու վերաբերյալ:

Միջոցառման ավարտին ԱՄՆ արդարադատության դեպարտամենտի և ԱՄՆ հետաքննության դաշնային բյուրոյի անունից մասնակիցներին հանձնվել են համապատասխան հավաստագրեր»: