Լավրովը Թիլերսոնի հանդիպումը ՌԴ շահերի՞ն է ծառայեցրել

Past.am.ՌԴ ԱԳ նախարար Սերգեյ Լավրովի և ԱՄՆ պետքարտուղար Ռեքս Թիլերսոնի՝ Նյու Յորքում կայացած հանդիպումը լայն արձագանք է գտել միջազգային մեդիայում: Ավելին, որքան էլ տարօրինակ հնչի, հանդիպմանը բավական պոզիտիվ երանգ է տրվել, այն էլ այնպիսի խնդիրների համատեքստում` ինչպիսին Ուկրաինան և Սիրիան են:

Չնայած վերջին շրջանում Մոսկվայում հաստատված հոռետեսական մթնոլորտին՝ այս հանդիպումը հուսավառել է նաև ռուսներին: Ռուսաստանի Դաշնության խորհրդի միջազգային կոմիտեի ղեկավար Կոնստանտին Կոսաչևն, օրինակ, երեկ հայտարարել է, որ Լավրով–Թիլերսոն հանդիպումը հույս է ներշնչում առ այն, որ ՄԱԿ–ի գլխավոր ասամբլեայում ՌԴ–ԱՄՆ երկխոսությունը կընթանա ոչ թե փոխադարձ մեղադրանքների, այլ կառուցողական մթնոլորտում: ՄԱԿ–ում ՌԴ մշտական ներկայացուցիչ Վալերի Նեբենզյան էլ ի՛ր հերթին է դրական գնահատել այն հանգամանքը, որ միջազգային օրակարգ թելադրող երկու երկրները մինչև գագաթնաժողովն են նման մասշտաբի հանդիպում նախաձեռնել՝ կոնկրետ ուկրաինական խնդրի դեպքում շեշտադրելով Մինսկի խմբի համաձայնությունների, այսինքն՝ խնդրի քաղաքական կարգավորման անհրաժեշտությունը:

Ի միջի այլոց, առաջին հայացքից կթվա, որ մեջտեղում մշտապես հնչած մտքերի սովորական փոխանակում է: Միևնույն ժամանակ ուշադիր աչքը կնկատի, որ կոնկրետ Մոսկվայում թեթև շունչ քաշելու այնպիսի ակնհայտ տրամադրություն է իշխում, որ տպավորություն է՝ Լավրով–Թիլերսոն հանդիպման արդյունքում ինչ–որ շատ մեծ առճակատման իրական հնարավորությունից է հաջողվել խուսափել:

Ինչից՝ դժվար է ասել, բայց դատելով Ուկրաինայի հարցով ԱՄՆ հատուկ ներկայացուցիչ Կուրտ Վոլկերի՝ մինչ այս հանդիպումը տված հարցազրույցի, ԱՄՆ–ն ՄԱԿ–ի գլխավոր ասամբլեայում պնդելու էր, որ ՄԱԿ–ի խաղաղապահների տեղակայումը միայն Դոնբասում բավարար չէ հրադադարի հաստատման և խնդրի քաղաքական կարգավորման օժանդակության համար: Ըստ այդմ, որոշվել է խաղաղապահներ տեղակայել նաև ռուս–ուկրաինական սահմանին և Ռուսաստանին ընդհանրապես բացառել ոչ միայն տեղադրվելիք կոնտինգենտի կազմից, այլև բուն պրոցեսից: «Քանի որ Ռուսաստանը ագրեսոր երկիր է, կարծում ենք, Ռուսաստանին անհրաժեշտ է բացառել խաղաղապահների կազմից: Այնպես որ, Վոլկերը ճշմարիտ է. եթե այդ երկիրը մասնակից դառնա այս առաքելությանը՝ ուղղակի կձախողի ամեն ինչ»,– հայտարարել է Ուկրաինայի ԱԳ նախարար Պավել Կլիմկինը:

Այնպես որ, եթե այս իրավիճակում Մոսկվայում արտասովոր խանդավառություն է տիրում, նշանակում է՝ Լավրովին հաջողվել է Թիլերսոնից հակառակ խոստումներ կորզել գոնե ուկրաինական օրակարգում: Ինչ վերաբերում է Սիրիային՝ ՄԱԿ–ի գագաթնաժողովը դժվար թե այս խնդրում ագրեսիվ տոնայնություն դրսևորի: Իհարկե, կգտնվեն այնպիսիք, որոնք հերթապահ հայտարարություններ կանեն Ասադի ու նրա ռեժիմի հետ կապված, բայց, վստահաբար, ՄԱԿ–ի գլխավոր ասամբլեան չի կարող չամրագրել իրերի իրական դրությունը՝ Ասադի օգտին դասավորված:

Էջը պատրաստեց Գոհար Սիմոնյանը