Ժիրայր Սեֆիլյանի լյուստրացիան

Ժիրայր Սեֆիլյանն այսօր Արմավիրի քրեակատարողական հիմնարկից հանդես է եկել հայտարարությամբ ՝ անվանական դիմելով մի շարք մարդկանց ՝ ստանձնելու Հայաստանի «փրկության» գործը: Նամակի բովանդակությունն ու անունների ցանկը ՝ այստեղ:

Հետաքրքրական է հատկապես անվանացանկը: Բնականաբար, նման դեպքերում լինում են նաև պատահական անուններ, անուններ, որոնք պարզապես հանրային լեգիտիմություն են վայելում, անուններ, որոնց նպատակն է ցույց տալ, թե ինչքան ազնիվ մղումներով է ցուցակը գրվել: Բայց բնականաբար կան նաև հիմնական անուններ, որոնք չնկատել չի կարելի. Նիկոլ Փաշինան, Սեյրան Օհանյան, Վարդան Օսկանյան, Սասուն Միքայելյան և այլն:

Պարզ է, որ անվանացանկում կարող էր հայտնվել ցանկացածը, ով, ըստ Սեֆիլյանի, կարող է օգտակար լինել իր նախաձեռնությանը: Ոչ ոք երաշխավորված չէ այդ ցուցակում հայտնվելուց: Բայց նաև պարզ է, որ կան դեպքեր, երբ անունները պատահական չեն: Օրինակ ՝ Սեյրան Օհանյանի և Վարդան Օսկանյանի դեպքում: Նրանք վերջերս ՕՐՕ դաշինքով մասնակցում էին ընտրությունների և իրենց քարոզչական գիծը մեծապես հենց ծռական դիսկուրսի վրա էին կառուցել: 

Կամ Նիկոլ Փաշինյանը, որ ակտիվ այցելում է ծռերի և հարակից գործով անցնողներին, անընդհատ ինտենսիվ կապի մեջ է նրանց հետ: Այստեղ կան նաև այլ անուններ, որոնք անցյալ տարվա հուլիսին ակտիվորեն ներգրավված էին Սասնա ծռերի գործողության վիրտուալ և փողոցային թմբկահարմանը: 

Ցուցակը բավական ներկայանալի է: Մնում է հասկանալ, ցուցակի ու հայտարարության հրապարակմանն ի՞նչ արձագանք կհետևի: Եվ արդյոք ցուցակի մաս կազմողները դիրքորոշում կհայտնեն, թե ոչ:

Արտակ Ասլանյան