Իսպանիան մասնատման շեմին է

Պաշտոնական Մադրիդը սարսափած է Կատալոնիայի վճռականությունից, որով այդ ինքնավար տարածաշրջանի ոչ միայն հասարակ ժողովուրդը, այլ հենց կառավարիչներն են տոգորված՝ անկախության հասնելու իրենց մտադրության մեջ: Իսպանալեզու մամուլի վկայությամբ՝ կենտրոնական իշխանությանը խիստ է մտահոգել այն հանգամանքը, որ ամենատարբեր սպառնալիքներ հնչեցնելուց և երկրի Սահմանադրական դատարանի՝ Կատալոնիայի անկախության հանրաքվեն անօրինական ճանաչելուց հետո անգամ, տեղի կառավարիչներն իրենք չփորձեցին երկխոսության մեջ մտնել Մադրիդի հետ, իսկ կատալոնցի 700 քաղաքապետերը մեկ մարդու նման բոյկոտեցին, այսպես կոչված, այն բացատրական զրույցները, որ Մադրիդն էր այս ընթացքում ձեռնարկել:

Արդյունքում, ինչպես հաճախ է պատահում, կենտրոնը խստացրեց իր դիրքորոշումը՝ Իսպանիայի քաղաքացիական գվարդիային հանձնարարելով խուզարկություններ իրականացնել Կատալոնիայի բոլոր այն նախարարություններում, որոնք ներգրավված են եղել հոկտեմբերի 1–ին սպասվող հանրաքվեն կազմակերպելու աշխատանքներում: Բայց անչափ մեծ եղավ հիասթափությունն այն բանից հետո, երբ մոտ 12 բարձրաստիճան պաշտոնյաների ձերբակալությունից և ոստիկանության՝ հատուկ ռեժիմի աշխատանքի անցնելուց հետո անգամ, իշխանությունները ստիպված եղան բախվել ոչ թե վախեցած ու տանը նստած, այլ փողոց դուրս եկած բազմահազար քաղաքացիների հետ, որոնք պահանջում էին ազատ արձակել իրենց պաշտոնյաներին: Ավելին՝ Բարսելոնայում բախումներ տեղի ունեցան ոստիկանների ու ցուցարարների միջև (ընդ որում՝ լրատվական գործակալությունները հաղորդեցին նոր ձերբակալվածների մասին), և չնայած երկրով մեկ իրականացվող իշխանական ագրեսիվ քարոզչությանն ու անհնազանդության չգնալու՝ կատալոնացիներին ուղղված հորդորներին, անմիջապես հաջորդ օրը՝ սեպտեմբերի 21–ին, շա՛տ ավելի մեծ թվով մարդիկ հավաքվեցին երկրի Գերագույն դատարանի շենքի մոտ՝ պահանջելով հրաժարվել Կատալոնիային ճնշելու մադրիդյան քաղաքականությունից: Ցույցերը, որ ընթացան ոչ միայն Բարսելոնում, արդեն իսկ «կաթսաների ցույց» անունն է ստացել, որովհետև մարդիկ կաթսաներով ու շերեփներով էին դուրս եկել փողոց: Եվ չնայած մարդիկ ընդամենը փորձել են կաթսաներին խփելով իրենց բողոքի ձայնը լսելի դարձնել Մադրիդի ու աշխարհի համար, կենտրոնական իշխանությանը սա շատ է զայրացրել: Պարզվում է՝ իսպանացիները ևս հայերիս նմանությամբ առած ունեն՝ երկու գլուխը մի կաթսայում եփելու անհնարինության վերաբերյալ, և Մադրիդն ահա, կաթսաների բողոքը հենց այս համատեքստում է ընկալել՝ հերթական անգամ սպառնալիքներ տեղալով ու մարդկանց գրգռելով:

Իսկապես. այնպիսի տպավորություն է, որՄադրիդն ի՛նքն ամեն բան արեց, որպեսզի նույնիսկ այն մարդիկ, որոնք դեռ երկմտում էին անկախության հարցում, սեփական դրոշներով դուրս գային փողոց և «Անկախություն Կատալոնիային» լոզունգներից զատ՝ «վե՛րջ օկուպանտներին» վերտառությամբ պաստառներ էլ բարձրացնեին, խոսելով իրենց տարրական իրավունքների ոտնահարման մասին: Բայց արի ու տես՝ Մադրիդում սա չեն ընկալում: Իսպանիայի վարչապետ Մարիանո Ռախոյը շարունակել է հոխորտալ՝ հենց Կատալոնիայի տեղական իշխանություններին մեղադրելով ծայրահեղականության ու անհնազանդության տարածման հարցում և այնպիսի բառամթերքով ու տոնայնությամբ, որ ոչ ոք չի զարմանա, եթե երկրով մեկ բռնությունների ալիք սկսվի: «Վերադարձ՛եք օրենքին և ժողովրդավարությանը: Մարդկանց հնարավորություն տվեք շրջել այս ճակատագրական էջը, նրանց համար նոր խնդիրներ մի ստեղծեք, թույլ տվեք, որ կատալոնցիներն ապրեն առանց ցնցումների, ճնշումների, վիճաբանությունների և վախի»,– հայտարարել է Ռախոյը՝ միաժամանակ արդարացնելով իսպանացի պաշտոնյաների ձերբակալություններն ու կառավարական ճնշումները: Սրան ի պատասխան՝ Կատալոնիայի վարչապետ Կարլես Պուջդեմոնթը դատապարտել է կենտրոնական իշխանությունների գործողությունները՝ հայտարարելով, որ Մադրիդի պահվածքը ևս մի անգամ այն մասին է վկայում, որ հոկտեմբերի 1–ին Կատալոնիայի անկախության հանրաքվեն անհրաժեշտություն է, և այն անպայմա՛ն է անցկացվելու: Ինչ վերաբերում է ժողովրդին՝ որոշված էր. սեպտեմբերի 22–ը Կատալոնիայում դարձյալ կաթսաներով բողոքի օր էր հայտարարվել: