Միթե՞ չենք կարող Հայաստանում գտնել 30-40 հոգի, որոնք անշահախնդիր կաշխատեն, առանց ատկատի. Հակոբ Ավետիքյան

Բոլոր ծրագրերը կմնան հայտարարությունների, ուղերձների ու բաղձանքների մակարդակում, եթե մենք գործնական՝ օրը օրին, ժամը ժամին աշխատող մի գրասենյակ չստեղծենք, որտեղ մի խումբ իրավաբաններ ու տնտեսագետներ կզբաղվեն սփյուռքի ներդրումները ապահով իրականացնելու գործընթացով. Tert.am-ի հետ զրույցում նման տեսակետ հայտնեց Հայաստանում գործող Ռամկավար Ազատական կուսակցության ատենապետ, «Ազգ» շաբաթաթերթի խմբագիր Հակոբ Ավետիքյանը:  

«Ինչ ուզում եք անունը դրեք՝ կարևոր չէ, կարևորը այդ գրասենյակն անշահախնդիր կերպով մարդկանց օգնի: Միթե՞ մենք չենք կարող Հայաստանում գտնել 30-40 հոգի, որոնք անշահախնդիր կաշխատեն, մանավանդ երիտասարդության մեջ: Կարող ենք գտնել չէ՞, միայն այդ պարագայում արդյունք կունենանք»,- ասաց նա՝ պատասխանելով հարցին, թե ինչ արդյունք ակնկալել Հայաստան-Սփյուռք 6-րդ համաժողովից:

Ըստ Հակոբ Ավետիքյանի՝ սփյուռքյան ներդրումների համար ամբողջական լիազորություններով օժտված գրասենյակը պետք է բացել Կառավարությանը կից, որը թույլ կտա սփյուռքահային Հայաստանում բիզնեսով զբաղվել: 

«Սրա փորձն այլ երկներ ունեն, յուրաքանչյուր բիզնեսի համար սկզբնավորման ծրագիր է  պետք, այսինքն՝ եթե ունենք նախապես գործող գործարան, կամ թեկուզ արտադրամաս, պետք է ունենանք հստակ պատկեր, թե դա ինչ վիճակում է գտնվում, նման քանի օբյեկտներ ունեն, որ շրջաններում,  ինչքան պարտք ու հնարավորություններ ունեն զարգանալու և այլն: Այս ամբողջը պատրաստ պետք է տրվի թղթածրարներով այն մարդկանց, ովքեր պատրաստվում են և սա պետք է պաշտպանվի, այսինքն՝ նկատի ունեմ նախ հարկային մարմիններ, որոնք երբեմն շատ կոպիտ են հարցին մոտենում, երկրորդը բանկեր՝ որոնք տալիս են վարկ, և եթե վարկը ուշանում է, խեղդվում են: Պետք է կանխել այս թերացումը»,-ասաց նա: 

Հակոբ Ավետիքյանի խոսքով՝ օրինակները շատ են: «Թեկուզ Սիրիայից այն մարդկանց, ովքեր բիզնեսներ են դրել, սակայն մեծ մասը չի արդարացրել իրեն,  որովհետև լավատեղյակ չեն ՀՀ օրենքներից, բիզնես են դրել Սիրիայի օրենքներով առաջնորդվելով, որը շատ ավելի առավելություններ ունի ի շահ բիզնեսի: Երկրոդը՝ դա այն, այսպես կոչված, «ատկատ» վերցնող կողմնակի միջամտությունն է: Այս ամբողջ սոված գայլերից պետք է ապահովված լինեն ներդրողները:  Եթե մենք կարողանանք մեկ–երկու տարի այսպես աշխատել, կփոխվի ընդհանուր կացությունն ու տրամադրվածությունը»,-ասաց նա:  

Հակոբ Ավետիքյանը Հայաստան-Սփյուռք 6-րդ համաժողովի արդյունք համարեց այն հայտարարությունը նախագահի կողմից, որ պետք է համահայկական խորհուրդ ստեղծվի: «Սա, կարծում եմ, գլխավոր արդյունքն էր, որը անհրաժեշտ է քննարկել հասարակական, քաղաքական շրջանակներում, առաջիկա օրերում այդ կազմվելիք մարմնի կանոնադրությունը, նպատակն ու ծրագրերը, այսինքն՝ նախագիծը պետք է ուշադրության հանձնվի համաժողովի  մասնակից տարբեր կազմակերպություններին, որպեսզի ժամանակ ունենան մինչև  առաջիկա մայիսի 28-ը քննարկելու, առաջարկներ անելու փոփոխությունների համար»,-ասաց նա: 

Բացի այդ, ըստ նրա, կարևոր էր ՀՀ-ում բիզնես սկսելու կոչը՝ հաջողված օրինակների հետևությամբ, թե որ պարագայում է, որ հաջողվում է: «Հետաքրքրական պարագա էր, որ Նախագահն անմիջապես կապեց  դա ներգաղթի հետ: Նշվեց, որ մենք արտագաղթի խնդիր ունենք և անհրաժեշտ է, որ մինչև 2040 թվականը առնվազն 4 մլն հայ լինի Հայաստանում, և քանի որ դա բնական աճի տեմպերով ներկայիս դժվար է ապահովել, շեշտադրումը կատարեց դեպի ներգաղթի կազմակերպումը: Այդ ներգաղթի հիմքը, շարժիչ ուժը պետք է դառնա բիզնեսի՝ մեծ, միջին, մանր, Հայաստան տեղափոխումը, հատկապես երիտասարդ  մասնագետների, գործարաների միջոցով»,-ասաց նա: 

Մինչդեռ, ըստ Հակոբ Ավետիքյանի, համաժողովի մեսիջների մեջ բացակայում էր այն  մոտեցումը, թե ինչ պետք է անել, որ ՀՀ-ից արտագաղթ չլինի: «Շարունակվող արտագաղթի պարագայում ներգաղթը շատ ավելի դժվար կլինի, հետևաբար ինձ թվում է այդ մասը բաց մնաց»,-ասաց նա: