Բաքվի հետ «առարկայական» բանակցելն արդեն անլրջություն է

Նյու Յորքում Գլխավոր ասամբլեայի շրջանակում Հայաստանի եւ Ադրբեջանի արտաքին գործերի նախարարներն առանձին հանդիպումներ են ունեցել ԵԱՀԿ Մինսկի խմբի համանախագահների հետ:

 

Ադրբեջանական լրատվամիջոցները նշում են, որ Էլմար Մամեդյարովի հետ հանդիպումը տեւել է ընդամենը կես ժամ: Հայաստանի ԱԳՆ հաղորդագրությունում նշված է, որ «հանդիպմանը մտքեր փոխանակվեցին ղարաբաղյան հիմնախնդրի բացառապես խաղաղ կարգավորման գործընթացի առաջմղման համար բարենպաստ պայմանների ստեղծման ուղղությամբ անհրաժեշտ քայլերի շուրջ»:

 

Այսօր կկայանա Հայաստանի եւ Ադրբեջանի արտաքին գործերի նախարարների հանդիպումը: Էդվարդ Նալբանդյանը հայտարարել է, որ քննարկելու են նախագահների հանդիպումը եւ համանախագահների տարածաշրջան այցի ժամկետները: Մամեդյարովն էլ հակադարձել է, որ խոսելու է առարկայական բանակցությունների մասին:

 

Հայաստանն Ադրբեջանի հետ «առարկայական» բանակցելու որեւէ պատճառ չունի: Չկա բացահայտ միջազգային ճնշում, չկան ներքաղաքական ու այլ դրդապատճառներ: Եթե Հայաստանը գնա «առարկայական բանակցությունների», նշանակում է, որ երրորդ երկրներից քողարկված ճնշում կա:

 

Նախքան Նյու Յորք մեկնելը Նալբանդյանը հայտարարել է, որ կարող են «Ղարաբաղի անվտանգությանը սպառնալիք չներկայացնող» տարածքներ հանձնելու հետ կապված հարցեր քննարկվել: Ավելի ուշ Նալբանդյանը նշել է, որ իր բառերը կտրվել են համատեքստից: Նա ասել է, որ քանի դեռ Բաքուն համաձայնություն չի տվել կարգավիճակի հարցին, «ածանցյալ» հարցերը չեն քննարկվելու:

 

Նալբանդյանի հայտարարությունը հերքել է նաեւ նրա տեղակալ Շավարշ Քոչարյանը, ով ասել է, որ ոչ ոք չի պատրաստվում որեւէ բան հանձնել: Գլխավոր շտաբի պետ Մովսես Հակոբյանն անգամ հայտարարել է, որ Արցախի անվտանգությունը լավագույնս ապահովելու համար նոր տարածքներ են պետք: Նյու Յորքում հայկական կողմը, հավանաբար, որոշակի երաշխիքներ է ստացել, որ միջազգային հանրությունը տարածքային զիջումներ չի պահանջելու:

 

Հայաստանի Անկախության օրվա կապակցությամբ շնորհավորական ուղերձներում ԱՄՆ նախագահ Թրամփը եւ պետքարտուղար Թիլերսոնը հայտարարել են, որ Հայաստանն ապահովում է «տարածաշրջանային անվտանգությունը»: Դիվանագիտությունում դա կարելի է որակել որպես երաշխիք, որ ԱՄՆ-ն շահագրգռված չէ Ղարաբաղում ստատուս-քվոյի փոփոխությամբ եւ դա համարում է տարածաշրջանային կայունության տարր:

 

Ադրբեջանում նույնպես խոստովանել են, որ միջազգային հանրության վերաբերմունքն այդպիսին է՝ դա որակելով «երկակի ստանդարտներ»: Իլհամ Ալիեւը բացահայտ դժգոհություն է հայտնել, որ աշխարհում չեն ճանաչում Ադրբեջանի տարածքային ամբողջականությունը: Ավելին, անգամ Ռուսաստանը չի պնդում կազանյան եւ այլ ծրագրերը: Նյու Յորքում Լավրովն ու Նալբանդյանը քննարկել են միայն երկկողմ հարաբերությունները, իսկ Հայաստանի Անկախության օրվա առթիվ Պուտինի շնորհավորանքում Ղարաբաղն ընդհանրապես չի հիշատակվում:

 

Այդ քաղաքականության, ինչպես նաեւ մեկը մյուսին հաջորդող միջազգային սկանդալի պատճառով Ալիեւի դրությունը գնալով ավելի երերուն է դառնում: Այսօր Բաքվում տեղի է ունենում ընդդիմության հանրահավաքը, որը կազմակերպել են Ադրբեջանի ազգային ճակատը եւ Ալի Քերիմլին: Երեկ էլ տեղեկություններ տարածվեցին, որ Ալիեւը բանտից ազատել է իր գլխավոր հակառակորդ Իլգար Մամադովին: Նշվում էր, որ Եվրամիությունն իբր մտադիր է Ադրբեջանի դեմ պատժամիջոցներ ընդունել, եթե Մամադովն ազատ չարձակվի:

 

Այս ֆոնին Նալբանդյանի եւ Մամեդյարովի հանդիպումը չի կարող «առարկայական» լինել, դա արդեն անլուրջ կլինի: Եթե այս պայմաններում հայկական կողմը բանակցի զիջումների եւ փոխզիջուների շուրջ, նշանակում է, որ Երեւանը ոչ թե իր, այլ երրորդ երկրների շահերն է պաշտպանում: