Սև ու սպիտակ

Past.am-ը  տեղեկացնում է.

Արմավիրի մարզի Մեծամորի թիվ 1 դպրոցի տնօրենը բացարձակ ճերմակ վերնաշապիկ չկրելու համար աշակերտին տուն է ուղարկել ու պահանջել դպրոց ներկայանալ միայն սպիտակ վերնաշապիկով: Այս մասին ահազանգել է Երևանի ավագանու «Ելք» խմբակցության անդամ Անահիտ Բախշյանը ու նաև լուսանկար հրապարակել (աշակերտի դեմքը լուսանկարում չկա): Բացի այդ՝ նույն դպրոցի մի ծնող հայտնել է, որ դպրոցի զուգարանի վրա կողպեք է դրված: Խնդրի շուրջ խոսեցինք Արմավիրի մարզպետարանի կրթության, մշակույթի և սպորտի վարչության պետ Գայանե Սայադյանի հետ:

– Տիկին Սայադյան, մարզպետարանը տեղյա՞կ է խնդրից:

– Ես տնօրենի հետ խոսել եմ՝ նման բան չկա: Իրենք նախորդ շաբաթ ծնողական և ծնողկոմիտեի ժողովներ են արել և զգուշացրել, որ երեխաները դպրոց գան սպիտակ վերնաշապիկով ու սև շալվարով: Նրանք, ովքեր չեն եկել՝ զգուշացվել են: Բայց որ երեխա հանեն դպրոցից, նման բան չկա ու չի էլ եղել: Բացի այդ՝ տնօրենն ասաց, որ սոցիալական ցանցերում տարածվող նկարներում մեր դպրոցի աշակերտները չեն:

– Բայց ինչպե՞ս եք հասկացել, որ ձեր աշակերտը չէ, եթե նկարում երեխայի դեմքը չկա:

– Միգուցե՞ շորից է ճանաչել՝ չգիտեմ: Ամեն դեպքում ասաց՝ մենք ո՞նց կարող է երեխային դպրոցից դուրս հանենք ու տուն ուղարկենք: Պարզապես զգուշացրել են, որ ցանկալի է վաղը սպիտակ վերնաշապիկով գա դպրոց: Իսկ նրանք, ովքեր չունեն սպիտակ վերնաշապիկ ունենալու հնարավորություն, մենք օգտակար ենք լինում: Դպրոցը կարողանում է այդ վերնաշապիկների հարցը լուծել: Ոչ շոր են կարել տալիս, ոչ որևէ բան են անում՝ պարզապես թող սև ու սպիտակ հագնեն: Եթե ծնողը պետք է գումար տա ու շոր գնի, թող սպիտակ վերնաշապիկ գնի, և ոչ թե կապույտ ու կանաչ:

– Կրթության որակի վրա վերնաշապի գույնը որքանո՞վ է ազդում: Միգուցե կարելի է աշակերտներին ազատ թողնել՝ առաջին տեղում դնելով կրթության որակը:

– Ես հարցին այսպես եմ նայում: Ճիշտն ասած՝ սովետական ժամանակաշրջանի դպրոց եմ հաճախել: Բոլորս համատարած դպրոցական ֆորմաներ ենք հագել, որն աչք է շոյել: Ես դա ընդունում եմ: Իսկ ինչ վերաբերում է ազատ թողնելուն՝ ազատ է թողնված, առավել ևս՝ ձմռանը: Պարզապես կարող է լինել մի երեխա, ով կարող է 50 հազար դրամանոց վերնաշապիկ հագնել, բայց սպիտակ վերնաշապիկ՝ ոչ:

Կան նաև երեխաներ, որոնք թեև սոցիալական խնդիր ունեն, այդ սպիտակ վերնաշապիկը մի կերպ կհագնեն: Նրանք, ովքեր սոցիալական խնդիր ունեն, ավելի լավ են կատարում այդ ամենը, քան նրանք, ովքեր տասը հատ սպիտակ վերնաշապիկ ունենալու հնարավորություն ունեն: Վերջապես դպրոցի կանոնակարգում կա, դաստիարակչական հարց է՝ ցանկալի է, որ երեխան դպրոց գա սպիտակով ու սևով: Ուրիշ ոչինչ իրենից չի պահանջվում: Դպրոցը 1300 աշակերտ ունի, հիմա թող 50–ը կամ 100–ը շեղվեն, չհագնեն, բայց կարևորը՝ 1200–ը կհագնեն: Եթե աշակերտին դուրս հանեին, կողմ կլինեի, որ տնօրենին պատժեինք: Բայց հավատացած եմ՝ այդ տնօրենը նման բան չէր անի:

– Իսկ դպրոցի զուգարանի վրա ինչո՞ւ է կողպեք է դրվել:

– Շուրջ 15–20 տարի է՝ երկրորդ հարկի զուգարաններից մեկը խցանված է: Ներսում խնդիր կա՝ չեն կարողանում բացել: Բայց դպրոցի 9 զուգարանները գործում են, 10–րդն է միայն, որ 20 տարի է՝ փակ է: Դա նորություն չէ: Այն շատ կարևոր շինարարական թերություն ունի: Ինքն ընդամենը երեք տարվա տնօրեն է՝ ասաց, որ անհիշելի ժամանակներից փակ է:

Ասել, թե բռնել, կողպեք են դրել ու փակել, դա էլ մի բան չէ: Չէ՞ որ մնացած 9–ը խնամքով պահում է: Առհասարակ, դպրոցը պետք է բարձր մակարդակի վրա մնա: Եկեք ամեն ինչ անենք՝ հարցերը միասին կարգավորենք: Բայց անընդհատ խայտառակ անելը ճիշտ չէ: Կցանկանամ, որ բոլորս միահամուռ ամեն ինչ անենք Արմավիրի մարզը ոչ թե խայտառակելու, այլ ամեն ինչ դեպի լավը տանելու համար: