Գորիսի նախկին քաղաքապետ. «Առուշ Առուշանյանը տառաճանաչության խնդիր ունի»

Գորիսի նախկին քաղաքապետ Սամվել Հարությունյանը պատրաստվում է նոյեմբերի 5–ին կայանալիք՝ քաղաքապետի ընտրությանն իր թեկնածությունն առաջադրել: Այսօր լրագրողների հետ հանդիպման ժամանակ նա հայտարարեց, որ ինքը մտադրություն չի ունեցել քաղաքական դաշտ վերադառնալ, սակայն քաղաքի ճակատագրով մտահոգվողները և նույնիսկ իր հակառակորդներն առաջարկել են իրեն փրկել Գորիսը:
Սամվել Հարությունյանի ներկայացմամբ՝ նախընտրական Գորիսում այսօր պայթյունավտանգ իրավիճակ է տիրում, մարզպետ Վահե Հակոբյանը պառակտում է մարզն ու Գորիս քաղաքը, նա ամեն ինչ իր շահերին է ծառայեցնում:

«Տագնապալի իրավիճակ է տիրում մեր հայրենիքում՝ հատկապես Գորիսում: Վահե Հակոբյանը պառակտում է մարզը, ժողովրդին, նա անգամ պառակտում է հանրապետականներին: Նա աչքի է ընկնում իր քարուքանդ անելու բնավորությամբ, Գորիսի բարոյահոգեբանական մթնոլորտը պղտորելու հատկանիշներով»,– ասաց նա:
Նրա խոսքով՝ այսօր Գորիսում արտագաղթ է տեղի ունենում, ինքն էլ որոշել է, քաղաքապետի պաշտոնին վերադառնալով, կասեցնել արտագաղթը: Հարությունյանը նշեց, որ Սյունյաց աշխարհից հեռանում են լավագույն սյունեցիները, ինչը նրան ցավ է պատճառում:

«Սյունեցի չեն մարզի ուժային կառույցների ղեկավարները: Վահե Հակոբյանն ամեն ինչ արել է, որպեսզի մարզի բուժհաստատությունների, դպրոցների տնօրեններից ազատվի և իրեն հլու–հնազանդ կամակատարներ նշանակի: Լավագույն բժիշկները, գլխավոր գինեկոլոգը, հեռանում են հիվանդանոցից, նրանց տեղը Վայոց ձորի մարզից են մասնագետ բերում»,– զայրացավ Հարությունյանը:

Գորիսի քաղաքապետ Վաչագան Ադունցի հրաժարականից հետո, քաղաքապետի պաշտոնակատար է նշանակվել 26–ամյա Առուշ Առուշանյանը: «Փաստ»–ը հետաքրքրվեց՝ ինչպես կընթանա երիտասարդ թեկնածուի և իր ընտրապայքարը: Հարությունյանը ճշտել է, որ Վահե Հակոբյանի և Առուշ Առուշանյանի հարաբերությունների միջև առևտրային լուրջ շահեր կան: Առուշանյանը «Գոր մետալ» ՍՊԸ–իիմնադիրն է:

«Առուշանյանը 6–րդ դպրոցում է սովորել, ես այդ դպրոցում տնօրեն եմ եղել: Հիմա այդ դպրոցի ուսուցիչներն ինձ ասում են, որ Առուշանյանը տառաճանաչության խնդիր ունի, հոդաբաշխ խոսքին լավ չի տիրապետում»,– ասաց Գորիսի մանկավարժական համալսարանի նախկին ռեկտորը:

Առուշ Առուշանյանին նախընտրական մենամարտի է հրավիրում Գորիսի նախկին քաղաքապետը՝ թելադրություն գրելու և մինչև գոտկատեղը մերկանալու:
«Առուշանյանն ասում է, որ Սուրիկ Խաչատրյանը կցանկանար իր թեկնածուին տեսնել համայնքի ղեկավարի պաշտոնում, դրա համար ինքն առաջադրվում է: Այ տղա ջան, դուք, երբ Սուրիկ Խաչատրյանին ու իր որդիներին տեսնում էիք, մկան ծակն էիք մտնում պարզապես: Հիմա աքլորացել եք, փրկում եք»,– շեշտեց նա: