«ԵԼՔ»-ից ելքերը կշատանան

Թերևս սկսենք Փաշինյանի սիրելի դիմելաոճով, որը նրան հնարավորություն է տալիս խուսափելու քաղաքացիական հայցերից, ըստ այդմ՝ օդում կախված լուրերի:

Օդում կախված լուրերի համաձայն «ԵԼՔ» դաշինքում բավականին լարված վիճակ է: Ասում են, որ ԵԱՏՄ-ից դուրս գալու օրինագիծ ներկայացնելը համաձայնեցված չի եղել բոլոր կոմպետենտ կողմերի հետ, իսկ դրանից ելնելով հակասություններ չեն կարող չլինել: Եթե ուշադիր նայենք, այդ դաշինքի առաջատար գործիչների անցած ուղուն և հետագծին, ապա կտեսնենք, որ այդ հակասությունները չեն կարող չլինել: Խնդրային է և ենթադրությունների տեղիք է տալիս նաև,  նրանց վերջին փուլի գործելաոճը: Դրանք ամփոփվում են տված հարցազրույցների, ելույթների և այլ դիտարկումների մեջ: Հստակ ընդգծվում է, թե դաշինքի առաջնորդներից, ով, իշխանական որ թևի հետ է հեռագնա «սիրավեպ» հասունացնում:

Այս ամենի մեջ, անշուշտ իր առանցքային դերն ունի Նիկոլ Փաշինյանը: Ոչ մեկի համար գաղտնիք չէ, որ այդ դաշինքն այսօր խորհրդարանում է, նաև մեծ ի մասամբ Փաշինյանի պոպուլիզմի շնորհիվ: Իսկ այժմ, ինչպես ասում են, եկել է դափնիները ճաշակելու ժամանակը:

Ըստ օդում կախված այդ նույն լուրերի, բոլորը դժգոհ են նրա կայացրած որոշումներից և այն պահվածքից, որը դրսևորում է թիմակիցների նկատմամբ: Պատմության ընթացքին ծանոթ մարդը, տեսած կլինի Դուչեյի՝ Բենիտո Մուսոլինիի ելույթները: Միգուցե գիտակցաբար, իսկ միգուցե անտեղյակ, օդում կախված լուրերն այս մասին որևէ բան չեն պնդում, Փաշինյանն իր ժեստերով և հռետորությամբ ընդօրինակում է այդ գործչին: Իհարկե, նա չունի դիկտատուրայի այն տիրույթները, որն ուներ մեծն Դուչեն, բայց ինչպես ասում են՝ յուրաքանչյուր բռնապետ փոքրոգի է յուրովի:

Այդ նույն օդում կախված լուրերը պնդում են, որ նա իր խորհրդարանական թիմակից, հատկապես երիտասարդ գործընկերների հետ ընդհանրապես հաշվի չի նստում: Չի հարցնում նրանց կարծիքը, իսկ պատեհ առիթի դեպքում, հիշեցնում է նրանց հաջողության գաղտնիքը: 

Մնում է թերևս հետևություն անել, որ հանրապետական Վահրամ Բաղդասարյանը կարող է ճշմարտացի դուրս գալ: Իհարկե, այս հետևությունն անում ենք սրտի խոր կսկիծով, հատկապես հաշվի առնելով կանխատեսման հեղինակի կուսակցական պատկանելիությունը, սակայն մեզ այլ բան չի մնում անել՝ ելնելով Փաշինյանի վարքագծից:

Բենիտո Շիկլգրուբեր