Սրաշենից մարդիկ հեռանում են

Past.am   Արդեն մեկ տարուց ավելի է՝ Սյունիքի մարզի Սրաշեն համայնքը մեկուսացված վիճակում է: Գյուղը սպասարկող միակ երթուղայինը հրաժարվել է շարունակել աշխատանքը: Սրաշենցիները երկար ժամանակ է, ինչ գյուղից դուրս են գալիս պատահական մեքենաներով: Այստեղ ճանապարհները համեմատաբար բարվոք վիճակում են: Երթուղայինի չաշխատելու պատճառաբանությունը համարում են ուղևորների նվազ հոսքը:

«Ժողովուրդը քիչ է, «գազելն» իր ա ծախսը չի հանում, չի աշխատում»,– «Փաստ» օրաթերթի հետ զրույցում բողոքեցին սրաշենցիները:

Վարչապետ Կարեն Կարապետյանը հանձնարարել էր լուծել համայնքների տրանսպորտի հարցը: Հանձնարարականից տևական ժամանակ անց՝ սայլն այստեղ տեղից չի շարժվում:
«Ավտոբուսի վարորդները պատճառաբանում են, որ մարդ չկա, փող չեն կարողանում աշխատել»,– փոխանցեցին համայնքի բնակիչները:

Սրաշենում 90 մարդ կա: Աշխատանքի բացակայության պատճառով այստեղ էլ կամաց– կամաց բնակչությունը հեռացել է: Նույնիսկ վերջին տարիներին էլ մարդիկ լքում են գյուղը, բայց ոչ Ռուսաստան:

«Վերջին տարիներին 3–4 ընտանիք իրանց երեխաներով գնացել են Կապան, որ էնտեղի գործարանում աշխատեն ու իրենց էրեխեքը պահեն»,– փաստեցին սրաշենցիները:
Համայնքի ղեկավար Հենզել Աբրահամյանը մխիթարում է համագյուղացիներին: Նա վստահեցնում է՝ առաջիկա օրերին երթուղային կհայտնվի Սրաշենում, հարևան համայնքների ղեկավարների հետ քննարկել են հարցը:

«Էս երկու օրն արդեն պետք է գործի: Ես ու Ծավի գյուղապետը դիմել ենք, ասել են, որ տրանսպորտ կգա: Ավտոբուսը շաբաթվա 3 օրը գյուղ կտմնի»,– հավաստիացրեց Աբրահամյանը:

Տեղի բնակիչները, սակայն, տարակուսում են՝ նշելով, որ նմանատիպ խոստումներ շատ են լսել, բայց խոսքը գործի չի վերածվել: