«Ելք»–ը նույնպես կմասնակցի ՏԻՄ ընտրություններին

Նոյեմբերի 5–ին ՏԻՄ ընտրություններ կկայանան Արագածոտնի, Արարատի, Արմավիրի, Գեղարքունիքի, Լոռու, Կոտայքի, Շիրակի, Սյունիքի, Վայոց ձորի և Տավուշի մարզերի 52 համայնքներում, որոնցից 35–ը խոշորացված են: Այսօր կայանալիք ՀՀԿ գործադիր մարմնի նիստում կամփոփվեն ու կներկայացվեն ընտրությունների վերջնական թեկնածուների անունները:

«Փաստը» փորձել է պարզել, թե այլ կուսակցություններ ևս հետաքրքրվա՞ծ են այս ընտրություններով: ՀՎԿ լրատվական–քարոզչական մասի ղեկավար Էդգար Առաքելյանը մեզ հայտնեց, որ հստակ որոշում դեռ չկա, սակայն կարող են լինել համայնքներ, որտեղ թեկնածուներ առաջադրեն: «Վերջնական որոշում լինելու դեպքում կհայտարարվի»,– ասաց նա:

Բացի ՀՀԿ–ից ընտրություններին իրենց հստակ մասնակցությունն է որոշել նաև «Ելք» դաշինքը:

Սրա հետ կապված «Փաստը» զրուցել է Երևանի ավագանու «Ելք» դաշինքի անդամ Անի Սամսոնյանի հետ:

– Նոյեմբերի 5–ին Հայաստանի մի շարք համայնքներում տեղի կունենան ՏԻՄ ընտրություններ, որոնց ավելի քան կեսը խոշորացված համայնքներ են: «Ելք»–ը այս ընտրություններին պատրաստվո՞ւմ է մասնակցել և ինչո՞ւ:

– «Ելք» դաշինքը մեկ անգամ չէ, որ հայտարարել է տեղական ինքնակառավարման մարմինների ընտրություններում մասնակցության անհրաժեշտության մասին։ Այս պահին դաշինքը նախապատրաստվում է այդ ընտրություններին տարբեր համայնքներում ավագանու անդամության թեկնածուներ առաջադրելու ուղղությամբ։ Համայնքի ղեկավարի թեկնածուներ այս պահին դեռ չունենք։

– Հաշվի առնելով այն, որ մեծամասնությունը խոշորացված համայնքներ են և ենթադրելով, որ ՀՀԿ–ն նման մեծ լիազորություններ ունեցող պաշտոնները հենց այնպես ձեռքից բաց չի թողնի՝ ինչպիսի՞ ակնկալիքներով եք պատրաստվում մասնակցել:
– ՏԻՄ ընտրություններին մենք մասնակցելու ենք նույն ակնկալիքներով, ինչ համապետականին, այսինքն՝ պայքարելու և հաղթելու։ Եվ դա միշտ այդպես է լինելու։

– Համայնքների խոշորացումից բավական շատ են դժգոհությունները: Այս պարագայում ձեր հնարավոր ընտրված թեկնածուները բազմիցս մատնանշված խնդիրներին կկարողանա՞ն լուծում տալ:

– Այո, համայնքային խոշորացումները ունենալու են հետևանքներ և խնդիրներից խուսափել հնարավոր չի լինի։ Մենք գիտակցում ենք նաև, որ մեր առաջադրած թեկնածուները պետք է կոմպետենտ լինեն իրենց համայնքային խնդիրների վերհանման և լուծման համար։ Հետևողական և պատրաստակամ մարդիկ, որոնց դաշինքը կցանկանա առաջադրել որպես թեկնածուներ, քիչ են։ Սա է նաև պատճառը, որ առաջադրման գործընթացը բարդանում է և երկարաձգվում։

– Վերջին շրջանում սոցիալական ցանցերում շատ են հանդիպում դժգոհություններ պարունակող գրառումներ՝ ուղղված «Ելք»–ին: Վստահությունն ու համակրանքը ձեր դաշինքի նկատմամբ պակասե՞լ է, և արդյո՞ք դա կարող է անդրադառնալ ընտրողների հետագա որոշման վրա:

– Այդ դժգոհությունները եղել են և՛ դաշինքի ստեղծման օրերին, և՛ Ազգային ժողովի ու Երևանի ավագանու ընտրությունների ժամանակ, և՛ այդ ամենից հետո։ Այսինքն՝ դրանք մեզ միշտ ուղեկցում են։ Ամենահետաքրքիրն այն է, որ այդ բողոքողների մեծ մասը մեր ընտրողները չեն։ Հետևաբար ինչ էլ մենք անենք՝ բողոքելու են, որովհետև շատերը դեռ չեն մարսել «Ելք»–ի հաջողության փաստը։

Իսկ այն մարդիկ, ովքեր ադեկվատ կամ բովանդակային քննադատություններ ու բողոքներ ունեն, գիտեն նաև որտեղ գտնել մեզ և ինչպես փոխանցել այդ մտահոգությունները։ Ֆեյսբուք սոցիալական ցանցը քննարկումների կարևոր հարթակ է, բայց ոչ՝ ելակետային։

Իսկ ինչ վերաբերում է ընտրողների հետագա որոշմանը, ապա դա պայմանավորված է լինելու միայն «Ելք» դաշինքի պատգամավորների և ավագանու անդամների ռեալ աշխատանքի արդյունքներով։

Հավելենք, որ նոյեմբերյան ընտրությունների թեկնածուների առաջադրումը կսկսվի հոկտեմբերի 1–ին և կտևի մինչը հոկտեմբերի 6–ը: Ըստ էության, դաշինքին կողմնորոշվելու համար բավական քիչ ժամանակ է մնացել: