Կարտոֆիլի որակը ցածր է, ծավալը՝ քիչ

Հանրապետությունում սկսված անձրևները խանգարում են Գեղարքունիքի մարզի Մեծ Մասրիկ համայնքի բնակիչներին կարտոֆիլի բերքահավաք կատարել:

Այս համայնքում մոտ 500 հեկտար կարտոֆիլի ցանքատարածություն կա: Բերքահավաք սկսած գյուղացիները կարտոֆիլի կիլոգրամը 90–100 դրամով են վերավաճառողին հանձնում: Սահմանված գնից, սակայն, կարտոֆիլագործները դժգոհ են:

«Ինքնարժեքը 100 դրամ է, իսկ մենք 90–100 դրամով ենք ծախում, դա մեզ եկամուտ չի բերում: Գոնե պետք է տեղից 120 դրամով կարտոֆիլը վաճառենք»,– Pas.am-ի հետ զրույցում դժգոհեցին Մեծ Մասրիկի բնակիչները:

Այս տարի եղանակային պայմանները բարենպաստ չեն եղել կարտոֆիլի բերքատվության համար: Անձրևի հույսով բերք ստացող համայնքում տեղումներ չեն եղել, երաշտի պատճառով կարտոֆիլի բերքատվությունն այս տարի ցածր է:

«Բերք չկա այս տարի, եղանակային պայմանները բարենպաստ չէին, անձրև քիչ եկավ, բերքն էլ քիչ ունեցանք»,– նշեցին մեր զրուցակիցները:

Գյուղացիները կարտոֆիլագործությունից հրաժարվում են, քանի որ պետությունն իրենց չի աջակցում իրացման հարցում:

Գեղարքունիքի մարզի կարտոֆիլի գնորդը նաև Պաշտպանության նախարարությունն է: Նախորդ տարի նախարարության սննդի ներմուծման տենդերը հաղթած կազմակերպությունները կարտոֆիլի 1 կգ–ի դիմաց 35–50 դրամ գին են առաջարկել, ինչն առաջացրել էր կարտոֆիլագործների դժգոհությունը։ Պնդում են՝ այս տարի նման գնով իրենք բերքը չեն վաճառի:

Կարտոֆիլի բերքից դժգոհ են նաև Ազատ համայնքի բնակիչները: Որակը ցածր է, ծավալը՝ քիչ:

«50 դրամով են տարել, դա փող չի, ինքնարժեքը, որ հաշվում են, 100–110 դրամ է դուրս գալիս: Սաղ ճարահատյալ տվեցին էդ մատակարարներին, բա պահեին ի՞նչ անեին, փչանա՞ր: էս տարի, բայց եթե նույն գինն ասեցին, չենք տալու, որովհետև բերքը քիչ է»,– զայրացան Ազատի բնակիչները:

Բերքի կիլոգրամը 90–100 դրամով է այստեղ վաճառվում, այն դեպքում, երբ սերմացուն գնել են 200– 300 դրամով: Եթե ամբողջ բերքն էլ վաճառվի, միևնույն է կատարված ծախսերը փակել չի լինի:

«Պետք է գինը բարձր լինի, քանի որ բերքի քանակն ու որակը լավը չի»,– նշեցին հողագործները:

Ազատում այս տարի 50–60 հեկտար հողատարածքի վրա են միայն կարտոֆիլ ցանել: Գյուղացիների խոսքով՝ եթե կարտոֆիլի գինը չբարձրանա, իրենք հետզհետե կհրաժարվեն այս գործից, և կարտոֆիլագործությունն այստեղ հուշ կդառնա: