Սպառողների միության նախագահ. «Պետությունը պետք է զսպի գնաճը»

Հանրապետությունում թանկացումներ են արձանագրվել: Ազգային վիճակագրական ծառայության հրապարակած տվյալներով՝ 2017 թ. սեպտեմբերին օգոստոսի համեմատ սպառողական շուկայում արձանագրվել է 0,2% գնաճ: 2017 թ. սեպտեմբերին օգոստոսի համեմատ հանրապետությունում գրանցվել է ալկոհոլային խմիչքի և ծխախոտի 0,4% գնաճ:

Ծխախոտի թանկացման մասին խոսելիս զայրույթը չի թաքցնում «Սպառողների միության» նախագահ Արմեն Պողոսյանը: Նա «Չիբուխ» տեսակի ծխախոտ է օգտագործում, որի գինը նույնպես բարձրացել է:

«Այդ ծխախոտն արդեն երկու անգամ թանկացել է: Դա այն ծխախոտն է, որն ամենացածր եկամուտ ունեցող մարդիկ են ծխում»,– Past.am-ի հետ զրույցում ասաց նա:

Թանկացած ապրանքների շարքում գյուղմթերքն առաջին տեղում է: ԱՎԾ–ի հրապարակած թվերով՝ մսամթերքի ապրանքախմբում 2017 թ. սեպտեմբերին 2016 թ. սեպտեմբերի համեմատ գրանցվել է 6,6%, իսկ 2017 թ. օգոստոսի համեմատ 0,3% գնաճ: Բանջարեղենի շուկայում սեպտեմբերին օգոստոսի համեմատ արձանագրվել է 5,7% գնաճ: Նախորդ տարվա նույն ժամանակահատվածի համեմատ այս ապրանքախմբում գնաճը կազմել է 7,9%–ը:

Ապառողների շահերի պաշտպանի խոսքով՝ պետությունը պետք է զսպի գնաճը:

«Մեր երկրում գյուղմթերքը կարող է լինել շատ էժան, հետո վաճառվել շատ թանկ, բայց չգիտենք՝ որն է այն իրատեսական գինը, որով պետք է վաճառվի: Նախ, պետք է գնաճը վերահսկվի: Պետությունը պետք է հաստատի սահմանային գներ, դա նաև մեր օրենսդրությամբ է արձանագրված: Պետությունը պետք է գին սահմանի, որից բարձր տվյալ ապրանքը ոչ ոք չի կարող վաճառել»,– նկատեց Պողոսյանը:

Մսամթերքի ապրանքախմբում 2017 թ. սեպտեմբերին 2016 թ. սեպտեմբերի համեմատ գրանցվել է 6,6%, իսկ 2017 թ. օգոստոսի համեմատ 0,3% գնաճ: Սպառողների միության նախագահի խոսքով՝ մսի թանկացման վրա մի քանի գործոն է ազդել՝ անասունների գլխաքանակի պակասումը, անասնակերի թանկացումը:

«Վաճառողներն ավելի շատ եկամուտ են ստանում, քան գյուղացին, ով ամբողջ տարին չարչարվում է: Գյուղացին իր կատարած ծախսերի 1/3–ն անգամ չի կարողանում հանել: Պետությունն այսօր չի օգնում գյուղացուն իրացման հարցում: Մթերում չկա»,– մատնանշեց նա:

ԱՎԾ–ի ներկայացմամբ՝ յուղերի և ճարպերի ապրանքախմբում 2017 թ. սեպտեմբերին 2016 թ. սեպտեմբերի համեմատ արձանագրվել է 7,9%, իսկ 2017 թ. օգոստոսի համեմատ՝ 1,8% գնաճ, ինչը պայմանավորված կարագի 4,2% գնաճով: Օգոստոս–սեպտեմբեր ամիսներին մեր երկրում 1 կգ նորզելանդական կարագի մանրածախ վաճառքի գինը կազմել է 3842 դրամ, մինչդեռ 2016 թվականի նույն ժամանակահատվածում այն եղել է 2779 դրամ:

Սրանք միակ ապրանքները չեն, որ վերջին մեկ ամսում գնային աննախադեպ թռիչք են ունեցել: Կաթնամթերքի, պանրի և ձվի ապրանքախմբում սեպտեմբեր ամսին 0,7% գնաճ է գրանցվել:

Մանյա Պողոսյան