Հանրաքվե անցկացնելու նախագծով հանդես գալու հնարավորությունից զրկումը` քաղաքական որոշում

Երկու օր առաջ ԱԺ նիստի ընթացքում երկրորդ ընթերցմամբ պատգամավորների քննարկմանը ներկայացվեց «Երևան քաղաքում տեղական ինքնակառավարման մասին» օրենքում լրացումներ և փոփոխություններ կատարելու մասին օրենսդրական նախաձեռնությունը, որը, մի շարք ընդդիմադիր պատգամավորների կարծիքով, միտված է Երևանի ավագանու ընդդիմադիր խմբակցությունների լիազորությունների կրճատմանը։
Իսկ ինչ են իրենցից ներկայացնում այդ փոփոխությունները: Երևանի մասին ՏԻՄ օրենքի համաձայն՝ Երևանի ավագանու որևէ խմբակցություն կարող է քննարկման բերել տեղական հանրաքվե անցկացնելու նախագիծ: Այժմ առաջարկվում է «որևէ խմբակցություն» բառերի փոխարեն շարադրել «անդամների ընդհանուր թվի առնվազն մեկ երրորդը» նախադասությունը։

Երևանի ավագանու «Ելք» խմբակցության անդամ Արայիկ Հարությունյանը շեշտում է, որ հանրաքվեների հետ կապված կետում փոփոխության քաղաքական որոշում ընդունեցին, որի համաձայն խմբակցությունները զրկվում են հանրաքվեի նախաձեռնությամբ հանդես գալու իրավունքից:

Հարությունյանի ներկայացմամբ՝ օրենքի փոփոխությունը ենթադրում է, որ նման նախաձեռնությամբ այլևս կարող է հանդես գալ ավագանու մեկ երրորդը, ինչը ներկայում ընդդիմադիր համարվող խմբակցությունների կողմից չի կարող իրականացվել, որովհետև նրանք միասին մեկ երրորդ չեն կազմում:

«Սա զգալի հետընթաց է: Սահմանադրական փոփոխությունների ժամանակ էլ ասում էին, որ խորհրդարանական հանրապետության անցնելու ճանապարհին մենք ԱԺ–ում ու ավագանիում խմբակցություններ ունեցող տարբեր քաղաքական ուժերին լրացուցիչ լիազորություններ ենք տալիս որոշումներ կայացնելու վրա ազդելու համար:

Բայց նրանք փորձում են նման գործիքներից զրկել ընդդիմությանը: Թե՛ ԱԺ–ում և թե՛ քաղաքապետարանում կատարված քննարկումները ցույց տվեցին, որ շատ կոնկրետ քաղաքական որոշում է կայացվում՝ զրկելու ավագանու խմբակցություններին նման նախաձեռնությամբ հանդես գալու հնարավորությունից»,– նշեց ավագանու անդամը:

«Փաստի» հարցին, թե նպատակը ո՞րն է և արդյոք ինչ–որ բանից նախազգուշանո՞ւմ են, Հարությունյանը պատասխանեց. «Ակնհայտ է, որ Երևանի այս տարվա ավագանին զգալիորեն տարբերվում է նախորդ տարիների ավագանուց՝ իր նախաձեռնողականությամբ, քաղաքական կամքով: Հատկապես դա վերաբերում է «Ելք» խմբակցությանը: Երբեք Երևանի ավագանու նիստերը այդքան երկար չեն տևել, որքան հիմա, որովհետև բովանդակային քննարկում է գնում:

ԱԺ–ում ՀՀԿ խմբակցության քարտուղար Գագիկ Մելիքյանը շատ ուղիղ ասաց՝ բա ինչ, մենք այդ լծակը թողնե՞նք «Ելք» խմբակցությանը, որպեսզի նա անընդհատ մեզ ծանր իրավիճակի մեջ դնի ավագանիում և մենք ստիպված լինենք անընդհատ այդ նախաձեռնությունները մերժել:

Մինչդեռ մեր հակափաստարկը այն է, որ յուրաքանչյուր քաղաքական ուժ հանրաքվեի անցկացման մասին նախաձեռնություն անելուց առաջ պետք է շատ երկար մտածի, որովհետև դա լուրջ քաղաքական պատասխանատվություն է: Եվ եթե որևէ խմբակցություն, այդ թվում և ընդդիմադիր, անընդհատ անհեթեթ ու անիմաստ հանրաքվեների նախաձեռնությամբ հանդես գա, դրա պատասխանատվությունը հենց իր վրա է ընկնելու»,– նկատեց նա:

Հարցին էլ, թե ընդունո՞ւմ եք, որ սա հենց «Ելք»–ի դեմ ուղղված քայլ է, Հարությունյանը պատասխանեց, որ դա ակնհայտ է:

«Հանրապետականները և Վաչե Տերտերյանը ասում են, որ քաղաքական որոշում է, և եթե այդպես է, ուրեմն կոնկրետ ուղղված է ավագանիում ընդդիմադիր խմբակցությունների դեմ: Քանի որ «Երկիր Ծիրանին» առանձնապես ոչ մի գործունեություն չի ծավալում, ակնհայտ է, որ սա «Ելք»–ի դեմ է ուղղված»,– ասաց նա:

Ավագանու անդամը շատ տարօրինակ է համարում նաև այն, որ առաջին ընթերցման քննարկման ժամանակ թե՛ հանրապետական խմբակցության ներկայացուցիչները և թե՛ Վաչե Տերտերյանը նշել էին, որ հանրաքվեի կետի վերաբերյալ լրացուցիչ քննարկում տեղի կունենա և կմտածեն ընդդիմության մտահոգությունները օրենքի նոր նախագծում արտացոլելու կապակցությամբ:

«Բայց երկրորդ ընթերցման ժամանակ ՀՀԿ ներկայացուցիչները և նույն Վաչե Տերտերյանը դա չհիշատակեցին: Փորձեցին այդպես շատ արագ, առանց աղմուկի և փոշու անցկացնել երկրորդ ընթերցումը և միայն «Ելք»–ի պատգամավորների կողմից խնդրի բարձրաձայնումից հետո, սկսեցին ելույթներով հանդես գալ ու արդարանալ»,– հավելեց նա:

Հարությունյանը համոզված է՝ այստեղ կարևոր է նաև Երևանի քաղաքապետարանի և քաղաքային իշխանությունների գործոնը, որովհետև ակնհայտ է, որ այդ փոփոխությունը պաշտպանվում է քաղաքապետի ու քաղաքային իշխանությունների կողմից:

«Այս քննարկումները վկայում են, որ սրա վերաբերյալ նրանք ունեն մտահոգություններ, և, կարծում եմ, որ իրենք ԱԺ ՀՀԿ խմբակցությանը հորդորել են, կարող է նաև պահանջել են, որպեսզի այդ փոփոխությունը կատարվի»,– եզրափակեց նա: