Երևանն առավել գեղեցիկ դարձնելու համար քաղաքապետարանն ակնկալում է երևանցիների մասնակցությունը ձևավորմանը

Երևանի հիմնադրման 2799 տարեդարձի առթիվ Երևանի քաղաքապետարանը ձեռնարկում է անհրաժեշտ քայլեր՝ մայրաքաղաքին տոնական տեսք հաղորդելու համար:

Մասնավորապես, քաղաքապետարանի աշխատակազմի արտաքին ձևավորման և գովազդի վարչության կողմից, ավանդույթի համաձայն, մշակվել է տոնական ձևավորման ուղեցույց, որը տեղադրված է Երևանի քաղաքապետարանի պաշտոնական կայքի «Էրեբունի-Երևան 2799» բաժնում՝ https://www.yerevan.am/am/erebuni-yerevan-2799/:

Ինչպես «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, կայքում ներկայացված են շենքերի տոնական ձևավորման դիզայներական լուծումներ, ինչպես նաև հնարավորություն է ընձեռված ներբեռնելու «Երևան սիրո քաղաք» կարգախոսի և #ՏեսԵրևանը, #ԼսիրԵրևանը, #ԶգաԵրևանը, #ՍիրիրԵրևանը չորս հիմնական բաղադրիչերի լոգոտիպերը:

Միաժամանակ, Երևանն առավել գեղեցիկ և ներկայանալի դարձնելու և քաղաքապետարանի ջանքերն ամբողջականացնելու համար ակնկալում ենք, որ մայրաքաղաքի տոնական ձևավորման մասնակից կդառնան նաև երևանցիները:

Ըստ այդմ, կոչ ենք անում բոլոր տնտեսվարողներին, անհատներին և կազմակերպություններին՝ տոնական ոճով ձևավորել շենքերի մուտքերը, ճակատային հատվածները, բնակարանների պատշգամբներն ու բազրիքները:

Երևանը բոլորիս մայրաքաղաքն է, իսկ մեր քաղաքի ծննդյան օրը՝ «Էրեբունի-Երևան»-ը, բոլորիս համախմբող, ջերմություն և դրական լիցքեր հաղորդող սիրելի տոնն է: Հարցերի դեպքում անհատներն ու կազմակերպությունները կարող են դիմել Երևանի քաղաքապետարանի աշխատակազմի արտաքին ձևավորման և գովազդի վարչություն՝ 011-514-212: