Սեւան քաղաքում հիմնադրվեց «Անգլերենի ակումբ»

Հայաստանի Հանրապետությունում գործող Բրիտանական խորհրդի հերթական նախաձեռնությամբ  Սեւան քաղաքում բացվեց «Անգլերենի ակումբ»:
 Ինչպես «Արմենպրես»-ին տեղեկացրեց Սեւանի քաղաքապետի խորհրդական Արմինե Ղուկասյանը,  Բրիտանական խորհրդի «Փոփոխության սերունդ» կրթական ծրագրի շրջանակում Սեւանում հիմնադրվող «Անգլերենի ակումբն»  իրողություն է դարձել «Էյչ-Էս-Բի-Սի Բանկ Հայաստան»-ի հովանավորությամբ:

«Արդյունավետ համագործակցության շնորհիվ հնարավորությունների ու միջմշակութային հաղորդակցության լեզուն` նոր ձևաչափով ու մեթոդներով, այսուհետ ակումբի գործունեության տեսքով դառնալու է 9-16 տարեկան երեխաների բարեկամն ու սեփականությունը: Ակումբի բացումը, որին մասնակցեցին ՀՀ ԿԳ փոխնախարար Դավիթ Սահակյանը, «Էյչ-Էս-Բի-Սի Բանկ Հայաստան»-ի գլխավոր գործադիր տնօրենի պաշտոնակատար Արամ Փինաջյանը, Բրիտանական  խորհրդի տարածաշրջանային փոխտնօրեն Շիլա Լյումսդենին, Բրիտանական խորհրդի Հայաստանյան մասնաճյուղի տնօրեն Արևիկ Սարիբեկյանը, Գեղարքունիքի մարզպետարանի կրթության, մշակույթի, սպորտի վարչության պետ Գարիկ Բադալյանը եւ ծնողներ, տեղի ունեցավ Սեւան քաղաքի Վլ. Կարապետյանի անվան թիվ 3 հիմնական դպրոցում»,-պատմեց Արմինե Ղուկասյանը:
Բրիտանական խորհրդի Հայաստանյան մասնաճյուղի տնօրեն Արեւիկ Սարիբեկյանի փոխանցմամբ` «Երեխաները կարդում են» ծրագիրը, որն իրականացվել է Բրիտանական խորհրդի կողմից, Հայաստան բերելու նպատակ կար, որը գտավ դրական արձագանք:
«Հայկական կրթությանը զուգահեռ, որը մեզ մոտ լավ է դրված, պետք է իրականացնել նաեւ օտար լեզուների կրթական ծրագրեր եւ չմոռանալ, որ այս երեխաները մեր վաղվա դեսպաններն են, ովքեր նստելու են միջազգային քննարկումների եւ բանակցությունների սեղանների շուրջ: Այսօր իրականացվող ծրագիրն էլ նպատակ ունի ինչ-որ ձեւով նպաստել նրանց ապագայի զարգացմանը»,- նշեց Արեւիկ Սարիբեկյանը:

Կարեւորելով լեզուների իմացությունն ու դրանց ուսուցման արդյունավետությունը` ԿԳ փոխնախարար Դավիթ Սահակյանը նկատեց, որ նախարարությունը մեծ տեղ է տալիս օտար լեզուների դասավանդմանը եւ այն չի դնում ի հակադրություն հայոց լեզվի:
«Աշխարհի հետ պետք է հաղորդակցվել, իսկ անգլերենն էլ գործնական հարաբերություների ձևավորման, հետագա կրթության հնարավորությունները ընդլայնելու լավագույն հնարավորություն է: Ակումբի գործունեությունն  էլ ուղղակիորեն նպաստելու է դրա իրականացմանը: Երեխաներին պետք է հաղորդել ամբողջական գիտելիքներ եւ տալ ընտրության հնարավորություն: Ու չմոռանանք, որ կրթության բարելավմանն ուղղված քայլերը ոչ թե բարեգործություն են, այլ ներդրում, ինչի պտուղները կստանանք տարիներ անց»,- նշեց  փոխնախարարը:
«Անգլերենի ակումբը» Սեւան համայնքի եւ տարածաշրջանի դպրոցների համար լինելու է կապող օղակ, նաեւ՝ կենտրոն: Դպրոցներում ստացած անգլերեն լեզվի գիտելիքներն այս ակումբում խորացվելու են եւ ամրապնդվելու` դուրս գալով դասասենյակային կաղապարներից: Ուսուցումը զուգակցվելու է քննարկումներով, որոնք թույլ են տալու զարգացնելու առաջնորդության, թիմային աշխատանքի որակները, քննադատական մտածողությունը, խնդիրները լուծելու կարողությունները: 
«Ավելի քան 50 գրքով համալրված ակումբում գործելու է 2 ծրագիր` «Սովորել անգլերեն պատմություններ կարդալու միջոցով» /հեքիաթասացություն/, որի ունկնդիրներն ու մասնակիցներն են դառնալու 6-րդ դասարանցիները` թիվ 3 հիմնական դպրոցի անգլերեն լեզվի ուսուցչուհի Կարինե Ստեփանյանի դասընթացավարությամբ: Իսկ 7-9-րդ դասարանի աշակերտները, նույն դպրոցի անգլերեն լեզվի ուսուցչուհի Աննա Գեւորգյանի ղեկավարությամբ, սոցիալական ձեռնարկատիրության հիմունքները քայլ առ քայլ կդարձնեն հաղթահարելի, բիզնեսին առնչվող գիտելիքների շնորհիվ էլ իրենց գործարար գաղափարներով կփորձեն նպաստել համայնքի զարգացմանը: 
Ակումբում պարապմունքներն անցկացվելու են շաբաթական 3 անգամ` մեկական ժամով, յուրաքանչյուր խմբում` մինչեւ 15 աշակերտ: Վերապատրաստման դասընթացներ անցած ուսուցիչները նոր մեթոդների կիրառման շնորհիվ անգլերենի մատուցումը  եւ անգլերենի միջոցով նոր գիտելիքների ձեռքբերումը կդարձնեն առավել հետաքրքիր եւ գրավիչ:
Ծրագրի շրջանակում վերապատրաստման դասընթացներ են անցել Սեւանի տարածաշրջանի եւ Հրազդան քաղաքի անգլերեն լեզվի ուսուցիչները: Ծրագրի իրականացման նախապատվությունը տրվել է Վլ. Կարապետյանի անվան թիվ 3 հիմնական դպրոցին»,-ընդգծեց դպրոցի տնօրեն  Լուսինե Հովհաննիսյանը: 
Հայաստանում գործող Բրիտանական խորհրդի ներկայացուցչի հավաստմամբ՝ հոկտեմբերի վերջին եւս մեկ «Անգլերենի ակումբ» կբացվի Վանաձորում:

Խոսրով Խլղաթյան

http://armenpress.am/arm/news/908369/