Ծուխը ու նավթի հոտը լցվում են դասասենյակները. դժգոհություն

Լոռու մարզի 149 դպրոցից միայն 62–ն է ապահովված կենտրոնացված ջեռուցման համակարգերով, մյուս դպրոցները ձմռանը տաքացվում են էլեկտրականությամբ, փայտով, գազի վառարաններով և անգամ հեղուկ վառելիքով:

Կապույտ վառելիքով տաքացվում է ընդհանուր առմամբ 110 դպրոց, որից 28–ն ունեն կաթսայատուն, 36–ը՝ փոքր հզորությամբ կաթսաներ, մնացած դպրոցները ջեռուցվում են գազի վառարաններով:

Իսկ մարզի Ձյունաշողի միջնակարգ դպրոցը դիզվառելիքով է տաքացվում:
Հիմնադրման օրվանից Ձյունաշողի դպրոցի ջեռուցման կարգը չի փոխվել: Նավթի վառարաններն այստեղ նոյեմբեր ամսից արդեն գործի են դրվում: Ծնողներն ու դպրոցի անձնակազմը «Փաստ» օրաթերթի թղթակցի հետ զրույցում դժգոհեցին, որ հեղուկ վառելիքի հոտից հաճախ գլխապտույտ ու սրտխառնոց են ունենում:

«Մեզ մոտ քամիներ շատ են լինում: Քամիների ու բքի ժամանակ ծուխը հետ է փչում և ծխի, նավթի հոտը լցվում է դասասենյակները: Քամու ժամանակ է հիմնականում այդ խնդիրներն առաջանում»,– պարզաբանեց Ձյունաշողի միջնակարգ դպրոցի տնօրեն Արթուր Սարկիսովը:

Ծովի մակարդակից 1580 մետր բարձրության վրա գտնվող համայնքում ձմեռը երկարատև է ու ցրտաշունչ: Դպրոցի տնօրենն անկեղծանում է՝ հնարավոր չէ դասասենյակները բարձր ջերմաստիճանով ապահովել: 2016 թվականին դպրոցն իր բյուջեով վերանորոգման աշխատանքներ է կատարել՝ ամրացնելով դռներն ու պատուհանները:

«Ես երկու տարվա մեջ մի քիչ վերանորոգման աշխատանքներ ենք կատարել, ջերմաստիճանն արդեն նորմալ է: Դասասենյակների հատակն ենք նորոգել, դրանք սաղ քանդված էին ու շատ ցուրտ էր»,– ներկայացրեց Արթուր Սարկիսովը:

Թեև կատարած մասնակի վերանորոգումներին՝ համայնքի հիմնախնդիրների մեջ տեղացիները կարևորում են դպրոցի հիմնանորոգումը: Ձյունաշողի միջնակարգ դպրոց հաճախում են 20 աշակերտ: Համայնքի բնակչության թիվը մեծ չէ՝ շուրջ 37 տնտեսություն: Ձյունաշողի բնակչությունը 1988–1989 թվականներին Ադրբեջանից բռնագաղթված հայերն են:«Փաստ»